އޭޝިޔާއާއި ޕެސިފިކްގެ ޤައުމުތަކުގެ އިޤުތިޞާދީ ގުޅުން (އޭޕެކް)ގެ ގިނަ ޤައުމުތައް ވެސް ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައާ ދެކޮޅު ކަން ހާމަކޮށްފިއެވެ. 21 މެންބަރު ޤައުމުގެ މައްޗަށް އެކުލެވިގެންވާ އޭޕެކްގެ މެންބަރުން މި ކަން ހާމަކޮށްފައި ވަނީ ތައިލެންޑު ވެރިރަށް ބެންކޮކުގައި ކުރިއަށްދާ ބައްދަލުވުމުގެ ތެރެއިން ނެރުނު ބަޔާނެއްގައެވެ.
އޭޕެކްގެ މެންބަރު ޤައުމުތަކުން ނެރެފައިވާ ގުޅިފައިވާ ބަޔާނުގައި ރަޝިޔާ-ޔޫކްރެއިން ހަނގުރާމައަށް ފާޑު ކިޔުންތައް އަމާޒުކޮށް، ހަނގުރާމައާ ގުޅިގެން ދުނިޔޭގެ އިޤުތިޞާދަށް ކުރިމަތިވެފައިވާ ހީނަރުކަމާ މެދު ކަންބޮޑުވުން ފާޅުކޮށްފައިވެއެވެ. މި ބަޔާނުގައި ރަޝިޔާއާއި ޗައިނާގެ އޮފިޝަލުން ވެސް ސޮއިކޮށްފައިވާ ކަން ފާހަގަކޮށްލަން ޖެހެއެވެ.
ބަޔާނުގައި ބުނެފައި ވަނީ ހަނގުރާމައާ މެދު ކަންބޮޑުވާ ކަމަށާއި، ހަނގުރާމަ ކުށްވެރިކުރާ ކަމުގައެވެ. އަދި، ހަނގުރާމައިގެ ސަބަބުން ދުނިޔޭގެ އެކި ކަންކޮޅުތަކުގައި އެތަކެއް މިލިޔަން ބަޔަކަށް މުސީބާތްތަކާއި ކުރިމަތިލާން ޖެހިފައިވާ ކަން ވެސް ފާހަގަ ކޮށްފައިވެއެވެ.
ޤައުމުތަކުގެ އިޤުތިޞާދީ ދުވެލި މަޑުޖެހިފައިވާ ކަމަށާއި، ތަކެތީގެ އަގުތައް އުފުލި، އެއްތަނުން އަނެއްތަނަށް މުދާ ގެންދިޔުމަށް ހުރަސް އެޅިފައިވާ ކަމާއި، ހަކަތައާއި ކާބޯތަކެތީގެ ރައްކާތެރި ކަން ކަށަވަރު ކުރުމަށް ގޮންޖެހުންތައް ކުރިމަތިވެފައިވާ ކަމުގައި ބަޔާނުގައި ހާމަކޮށްފައިވެއެވެ. ނަމަވެސް، މި ބަޔާނުގައި ސީދާ ރަޝިޔާއަށް އަމާޒުކޮށް އެއްވެސް ފާޑު ކިޔުމެއް ނެތެވެ.
ހުސްވި ހަފުތާގައި ބޭއްވި ދުނިޔޭގެ އެންމެ ބޮޑު 20 އިޤުތިޞާދު ކަމުގައިވާ ޖީ20ގެ ބައްދަލުވުމުގައި ނެރުނު ބަޔާނާ، މި ބަޔާނާ މާ ބޮޑު ތަފާތުތަކެއް ނެތް ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ.
އިންޑޮނީޝިޔާގައި ބޭއްވި ޖީ20ގެ ބައްދަލުވުމުގައި އެމެރިކާއާއި އެ ޤައުމުގެ ވާގިވެރިން މަސައްކަތް ކޮށްފައި ވަނީ ރަޝިޔާއާ ދެކޮޅަށް އިތުރު ޤައުމުތައް ތެދު ކުރާށެވެ. އޭޕެކްގެ ބައްދަލުވުމާއި ޖީ20ގެ ބައްދަލުވުމުގައި ވެސް ރަޝިޔާގެ ރައީސް ވްލަޑިމިޔަރ ޕުޓިން ބައިވެރިވެ ވަޑައިގަންނަވާފައެއް ނުވެއެވެ. އޭނާގެ ބަދަލުގައި ބާލީއަށް ވަޑައިގެންނެވީ ރަޝިޔާގެ ޚާރިޖީ ވަޒީރެވެ. އަދި އިންޑޮނީޝިޔާއަށް ވަޑައިގަތީ ބޮޑުވަޒީރުގެ ނައިބެވެ.