ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައާ ގުޅިގެން އެ ޤައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިތުރަށް ހަރުކަށި ކުރުމުގެ ގޮތުން ރަޝިޔާއިން ގަންނަ ތެލުގެ އަގު ކޮންޓްރޯލް ކުރަން ޖީ7ގެ ޤައުމުތަކުން ނިންމައިފިއެވެ. ގްރޫޕް އޮފް ސެވަން (ޖީ7)އަކީ ދުނިޔޭގެ އެންމެ ކުރިއަރާފައިވާ އިޤުތިޞާދުތަކުގެ މައްޗަށް އެކުލެވިގެންވާ ޖަމުޢިއްޔާއެވެ.
ޖީ7ގެ ޤައުމުތަކުގެ އިތުރުން އޮސްޓްރޭލިޔާއިން ވެސް ތާޢީދުކޮށްފައިވާ މި ނިންމުމުގެ ދަށުން ރަޝިޔާއިން ގަންނަ ތެޔޮ ފީފާއެއްގެ އަގު ވަނީ 60 ޑޮލަރަށް ދަށްކޮށްފައެވެ. އަދި، ޑިސެންބަރު 5ވަނަ ދުވަހުން ފެށިގެން މި ބަދަލަށް އަމަލު ކުރަން ވަނީ ނިންމާފައެވެ. ރަޝިޔާއިން ގަންނަ ތެލުގެ އަގު ކޮންޓްރޯލް ކުރުމަށް ވިލާތުގެ އިއްތިހާދު (އީ.ޔޫ)އިން ކުރަމުން ދިޔަ މަސައްކަތްތަކަށް ޕޮލެންޑުން މީގެ ކުރިން ވަނީ ހުރަސް އަޅާފައެވެ.
ނަމަވެސް، ޕޮލެންޑުން ވެސް މިހާރު ވަނީ މި ކަމަށް އެއްބަސްވެފައެވެ. އަގު ކޮންޓްރޯލް ކުރުމަށް ނިންމި ނިންމުން ތަންފީޒު ކުރުމުގެ ގޮތުން ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިތުރަށް ހަރިކަށި ކުރަން ނިންމުމަކީ އެކަށީގެންވާ ކަމެއް ކަމުގައި ވެސް ޖީ7އިން ބުނެއެވެ.
ރަޝިޔާއިން ގަންނަ ތެލުގެ އަގު ކޮންޓްރޯލް ކުރުމަށް ޖީ7ގެ ޤައުމުތަކުން ނިންމާފައި މި ވަނީ، ތެޔޮ ވިއްކައިގެން ރަޝިޔާއަށް ލިބޭ އާމްދަނީ މަދު ކުރުމުގެ ގޮތުންނެވެ. މި ކަމުގެ ސަބަބުން ޔޫކްރެއިނުގައި ރަޝިޔާއިން ކުރަމުންދާ ހަނގުރާމައަށް ޚަރަދު ކުރަން އެ ޤައުމަށް ދަތިވާނެ ކަމަށް ޖީ7ގެ އިތުރުން އީ.ޔޫ.އިން ވެސް ޤަބޫލު ކުރެއެވެ. މި ނިންމުމުގެ ސަބަބުން ދުނިޔޭގެ ބާޒާރުގައި ތެލުގެ އަގު އުފުލެމުންދާ މިންވަރު ކޮންޓްރޯލް ކުރެވޭނެ ކަމުގައި ވެސް ޖީ7އިން ބުނެއެވެ.
"މި ނިންމުމުގެ ސަބަބުން ރަޝިޔާގެ އާމްދަނީ އެތަކެއް ގުނައަކުން ދަށަށް ދާނެ. އަދި، ކުރިއަރަމުން އަންނަ އިޤުތިޞާދުތަކަށް މި ކަމުގެ ފައިދާ ކުރާނެ. މީގެ އިތުރުން ދުނިޔޭގެ ބާޒާރުގައި ތެލުގެ އަގު ކޮންޓްރޯލް ކުރުމަށް ވެސް މި ނިންމުމުގެ ސަބަބުން ފަސޭހަ ވާނެ،" ވިލާތުގެ ކޮމިޝަންގެ ރައީސާ އުރްސުލާ ވޮންޑެލަޔަން ވިދާޅުވިއެވެ.
އެމެރިކާއިން ވެސް ވަނީ ޖީ7ގެ ނިންމުމަށް މަރުޙަބާ ކިޔާފައެވެ. އަދި، ރަޝިޔާގެ ހަނގުރާމައާ މުޅި ދުނިޔެ ދެކޮޅުކަން މި ނިންމުމުގެ ސަބަބުން ހާމަވެގެން ގޮސްފައިވާ ކަމުގައި އެމެރިކާއިން ބުނެއެވެ. ޖީ7އިން މިހާރު ދަނީ، މި ނިންމުމަށް އަމަލުކުރަން ފެށުމަށް 27 ޤައުމުގެ މައްޗަށް އެކުލެވިގެންވާ އީ.ޔޫ.ގެ މެންބަރު ޤައުމަށް އަންގަން ފަށާފައެވެ.