އެމެރިކާގެ ވަރޖިނިޔާ ސްޓޭޓްގައި ހުންނަ ވޮލްމާޓް ކުންފުނީގެ ފިހާރައެއްގައި ބަޑިޖަހައި ހަ މީހަކު މަރައިލައިފިއެވެ. މި ހާދިސާ ހިނގާފައި ވަނީ ވަރޖިނިޔާގެ ރަށެއް ކަމުގައިވާ ޗެސެޕީކްގައި ހުންނަ ވޮލްމާޓްގެ ފިހާރައެއްގައެވެ. ބަޑި ޖަހާފައި ވަނީ އެ ފިހާރައިގައި ސުޕަވަރިޒަރެއްގެ މަޤާމުގައި މަސައްކަތް ކުރާ މީހެކެވެ. މި ހާދިސާގައި އޭނާ ވެސް މަރުވިއެވެ.
ބަޑިޖަހައި މަރައިލާފައި ވަނީ އެ ފިހާރައިގެ މަސައްކަތް ކުރާ މުވައްޒަފުންނެވެ. މި ހަމަލާގެ ފަހަތުގައިވާ ސުޕަވަރިޒަރަކީ 31 އަހަރުގެ އަންދްރޭ ބިންގް ކަމުގައި ޗެސެޕީކްގެ ފުލުހުން ބުނެއެވެ. އޭނާއާ އެކު ފިހާރައިގައި މަސައްކަތް ކުރާ ހަ މީހުން މަރައިލުމަށް ފަހު، ބިންގް ވަނީ އޭނާގެ އަމިއްލަ ފުރާނަ ވެސް ނަގައިލާފައެވެ.
ޗެސެޕީކްގައި މި ހާދިސާ ހިނގާފައި މި ވަނީ، ކޮލޮރާޑޯ ސްޓޭޓްގެ ނައިޓް ކްލަބެއްގައި ދިން ބަޑީގެ ހަމަލާތަކެއްގައި ފަސް މީހަކު މަރައިލިތާ ހަފުތާއެއް ވެސް ނުވަނީހެވެ. މި ހާދިސާ ހިނގާފައި ވަނީ ކޮލޮރާޑޯ ސްޕްރިންގްސް ކިޔާ ރަށެއްގައެވެ.
ވޮލްމާޓް ފިހާރައިގައި ދިން ހަމަލާގައި އިތުރު ތިން މީހަކު ޒަޚަމުވި ކަމުގައި ވެސް ޗެސެޕީކްގެ ފުލުހުން ބުނެއެވެ. ބަޑީގެ ހަމަލާ ދިން ވަގުތު ފިހާރައިގެ ތެރޭގައި 50އަށްވުރެ ގިނަ މީހުން ތިއްބެވެ. މި ހަމަލާގައި މަރުވި މީހުންގެ ތެރޭގައި އެ ފިހާރައިގައި މަސައްކަތް ކުރާ 16 އަހަރުގެ ކުއްޖެއްގެ އިތުރުން 70 އަހަރުގެ ފިރިހެނެއް ވެސް ހިމެނެއެވެ.
މި ހާދިސާގައި ޒިންމާވާ ބިންގްއަކީ 2010ވަނަ އަހަރުން ފެށިގެން އެ ފިހާރައިގައި މަސައްކަތް ކުރަމުންދާ މުވައްޒަފެކެވެ. އޭނާ މި އަމަލު ހިންގަން މެދުވެރިވި ސަބަބު ދެނެގަތުމަށް ފުލުހުން މިހާރު ދަނީ ތަހުޤީޤު ކުރަމުންނެވެ. މި ހާދިސާއާ ގުޅިގެން ފުލުހުން ވަނީ އޭނާ ދިރިއުޅޭ ގެ ވެސް ބަލައިފާސްކޮށްފައެވެ.
މި ހާދިސާއާ ގުޅިގެން ކަންބޮޑުވުން ފާޅު ކުރައްވަމުން އެމެރިކާގެ ރައީސް ޖޯ ބައިޑަން ވަނީ މި މަހުގެ ކުރީކޮޅު ޔުނިވަރިސިޓީ އޮފް ވަރޖިނިޔާގައި ކިޔަވާ ތިން ދަރިވަރަކު ވެސް މި ފަދަ ބަޑިޖެހުމުގެ ހާދިސާއެއްގައި މަރައިލާފައިވާ ކަން ފާހަގަ ކުރައްވާފައެވެ.
ތަފާސް ހިސާބުތަކަށް ބަލައިލާއިރު، އެމެރިކާގައި ކޮންމެ ދުވަހަކު ވެސް ބަޑިޖެހުމުގެ މި ފަދަ ދެ ހާދިސާ ހިނގައެވެ. "މާސް ޝޫޓިންގް" ނުވަތަ ބަޑިޖަހައިގެން ގިނަ އަދަދެއްގެ ފުރާނަ ނަގައިލުމުގެ ހާދިސާއެއް ކަމުގައި ބަލަނީ ހަތަރެއް ނުވަތަ އެއަށްވުރެ ގިނަ މީހެއްގެ ފުރާނަ ގެއްލޭ މި ފަދަ ހާދިސާތަކަށެވެ.
މިއީ ވޮލްމާޓްގެ ފިހާރައެއްގައި ހިނގާފައިވާ މި ފަދަ ފުރަތަމަ ހާދިސާއެއް ނޫނެވެ. 2019ވަނަ އަހަރު އެލް ޕާސޯގައި ހުންނަ ވޮލްމާޓްގެ ފިހާރައެއްގައި ދިން ބަޑީގެ ހަމަލާއެއްގައި 23 މީހުން ވަނީ މަރައިލާފައެވެ. އެ ހާދިސާއަކީ ޓެރެރިސްޓް ހަމަލާއެއްގެ ގޮތުގައި އެމެރިކާއިން ދެކެއެވެ. އެ ހާދިސާގައި މަރައިލާފައި ވަނީ ދެކުނު އެމެރިކާ ބައްރުގެ ޤައުމުތަކަށް ނިސްބަތްވާ މީހުންނެވެ.