ކޮލަމްބިޔާގެ ހުޅަނގުއުތުރުގައިވާ ސަރަޙައްދެއްގެ ބިންގަނޑު ކަނޑައިގެން ގޮސް، މަގެއްގެ މައްޗަށް ކިސަޑު ފޭބި ހާދިސާގައި މަރުވި މީހުންގެ އަދަދު 34އަށް އިތުރުވެއްޖެއެވެ. މި ހާދިސާ ހިނގާފައި ވަނީ ރިސަރަލްޑާ ޕްރޮވިންސުގެ ދެ ރަށް ކަމުގައިވާ ޕުއޭބްލޯ ރީކޯއާއި ސަންޓާ ސެސީލިޔާއާ ދެމެދު އޮންނަ މައި މަގުގައެވެ. މި ހާދިސާގައި އެ މަގުގައި ދަތުރު ކުރަމުންދިޔަ ބަހެއްގެ މައްޗަށް ވަނީ ކިސަޑު ފައިބާފައެވެ.
ރިސަރަލްޑާގެ ބިންގަނޑު ކަނޑައިގެން ގޮސްފައި ވަނީ ބޯކޮށް ވާރޭވެހުމާ ގުޅިގެންނެވެ. މި ހާދިސާގައި ކިސަޑުތަކުގެ ދަށުވެ ގެއްލިފައިވާ މީހުން ހޯދުމުގެ މަސައްކަތް ހުއްޓުމެއް ނެތި ދަނީ ކުރަމުންނެވެ. މި މަސައްކަތުގެ ދަށުން މިހާތަނަށް ނުވަ މީހަކު ސަލާމަތް ކުރެވިފައިވާ ކަމުގައި ކޮލަމްބިޔާގެ ކާރިސާތަކާ ބެހޭ ޤައުމީ އިދާރާ (ޔޫ.އެން.ޖީ.އާރް.ޑީ)އިން ބުނެއެވެ.
މި ހާދިސާގައި މަރުވި މީހުންގެ ތެރޭގައި އަށް ކުޑަކުދިން ހިމެނެއެވެ. އަދި، ސަލާމަތް ކުރެވުނު މީހުންގެ ތެރޭގައި ހަތް އަހަރުގެ ކުއްޖަކު ހިމެނޭ ކަމުގައި ވެސް ޔޫ.އެން.ޖީ.އާރް.ޑީ.އިން ބުނެއެވެ. ނަމަވެސް، އެ ކުއްޖާގެ މަންމަގެ ފުރާނަ ސަލާމަތް ކުރެވިފައެއް ނުވެއެވެ.
މި ހާދިސާގައި މަރުވި މީހުންގެ ޢާއިލާތަކަށް ކޮލަމްބިޔާގެ ރައީސް ގުސްތާވޯ ޕެޓްރޯ ވަނީ ތަޢުޒިޔާ ވިދާޅުވެފައެވެ. އަދި، އެ ޢާއިލާތަކަށް ސަރުކާރުން އެހީތެރިކަން ފޯރުކޮށްދޭނެ ކަމުގައި އޭނާ ވަނީ ވިދާޅުވެފައެވެ. މިއީ، ވަރަށް ހިތާމަވެރި ހާދިސާއެއްގެ ގޮތުގައި އޭނާ ސިފަ ކުރައްވައެވެ.
ކޮލަމްބިޔާއަކީ ފަރުބަދަމަތީ ސަރަޙައްދުތައް ގިނަ ޤައުމެކެވެ. އަދި، ބޯކޮށް ވާރޭވެހުމާއި، ޢިމާރާތްކުރުމުގެ ޤާވާޢިދުތަކާ ޚިލާފަށް ބިނާކޮށްފައި ހުންނަ ޢިމާރާތްތަކުގެ ސަބަބުން ބިންގަނޑު ކަނޑައިގެން ދިޔުމުގެ ހާދިސާތައް ގިނަ ޤައުމެކެވެ. އެ ފަދަ ހާދިސާތައް މަދު ކުރުމުގެ ގޮތުން، ގަސް އިންދުމުގެ ޕުރޮގުރާމުތައް ހިންގަން ރާވާފައިވާ ކަމުގައި ކޮލަމްބިޔާގެ ތިމާވެއްޓާ ބެހޭ ވަޒީރު ސުޒާނާ މުޙައްމަދު ވިދާޅުވިއެވެ.
ރިސަރަލްޑާގައި ހިނގި ބިންގަނޑު ކަނޑައިގެން ދިޔުމުގެ ހާދިސާގައި މަރުވި މީހުންގެ ހަށިތައް މިހާރު ވަނީ އެ ސަރަޙައްދުގައިވާ ފުޓުބޯޅަ ދަނޑަކަށް ގެންގޮސްފައެވެ. އަދި، މަރުވެފައިވާ މީހުންގެ ވަނަވަރު ކަށަވަރު ކުރުމުގެ މަސައްކަތް ކުރަމުންދާއިރު، އެ މީހުންގެ ޖަނާޒާ ބޭއްވުމަށް ވެސް މިހާރު ދަނީ ތައްޔާރު ވަމުންނެވެ.
މި އަހަރުގެ ވިއްސާރަ މޫސުން ދިގުލައިގެން ގޮސް، ގިނަ ސަރަޙައްދުތަކަށް އަދިވެސް ބޯކޮށް ވާރޭވެހެމުންދާ ކަމުގައި އެ ޤައުމުގެ މޫސުމާ ބެހޭ އިދާރާއިން ބުނެއެވެ. މިއީ، މޫސުމަށް އަންނަ ބަދަލެއް ކަމުގައިވާ "ލެ ނީނާ"ގެ ސަބަބުން ކުރިމަތިވެފައިވާ ކަމެއް ކަމުގައި އެ އިދާރާއިން ބުނެއެވެ.
މި އަހަރުގެ ވިއްސާރަ މޫސުމުގައި ބޯކޮށް ވާރޭވެހުމުގެ ސަބަބުން ކޮލަމްބިޔާގައި ހިނގާފައިވާ އެކި ހާދިސާތަކުގައި މިހާތަނަށް 216 މީހުން ވަނީ މަރުވެފައެވެ. އަދި، 538,000 އަށްވުރެ ގިނަ މީހުންގެ ގެދޮރު ވަނީ ހަލާކުވެފައެވެ. އަދި، އެކި ހާދިސާތަކުގައި ގެއްލިފައިވާ ކަމަށް ބެލެވޭ މީހުންގެ އަދަދު 48އަށް އަރައެވެ.