މަސްތުވާތަކެތީގެ އޮޕަރޭޝަންގައި ހައްޔަރުކުރި ފުލުސް މީހާއާމެދު ޢަމަލުކުރާނީ އެފަދަ މައްސަލަތަކުގައި ޢަމަލުކުރާ އުސޫލުންކަމުގެ ޔަޤީންކަން ފުލުހުން ދެއްވައިފިއެވެ.
ފުލުހުން ހިންގި މަސްތުވާތަކެތީގެ އޮޕަރޭޝަނުގައި ވަނީ ފުލުހުންގެ ޑްރަގް އެންފޯސްމަންޓް ޑިޕާޓްމަންޓްގައި މަސައްކަތްކުރާ ފުލުހެއް ހައްޔަރުކޮށްފައެވެ. މިކަމާއި ގުޅިގެން ފުލުހުން ވިދާޅުވީ ހައްޔަރުކުރި ފުލުސް މީހާގެ މައްޗަށް ތުޙުމަތުކުރާ ޖިނާޢީ މައްސަލަ އަދި އިދާރީ މައްސަލަވެސް ތަޙުޤީޤު ކުރަމުންދާކަމަށެވެ. ފުލުހުން ހިންގާ އޮޕަރޭޝަންތަކުގައި ހައްޔަރުކުރާ މީހަކީ ޑްރަގް އެންފޯސްމަންޓްގައި އުޅޭ މީހެއް ނަމަވެސް، އެއްވެސް އިސްތިސްނާއެއް ނެތި އެމީހަކާމެދު ފިޔަވަޅު އަޅާނެކަމަށް ފުލުހުން ވިދާޅުވިއެވެ. އަދި އެއީ ޑްރަގް އެންފޯސްމަންޓްގެ ބެލުމުގެދަށަށް ގެންނަ މަސްތުވާތަކެތިި ބަލަހައްޓާ ޓީމްގެ ފުލުހެއް ނަމަވެސް، ޑީއީޑީގެ ބެލުމުގެ ދަށަށް ގެނެވޭ މަސްތުވާތަކެތި ބެލެހެއްޓުމުގައި ޢަމަލުކުރާ އުސޫލު އޮންނަ ގޮތުން، އެތަކެތި ނަހަމަ ގޮތުގައި ބޭނުންކުރުމުގެ އެއްވެސް ފުރުޞަތެއް ފުލުހަކަށް ނޯންނާނެކަމުގެ ޔަގީންކަން ފުލުހުން ވަނީ ދެއްވާފައެވެ.
މާލޭ ސަރައްދުގައި ހުކުރު ދުވަހު ފުލުހުން ކުރިއަށްގެންދިޔަ ޑްރަގް އޮޕަރޭޝަނެއްގައި 12 މީހުން ހައްޔަރުކޮށްފައިވެއެވެ. އެމީހުންގެ މައްޗަށް ކުރަނީ މަސްތުވާތަކެތި ބޭނުންކުރުމާ، ގެންގުޅުމުގެ ތުޙުމަތެވެ.
ހައްޔަރުކުރި މީހުންގެ ތެރޭގައި ހިމެނެނީ 4އަންހެނުންނާ 8 ފިރިހެނުންނެވެ. އެއީ 23 އަހަރާ 38 އަހަރާއި ދެމެދުގެ މީހުންނެވެ.
އެމީހުން ހައްޔަރުކޮށް ބަންދަށް މުއްދަތު ޖެހުމަށް ކޯޓަށް ޙާޒިރުކުރުމުން އެކި މީހުންނަށް ވަނީ އެކި މުއްދަތު ޖަހާފައެވެ. އެގޮތުން ބައެއް މީހުންގެ ބަންދަށް އެއް މަސްދުވަސްވެސް ޖަހާފައިވެއެވެ.