ރިޕަބްލިކް އޮފް ކޮރެއާއާއި ދިވެހިރާއްޖެއާ ދެމެދު ސިޔާސީ ގުޅުން ޤާއިމުކުރިތާ 55 އަހަރު ފުރުން ފާހަގަކުރުމަށް ޚާއްސަ ހަރަކާތްތަކެއް ބާއްވައިފިއެވެ. ކޮރެއަން އެމްބަސީއާއި ރާއްޖޭގެ ފޮރިން މިނިސްޓްރީ ގުޅިގެން ކުރިއަށްގެންދިޔަ މިހަރަކާތުގައިވަނީ ކޮރެއާގެ ސަޤާފަތް ދައްކުވައިދޭ އައިޓަމްތައް ބާއްވާފައެވެ.
"ކޮރެއާ މޯލްޑިވްސް ކަލްޗަރަލް އިވެންޓް" ކުރިއަށްގެންދިޔައީ ހުޅުމާލޭގެ ޝުވެކް ސިނަމާގައެވެ. 2 ދުވަހުގެ މިހަރަކާތުގައި ކޮރެއާގެ ސަޤާފީ ކަރާޓީ ހަރަކާތެއްކަމަށްވާ "ޓައިކްވޮންޑޯ"ގެ ހަރަކާތްތައްވަނީ ދައްކާލާފައެވެ. މި ހަރަކާތް ކުރިއަށްގެންދިޔައީ ރާއްޖޭގެ ދަރިވަރުންނެވެ. މިއިވެންޓްގައި ކޮރެއާގެ ކޮމެޑީ ފިލްމެއްވެސް އަޅުވާފައިވެއެވެ.
މިހަރަކާތުގައި ވާހަކަދައްކަވަމުން ކޮރެއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވޫންޖިން ޖިއޯން ވިދާޅުވީ، ރާއްޖެއާއި ކޮރެއާއާއި ދެމެދު އޮތީ ވަރަށް ގާތްގުޅުމެއްކަމަށެވެ. އެގޮތުން ދެ ޤައުމުގެ ދެމެދުގައާއި އަދި ބައިނަލްއަޤްވާމީގޮތުން ކުރިއަށްގެންދާ ޚާރިޖީ މަސައްކަތްތަކުގައިވެސް ދެ ޤައުމު ގުޅިގެން މަސައްކަތް ކުރާކަމަށެވެ. ރާއްޖެއާއި ކޮރެއާގެ ގުޅުމަކީ އެހެން ޤައުމުތަކަށް ނަމޫނާ ގުޅުމެއްކަމަށްވެސް ސަފީރު ވޫންޖިން ޖިއޯން ވިދާޅުވިއެވެ.
ސަފީރު ވިދާޅުވީ ރާއްޖެއަކީ ކޮރެޔާގެ ރައްޔިތުންގެ މެދުގައި ފަތުރުވެރިކަމުގެ ރޮނގުންވެސް މަޤުބޫލު ޤައުމެއްކަމަށެވެ.
"ސިޔާސީ ޤުޅުމުގެ އިތުރުން ސަޤާފީ ގޮތުންގެ ދެ ޤައުމުގެ ގުޅުން ދަނީ ބަދަހިވަމުން. މި ހަރަކާތުގެ މަޤުސަދަކީވެސް ކޮރެއާގެ ސަޤާފަތް ބަލާލުމުގެ ފުރުޞަތު ދިވެހިންނަށް ދިނުން." ސަފީރު ވިދާޅުވިއެވެ.
ސަފީރު ވަނީ، ނިމިދިޔަ ދަޢުރުގައި އދގެ ރައީސްގެ މަޤާމު ރާއްޖޭގެ ފޮރިން މިނިސްޓަރ އަބްދުﷲ ޝާހިދު ފުރުއްވާފައިވާތީ އެކަން ފާހަގަކުރައްވާ މަރުހަބާ ވިދާޅުވެފައެވެ.
މި ރަސްމިއްޔާތުގައި މިނިސްޓަރ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަމަންޓް އަޙުމަދު މަޙުލޫފުު ވިދާޅުވީ ކޮރެއާއަކީ މުނިފޫހިފިލުވުމާއި ސަޤާފީ ކުޅިވަރުގެ ދާއިރާގައި ފާހަގަކޮށްލެވޭ ޤައުމެއްކަމަށެވެ. މަހްލޫފް ވިދާޅުވީ ދެ ޤައުމުގެ ދެމެދުގައި އޮތް ސިޔާސީ ގުޅުމުގެ އިތުރުން، ސަޤާފީ ކުޅިވަރުގެ ދާއިރާއިންވެސް އިތުރަށް ގުޅުން ބަދަހިކުރައްވާނެކަމަށެވެ.
"އެމްބެސެޑަރ އެދިލެއްވިގޮތަށް ކަރާޓީ "ޓައިކްވޮންޑޯ"ގެ ހަރަކާތްތައް ރާއްޖޭގައި ޤައުމީ ލެވެލްގައި ކުޅެވޭ ކުޅިވަރުތަކުގައި ހިމެނުމަށް މިދަނީ މަސައްކަތް ކުރަމުން." މަޙުލޫފު ވިދާޅުވިއެވެ.
ކުރިއަށް އޮތް އަހަރުތަކުގައި އެކި ދާއިރާތަކުން ދެ ޤައުމުގެ ގުޅުން އިތުރަށް ބަދަހިވެގެންދާނެކަން ކޮރެއަން އެމްބަސީން ފާހަގަކުރެއެވެ.