ރަޝިޔާއިން އަނެއްކާ ވެސް ޔޫކްރެއިނުގެ ބޮޑެތި ރަށްތަކަށް ވަރުގަދަ ހަމަލާތަކެއް ދީފިއެވެ. ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވިދާޅުވީ ރަޝިޔާއިން އެންމެ ފަހުން ދިން ހަމަލާތަކުގައި ޢާންމުންގެ ހަތަރު މީހުން މަރުވި ކަމުގައެވެ. އަދި، ވެރިރަށް ކީވްއާއި ބޮޑެތި އެހެން ރަށްތަކުގެ ގިނަ ސަރަޙައްދުތަކުން ކަރަންޓުގެ ޚިދުމަތް އަނެއްކާ ވެސް ކެނޑިފައިވާ ކަމުގައި އޭނާ ވިދާޅުވިއެވެ.
"ކަރަންޓުގެ ޚިދުމަތް ކެނޑިފައިވާ ސަރަޙައްދުތަކަށް އެ ޚިދުމަތް އަލުން ގުޅައިދިނުމަށް މެދުކެނޑުމެއް ނެތި މި ދަނީ މަސައްކަތް ކުރަމުން. ހަމަލާތަކުގައި ލިބިފައިވާ ގެއްލުމާ ގުޅިގެން 24 ގަޑިއިރު މެދުކެނޑުމެއް ނެތި ކަރަންޓުގެ ޚިދުމަތް ފޯރުކޮށްދިނުމަށް މިހާރު ބޮޑެތި ގޮންޖެހުންތަކެއް އެބަހުރި،" ޒެލެންސްކީ ވިދާޅުވިއެވެ. ހަމަލާތަކުގައި އެންމެ ބޮޑަށް ގެއްލުން ލިބިފައިވަނީ ލްވީވްއަށެވެ. އެ ރަށުގެ ބޮޑު ސަރަޙައްދަކުން ކަރަންޓުގެ ޚިދުމަތް ވަނީ މެދުކެނޑިފައެވެ.
ރަޝިޔާއިން ޔޫކްރެއިނުގެ ރަށްތަކަށް ވަރުގަދަ މިސައިލް ހަމަލާތަކެއް ދޭން ފަށާފައި މި ވަނީ، ރަޝިޔާއިން ގަންނަ ތެލުގެ އަގު ކޮންޓްރޯލް ކުރުމަށް ޖީ7ގެ ޤައުމުތަކުން ނިންމުމާ ގުޅިގެންނެވެ. ޖީ7ގެ ނިންމުމާ އެކު ވިލާތުގެ އިއްތިހާދު (އީ.ޔޫ)ގެ ޤައުމުތަކުން ދެން ރަޝިޔާއިން ތެޔޮ ގަންނާނީ ފީފާއަކަށް 60 ޑޮލަރުގެ ރޭޓުންނެވެ. ޑިސެންބަރު 5ވަނަ ދުވަހުން ފެށިގެން އެ ނިންމުމަށް ވަނީ އަމަލު ކުރަން ފަށާފައެވެ.
ޖީ7އާއި އީ.ޔޫ.ގެ އިތުރުން އޮސްޓްރޭލިޔާއިން ވެސް މި ނިންމުމަށް އަމަލު ކުރާނެއެވެ. އަދި، މި ނިންމުމުގެ ސަބަބުން ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައަށް ޚަރަދު ކުރުމަށް އެ ޤައުމަށް ދަތިވާނެ ކަމަށް އެ ޤައުމުތަކުން ޤަބޫލު ކުރެއެވެ.
ނަމަވެސް މި ކަމާ ގުޅޭ ގޮތުން ރަޝިޔާއިން ބުނީ، އެކަމުގެ ސަބަބުން ރަޝިޔާގެ އަސްކަރީ ކެމްޕޭނަށް އެއްވެސް އަސަރެއް ނުކުރާނެ ކަމުގައެވެ. އަދި، ޔޫކްރެއިނަށް ވަރުގަދަ ހަމަލާތަކެއް ދޭން ފަށާފައި މި ވަނީ، ރަޝިޔާގައި އޮންނަ އެ ޤައުމުގެ އަސްކަރީ ދެ ވައިގެ ބަނދަރަކަށް ދިން ޑްރޯން ހަމަލާތަކަކާ ގުޅިގެން ކަމުގައި ރަޝިޔާއިން ބުނެއެވެ.
ސަރަޓޯފް އަދި ރްޔަޒަން ސަރަޙައްދުގައި އޮންނަ ދެ ވައިގެ ބަނދަރަށް ދިން ޑްރޯން ހަމަލާތަކުގައި ސިފައިންގެ ތިން މީހަކު މަރުވި ކަމުގައި ރަޝިޔާއިން ބުނެއެވެ. މި ހަމަލާތަކުގެ ރައްދުގައި ޔޫކްރެއިނުގެ އަސްކަރީ ކޮމާންޑް މަރުކަޒުތަކަށާއި، ދިފާޢީ ވަސީލަތްތްތަކާއި، ހަކަތަ އުފައްދާ ޕްލާންޓުތަކުގެ އިތުރުން މުވާސަލާތީ ޚިދުމަތް ދިނުމަށް ބޭނުންކުރާ ވަސީލަތްތަކަށް އަމާޒުކޮށް ހަމަލާ ދެމުންދާ ކަމުގައި ރަޝިޔާގެ ދިފާޢީ ވުޒާރާއިން ބުނެއެވެ.
ޒެލެންސްކީ ވިދާޅުވީ، ރަޝިޔާއިން ދެމުންދާ މިސައިލް ހަމަލާތަކުގެ ތެރެއިން ގިނަ މިސައިލްތައް ޔޫކްރެއިނުގެ ދިފާޢީ ސިފައިން ވައްޓައިލާފައިވާ ކަމުގައެވެ. ނަމަވެސް، ހަމަލާތަކުގައި ޔޫކްރެއިނުގައި ކަރަންޓުގެ ޚިދުމަތް ދިނުމަށް ބޭނުންކުރާ ވަސީލަތްތަކުގެ ދެބައިކުޅަ އެއްބައި މިހާރު ވަނީ ހަލާކުވެފައެވެ. މި ކަމާ ގުޅިގެން ގިނަ ސަރަޙައްދުތަކުން ކަރަންޓުގެ ޚިދުމަތް މެދުކެނޑިފައިވާއިރު، ފިނިމޫސުން އައުމާއެކު އެ ޤައުމުގެ ރައްޔިތުން ވަނީ ބިކަ ހާލުގައި ޖެހިފައެވެ.
ރަޝިޔާއިން ޔޫކްރެއިނުގެ އަމާޒުތަކަށް ވަރުގަދަ ހަމަލާތަކެއް ދެމުން މި ދަނީ އ.ދ.ގެ އިންސާނީ ހައްޤުތަކާ ބެހޭ އިދާރާގެ އިސްވެރިޔާ ވޮލްކަރ ޓަރކް ޔޫކްރެއިނަށް ދަތުރުފުޅެއް ކުރައްވަމުން ގެންދަވާ ދަނޑިވަޅެއްގައެވެ. ހަމަލާތަކާ ގުޅިގެން ޔޫކްރެއިނުގެ އޮފިޝަލުންނާ އޭނާ ބައްދަލު ކުރައްވާފައި ވަނީ ވެރިރަށް ކީވްގެ ބިމު އަޑީގައި ހަދާފައިވާ ބިންގަރާސްތަކުގައެވެ.