ދުނިޔޭގެ އާބާދީގައި ވަޒީފާ އަދާކުރާ މީހުންގެ ތެރެއިން 20 އިންސައްތަ މީހުންނަށް އެކި ބާވަތްތަކުގެ އަނިޔާއާއި ފުރައްސާރައާ ކުރިމަތިލާން ޖެހޭ ކަމުގައި އ.ދ.އިން ހާމަކޮށްފިއެވެ. މި ކަން ހާމަކޮށްފައި ވަނީ އ.ދ.ގެ އިންޓަރނޭޝަނަލް ލޭބަރ އޮގަނައިޒޭޝަން (އައި.އެލް.އޯ)އިން ހަދާފައިވާ ދިރާސާއެއްގެ މަޢުލޫމާތުގެ މައްޗަށް ބިނާކޮށެވެ.
އައި.އެލް.އޯ.ގެ ރިޕޯޓުގައި ބުނެފައިވަނީ، ވަޒީފާ އަދާކުރާ މީހުންގެ އާބާދީގެ ތެރެއިން ކޮންމެ ފަސް މީހަކުން އެކަކަށް، މަސައްކަތުގެ މާހައުލުގައި އަނިޔާއާއި ފުރައްސާރައާ ކުރިމަތިވެފައިވާ ކަމުގައެވެ. އަދި، މިއީ ދުނިޔޭގެ ހުރިހާ ކަންކޮޅަކަށް ފެތުރިފައިވާ ކަމެއް ކަމުގައި އެ ޖަމުޢިއްޔާއިން ބުނެއެވެ.
އައި.އެލް.އޯ.ގެ ދިރާސާ ހަދާފައި ވަނީ ލޮއިޑްގެ ރެޖިސްޓަރ ފައުންޑޭޝަނާއި ގެލަޕް ގުޅިގެންނެވެ. މިއީ، މި ކަމާ ގުޅޭ ގޮތުން ދުނިޔޭގެ ފެންވަރުގައި ހަދާފައިވާ މި ފަދަ އެންމެ ބޮޑު ދިރާސާއެވެ. މި ދިރާސާގެ ބޭނުމަކީ، އަނިޔާއާއި ފުރައްސާރައިގެ ސަބަބުން ވަޒީފާ އަދާ ކުރާ މީހުންނަށް ކުރިމަތިވާ ގޮންޖެހުންތަކާއި، ވަޒީފާ އަދާ ކުރުމުގައި ދެމި ހުރުމަށް އޮތް ހުރަސްތައް ދެނެގަތުމެވެ.
މި ދިރާސާގައި އަނިޔާގެ ގޮތުގައި ބަލާފައި ވަނީ ޖިސްމާނީ، ނަފްސާނީ އަދި ޖިންސީ އަނިޔާއެވެ. ވަޒީފާ އަދާ ކުރާ އާބާދީގެ 22.8 އިންސައްތަ މީހުންނަށް، އުމުރުގެ ކޮންމެ ވެސް ހިސާބެއްގައި ވަޒީފާގެ މާހައުލުގައި އަނިޔާއާއި ފުރައްސާރައާ ކުރިމަތިލާން ޖެހިފައިވާ ކަމުގައި ދިރާސާއިން ހާމަވެއެވެ. އެއީ، 743 މިލިޔަން މީހުންނެވެ.
މީގެ ތެރެއިން 31.8 އިންސައްތަ މީހުން ބުނެފައި ވަނީ، އެއް ވައްތަރަށް ވުރެ ގިނަ ވައްތަރުގެ އަނިޔާއާ އެ މީހުންނަށް ކުރިމަތިލާން ޖެހުނު ކަމުގައެވެ. އަދި، 6.3 އިންސައްތަ މީހުންނަށް އަނިޔާގެ ތިން ވައްތަރާ ވެސް ކުރިމަތިލާން ޖެހުނު ކަމުގައި ދިރާސާއަށް ވަނީ ހާމަވެފައެވެ. ނަމަވެސް، އެކި ޤައުމުތަކުގައި އަނިޔާގެ ގޮތުގައި ބަލައިގަނެވޭ ކަންކަން ތަފާތު ކަމުގައި ރިޕޯޓުގައި ފާހަގަކޮށްފައިވެއެވެ.
ވަޒީފާގެ މާހައުލުގައި ކުރިމަތިވާ އެންމެ ޢާންމު އަނިޔާއަކީ ނަފްސާނީ ގޮތުން ދެވޭ އަނިޔާ ކަމުގައި އައި.އެލް.އޯ.ގެ ރިޕޯޓުގައި ބުނެފައިވެއެވެ. މި ގޮތުން، 17.9 އިންސައްތަ މީހުން ވަޒީފާގެ މާހައުލުގައި ނަފްސާނީ އަނިޔާގެ ޝިކާރައަކަށް ވެފައިވާ ކަމުގައި އ.ދ.އިން ބުނެއެވެ. އެއީ 583 މިލިޔަން މީހުންނެވެ.
އަދި، ޖިސްމާނީ އަނިޔާއާއި ފުރައްސާރައާ ކުރިމަތިލާން ޖެހުނު މީހުންގެ އަދަދު 277 މިލިޔަނަށް އަރާ ކަމުގައި ވެސް އައި.އެލް.އޯ.ގެ ރިޕޯޓުގައި ހާމަކޮށްފައިވެއެވެ. އެއީ، 8.5 އިންސައްތަ މީހުންނެވެ. ރިޕޯޓުން ފާހަގަވި އަނެއް ކަމަކީ، އެކި ބާވަތްތަކުގެ އަނިޔާއާއި ފުރައްސާރައާ ކުރިމަތިލާން ޖެހިފައިވާ ގިނަ މީހުންނަކީ އަންހެނުން ކަމެވެ. ޚާއްޞަކޮށް، އަންހެނުން މަސައްކަތްތެރިންނަށް ކުރިމަތިކުރުވާ ނަފްސާނީ އަނިޔާގެ މައްސަލަތައް ވަރަށް ގިނަ ކަމުގައި އައި.އެލް.އޯ.އިން ބުނެއެވެ.
ވަޒީފާގެ މާހައުލުގައި ކުރާ ޖިންސީ އަނިޔާއަކީ ވެސް ޢާންމުވެފައިވާ ވަބާއެއްގެ ގޮތުގައި އައި.އެލް.އޯ.އިން ފާހަގަކުރެއެވެ. ވަޒީފާ އަދާ ކުރާ މީހުންގެ އާބާދީގެ 6.3 އިންސައްތަ މީހުން، ވަޒީފާގެ މާހައުލުގައި ޖިންސީ އަނިޔާގެ ޝިކާރައަކަށް ވެފައިވާ ކަމުގައި އައި.އެލް.އޯ.ގެ ރިޕޯޓުގައި ފާހަގަކޮށްފައިވެއެވެ. އެއީ ވަޒީފާ އަދާކުރާ މީހުންގެ އާބާދީގެ ކޮންމެ 15 މީހަކުން އެކަކެވެ. މި ނުރައްކާތެރި ވަބާގެ އަސަރު އެންމެ ބޮޑަށް ކޮށްފައި ވަނީ އަންހެނުންނަށެވެ.
މީގެ އިތުރުން، ވަޒީފާގެ މާހައުލުގައި ގިނަ އަދަދެއްގެ ބަޔަކަށް ތަފާތު ކުރުމާ ކުރިމަތިލާން ޖެހިފައިވާ ކަމުގައި ވެސް އައި.އެލް.އޯ.ގެ ރިޕޯޓުގައި ފާހަގަކޮށްފައިވެއެވެ. މީގެ ތެރޭގައި ޖިންސާއި، ނުކުޅެދުންތެރިކަމާއި، ޤައުމާއި، ނަސްލާއި، ހަމުގެ ކުލައިގެ އިތުރުން ދީނާ މެދު ގެންގުޅޭ ތަފާތު ކުރުންތައް ހިމެނެއެވެ. އަދި، އަނިޔާއާއި ފުރައްސާރައިގެ މައްސަލަތައް ރިޕޯޓު ކުރުމަށް ވެސް ބޮޑެތި ހުރަސްކަތެއް ހުރި ކަމައި އައި.އެލް.އޯ.ގެ ރިޕޯޓުގައި ފާހަގަކޮށްފައިވެއެވެ.