ވޯލްޑް ލީޑިން ޑެސްޓިނޭޝަންގެ އެވޯޑާއި، ބައިނަލްއަޤްވާމީ އެހެނިހެން އެވޯޑްތައް ރާއްޖޭގެ ފަތުރުވެރިކަމުގެ ދާއިރާއަށް ލިބުމުގައި، ޝެފުންގެ ދަޢުރު ވަރަށް ބޮޑުކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ރާއްޖޭގައި ދޭ ފުރަތަމަ ޝެފުންގެ އެވޯޑްކަމަށްވާ ޝެފް ގިލްޑް މޯލްޑިވްސްގެ "ޝެފް އެވޯޑް 2022" ޝަަރަފުވެރިކޮށްދެއްވާ ވާހަކަފުޅުދައްކަވަމުންނެވެ.
"ޝެފް އެވޯޑް 2022" ރަސްމިއްޔާތުގައި ވާހަކަފުޅުދައްކަވަމުން ރައީސް ވިދާޅުވީ ރާއްޖޭގައި ފަތުރުވެރިކަން ތަޢާރަފްވެގެން އައިރު، ފަތުރުވެރިންގެ ކެއިން ބުއިމުގެ ކަންކަން ހަމަޖައްސާނެ ގޮތްތަކާއި މެދު ވަރަށް ބޮޑަށް އެކަމުގައި އުޅުނު ފަރާތްތަކުން އޭރު ވިސްނަންޖެހުނުކަމަށެވެ. ނަމަވެސް އޭގެ 50 އަހަރު ފަހުން، މިއަދު ރާއްޖެ މި ފާހަގަވެގެންދަނީ ބައިނަލްއަޤްވާމީ ފެންވަރުގައި ފަތުރުވެރިކަމުގައި ހުރިހާ ދާއިރާއަކުންވެސް އެންމެ ކާމިޔާބު އެއް ޤައުމުގެ ގޮތުގައިކަމަށް ރައީސް ވިދާޅުވިއެވެ. އެގޮތުން ޖެހިޖެހިގެން 3 ފަހަރު، ވޯލްޑް ލީޑިން ޑެސްޓިނޭޝަންގެ އެވޯޑާއި، އިންޑިއާ ކަނޑުގެ އެކި ކެޓަގަރީތަކުން 22 އެވޯޑް ޙާސިލްކޮށްފައިވުމަކީ، ފަތުރުވެރިކަމުގެ ހުރިހާ ޚިދުމަތްތެރިން އޭގައި ޝާމިލްވާ ކަމެއްކަމަށް ރައީސް ވިދާޅުވިއެވެ.
— The President's Office (@presidencymv) November 19, 2022
ރައީސް ވިދާޅުވީ ރާއްޖޭގައި ފުރަތަމަ ޝެފް އެވޯޑެއް ތައާރަފްކުރެވިގެން ދިއުމަކީ ރާއްޖޭގެ ފަތުރުވެރިކަމިގެ ތާރީޚުގައި ލިޔެވިގެންދާނޭކަމެއްކަމަށެެވެ. އަދި މިއީ ދާއިރާއަށް ނިކުންނަ ދިވެހިން އިތުރުވެ، ބައިނަލްއަޤްވާމީ ފެންވަރުގައި ފާހަގަކޮށްލެވޭ ކެއްކުންތެރިން އިތުރުވެގެންދާނޭކަމެއްކަމަށް ރައީސް ފާހަގަކުރެއްވިއެވެ. ނަމަވެސް ފަތުރުވެރިކަމުގެ މުޅި ދާއިރާއަށް ބަލާއިރު ދިވެހި ޝެފުން މަދުކަންވެސް ރައީސް ފާހަގަކުރެއްވިއެވެ.
ރައީސްގެ ވާހަކަފުޅުގައި ވަނީ ވަކި ފަންނެއްގެ ގޮތުގައި ޝެފުންގެ ދާއިރާ ރާއްޖޭގައި ފުޅާވަމުން އަންނަކަން ފާހަގަކުރައްވާފައެވެ. އަދި ދިވެހި ރަހަތަކާއެކު ދިވެހި ކެއުމުގެ ޚާއްސަ ބްރޭންޑެއް ނެރުމުގެ ޤާބިލުކަންވެސް މިހާރު ދިވެހި ޝެފުންގެ ހުރިކަމަށްވެސް ރައީސް ވިދާޅުވިއެވެ.
"ދިވެހި ރަހަތަށް ބައިނަލްއަޤްވާމީ ފެންވަރަށް ގެންދެވިއްޖެނަމަ، ދިވެހިންގެ ރަހަ މުޅިން އާ ބްރޭންޑެއްގެ ގިތުގައި އުފެދިގެންދާނެ. އޭރުން އިޓާލިއަން ޕިއްޒާއާއި ހައިދްރަބާދީ ބިރިޔާނީއާއި، ޖަޕާން ސޫޝީހެން ދިވެހިންގެ ރަހަތަށްވެސް ވެގެން ހިނގައިދާނެ." ރައީސް ވިދާޅުވިއެވެ.
ރައީސްގެ ވާހަކަފުޅުގައި ކެއްކުމުގެ ދާއިރާ ވަކި ދާއިރާއެއްގެ ގޮތުގައި ފުޅާވެ، އެއިން އާމްދަނީ ހޯދާ މީހުން އިތުރުވަމުން އަންނަކަމަށް ވިދާޅުވިއެވެ. އަދި ރައީސް ވަނީ ޝެފް ގިލްޑް މޯލްޑިވްސް ސީޖީއެމްއިން މިފަދަ އެވޯޑެއް ދޭން ނިންމި ކަމަށްޓަކާ އެ ޖަމުއިއްޔާއަށް ޝުކުރު އަދާކުރައްވާފައެވެ..