ޕާކިސްތާނުން ރާއްޖެއައި މީހެއްގެ އަތުން 17 ކިލޯއަށްވުރެ ގިނަ މަސްތުވާތަކެތި އަތުލައިގެންފިއެވެ.
މި ތަކެތި އަތުލާފައިވަނީ ސެޕްޓެމްބަރު މަހުގެ 18ވަނަ ދުވަހު ރާއްޖެއައި ޕާކިސްތާނުގެ އުމުރުން 30އަހަރުގެ ފިރިހެނެއްގެ އަތުންނެވެ. ކަސްޓަމްސްއިން ވިދާޅުވީ، މި ތަކެތި ފެނިފައިވަނީ އެމީހާއާއިމެދު ޝައްކުކުރެވިގެން އޭނާގެ ލަގެޖު ބަލާ ފާސްކުރުމުގެ ތެރެއިންކަމަށެވެ.
އަތުލައިގަތް މަސްތުވާތަކެތި ފުރަތަމަ މަރުހަލާގައި ކަސްޓަމްސްއިން ތަޙުލީލު ކުރިއިރު މަސްތުވާތަކެތީގެ ބާވަތެއްކަމަށްވާ ހެރޮއިންއަށް ވަނީ ޕޮޒިޓިވްވެފައެވެ. މަސްތުވާތަކެތީގެ ބަރުދަނުގައި 17.26 ކިލޯ ހުރިއިރު، އޭގެ މަގުމަތީ އަގު އެކާވީސް މިނިއަން ރުފިޔާއަށް އަރާކަމަށް ކަސްޓަމްސްއިން ވިދާޅުވިއެވެ.
މިއީ މިއަހަރުގެ މިހާތަނަށް މި ބާވަތުގެ މަސްތުވާތަކެތި ރާއްޖެ އެތެރެކުރަން އުޅެނިކޮށް އަތުލައިގެންފައިވާ 6ވަނަ ފަހަރުކަމަށްވެސް ކަސްޓަމްސްއިން ވިދާޅުވިއެވެ. މިގޮތުން މިއަހަރުގެ މިހާތަނަށް ޖުމްލަ 55.4 ކިލޯގެ ހިރޮއިން ވަނީ އަތުލައިގެންފައެވެ.
މި މައްސަލައިގައި ޝާމިލުވާ މީހާއާއި، އަތުލައިގެން ސަތުވާތަކެތި ވަނީ ފުލުހުންނާ ހަވާލުކޮށްފައިވާކަމަށް ކަސްޓަމްސްއިން ވިދާޅުވިއެވެ.