އަޅުވެތިކޮށްފައިވާ ފަލަސްޠީނުގެ ބިންތަކަށް އަރައި ޔަހޫދީންގެ ސިފައިން ހިންގި އުދުވާންތަކެއްގައި ފަލަސްޠީނުގެ ފަސް މީހަކު ޝަހީދު ކޮށްލައިފިއެވެ. ހުޅަނގު އައްސޭރީގެ ދެ ސަރަޙައްދެއްގައި ޔަހޫދީން ސިފައިން ހިންގި އުދުވާންތަކުގައި ގިނަ ޢަދަދެއްގެ ބަޔަކު ޒަޚަމު ވެސް ކޮށްލިއެވެ.
ފަސް މީހުންގެ ތެރެއިން ހަތަރު މީހަކު ޝަހީދު ކޮށްލާފައި ވަނީ ޔަހޫދީންގެ ސިފައިން ދިން ބަޑީގެ ހަމަލާތަކެއްގައެވެ. އެ މީހުން ޝަހީދު ކޮށްލާފައި ވަނީ ޔަހޫދީންގެ އަޅުވެތިކަމާ ދެކޮޅަށް އަޑުއުފުލައި، ޔަހޫދީންގެ ސިފައިންނާ ކުރިމަތިލުމުގެ ކުށުގައެވެ. މީގެ ތެރެއިން ދެ މީހަކު އެއްބަޑު އެއްބަފާ ދެބެއިންނެވެ. އެ މީހުން ޝަހީދު ކޮށްލާފައި ވަނީ ރާމަاللهގައެވެ.
ތިން ވަނަ މީހާ ޝަހީދު ކޮށްލާފައި ވަނީ ބެއިތު ޢުއްމަރުގައެވެ. އޭނާ ޝަހީދުވީ އޭނާގެ ބޮލަށް ޔަހޫދީންގެ ސިފައިން ބަޑި ޖެހުމުންނެވެ. ޔަހޫދީންގެ ސިފައިން ޝަހީދު ކޮށްލާފައިވާ ހަތަރު ވަނަ މީހާއަށް ހަމަލާ ދީފައި ވަނީ ރާމަاللهގައެވެ. އޭނާގެ މެޔަށް ބަޑިޖަހާފައިވާ ކަމުގައި ފަލަސްޠީނުގެ ޞިއްޙީ ވުޒާރާއިން ބުނެއެވެ.
ޔަހޫދީންގެ ޝިކާރައަކަށްވެ ޝަހީދުވެފައިވާ ފަލަސްޠީނުގެ މީހުންނަކީ ރާއިދު ޣާޒީ އަލް-ނާސަނާއި، 44 އަހަރުގެ މުފީދު މަޙުމޫދު ޚަލީލާއި، ދެބެއިން ކަމުގައިވާ 22 އަހަރުގެ ޖަވާދު ޢަބްދުއްރަޙްމާން ރިމާވީއާއި 21 އަހަރުގެ ޛާފިރު ޢަބްދުއްރަޙްމާން ރިމާވީއެވެ. ފަސްވަނަ މީހަކު ޝަހީދު ކޮށްލާފައި ވަނީ ހުޅަނގު އައްސޭރީގައި ޔަހޫދީން ވަޒަންވެރިވެގެން އުޅޭ ސަރަޙައްދެއްގައެވެ.
ފަލަސްޠީނު ސަރުކާރުގެ ވަޒީރެއް ކަމުގައިވާ ޙުސައިން އަލް-ޝައިޚް މި އުދުވާންތައް ސިފަ ކުރައްވާފައި ވަނީ ލާއިންސާނީ ޤަތުލުތަކެއްގެ ގޮތުގައެވެ. ޔަހޫދީންގެ ސިފައިން ފަލަސްޠީނުގެ ބިންތަކަށް އަރައި އުދުވާން ހިންގުމަކީ މިހާރު ކޮންމެ ދުވަހަކު ހިންގާ ޢާންމު ކަމެކެވެ. މި ކަމާ މެދު ދުނިޔޭގެ އެކި ކަންކޮޅުތަކުން ދަނީ ކަންބޮޑުވުން ފާޅު ކުރަމުންނެވެ.
"ހުޅަނގު އައްސޭރިއާއި އިސްރާޢީލުގައި ހިންގަމުންދާ ހަމަނުޖެހުންތަކުގެ ސަބަބުން ގިނަ ޢަދަދެއްގެ ބަޔަކަށް ވަނީ ކެކުޅުމާ ކުރިމަތިލާން ޖެހިފައި. މި ކަމުގެ އަސަރު ކުރަމުން ދަނީ ޢާންމު ރައްޔިތުންނަށް،" އ.ދ.އިން މެދުއިރުމަތީގެ ސުލްޙައަށް ކަނޑައަޅާފައި ހުންނަވާ މަންދޫބު ޓޯރ ވެނެސްލެންޑް ވިދާޅުވިއެވެ.
ޔަހޫދީ ސިފައިން މި އަހަރުގެ ތެރޭގައި ހިންގާފައިވާ އުދުވާންތަކުގައި ޝަހީދު ކޮށްލާފައިވާ ފަލަސްޠީނު ރައްޔިތުންގެ އަދަދު މިހާރު ވަނީ 125އަށް އަރާފައެވެ. މީގެ ތެރޭގައި ގިނައީ ކުށެއް ނެތް ޢާންމުންނެވެ. އަދި، ޔަހޫދީންގެ ސިފައިން ވަނީ 3,000 އަށްވުރެ ގިނަ މީހުން ހައްޔަރު ކޮށްފައެވެ.