ވަޒީފާއަށާއި ފަތުރުވެރިންގެ ގޮތުގައި ރާއްޖެއަށް ބިދޭސީން ގެންނަ ފަރާތްތަކުން، ރާއްޖޭގެ އިސްލާމީ ޝިޢާރާއި ޤާނޫނުތަކާއި ޤަވާއިދުތަކާ އެއްގޮތަށް ޢަމަލު ކުރުމަށް ބިދޭސީންނަށް އިރުޝާދު ދިނުމަށް އިސްލާމިކް މިނިސްޓްރީން އިލްތިމާސްކޮށްފިއެވެ.
ދިވެހިރާއްޖޭގައި އެހެން ދީންތަކުގެ ޝިޢާރު ފާޅުކުރުމާއިގުޅޭ ގޮތުން އިސްލާމިކް މިނިސްޓްރީން އާއްމުކުރި ސަރކިއުލާއެއްގައިވަނީ ސިޓީ ކައުންސިލްތަކާ އަތޮޅު ކައުންސިލްތަކާއި ރަށު ކައުންސިލްތަކުން މިކަންކަމަށް ޚާއްސަ ސަމާލުކަމެއް ދިނުމަށާއި، މިފަދަ މައްސަލަތަކުގައި ފިޔަވަޅުއަޅަންޖެހޭ ހާލަތުގައި ފިޔަވަޅު އަޅަމުން ގެންދިއުމަށްވަނީ އަންގަވާފައެވެ.
ދިވެހިރާއްޖެއަކީ ގިނަ ޢަދަދަކަށް ބިދޭސީން މަސައްކަތް ކުރަމުންދާ އަދި، ފަތުރުވެރިންގެ ގޮތުގައިވެސް ގިނަ ޢަދަދެއްގެ ބޭރުމީހުން ކޮންމެ ދުވަހަކުވެސް ޒިޔާރަތްކުރާ ޤައުމެކެވެ. އެހެންކަމުން ދިވެހި ރައްޔިތުންގެ ދީނީ އެއްބައިވަންތަކަން ޙިމާޔަތްކުރުމާބެހޭ ޤާނޫނުގެ ޤަވާއިދުތަކަށް ފުރިހަމައަށް އިޙުތިރާމުކުރުމަށް، ފަތުރުވެރިންނަށް އިރުޝާދު ދިނުމަށް އިސްލާމިކް މިނިސްޓްރީގެ ސަރކިއުލާގައި ވަނީ އަންގާފައެވެ.
ދިވެހި ރައްޔިތުންގެ ދީނީ އެއްބައިވަންތަކަން ޙިމާޔަތްކުރުމާބެހޭ ޤާނޫނުގެ ޤަވާއިދުގައި ވާގޮތުން، ދިވެހިރާއްޖޭގައި ދިރިއުޅޭ ޣައިރު މުސްލިމުންނާއި، ދިވެހިރާއްޖެއަށް ޒިޔާރަތްކުރާ ޣައިރު މުސްލިމުން ފާޅުކަންބޮޑު ގޮތެއްގައި އެމީހުންގެ ދީނީ ޝިޢާރު ފާޅުކުރުމާއި، ޢާންމު ތަންތާނގައި ޖަމާޢަތް ހަދައިގެން އެފަދަ ދީނީ ޙަރަކާތްތައް ހިންގުމާއި، އެފަދަ އެއްވެސް ޙަރަކާތެއްގައި ދިވެއްސަކު ބައިވެރިކުރުމަކީ މަނާކަމެކެވެ. އަދި ރާއްޖޭގެ އެއްވެސް ޢާއްމު ތަނެއްގައި އިސްލާމްދީން ފިޔަވައި އެހެން އެއްވެސް ދީނެއްގެ އަޅުކަމާ ގުޅޭ އެއްވެސް ކަމެއް ހިންގުމަކީ ކަނޑައެޅިގެން މަނާ ކަމެކެވެ. އަދި މީހުން ދިރިއުޅޭ ރަށްރަށުގައި އުޅޭއިރު، ދިވެހިރާއްޖޭގައި ޓޫރިސްޓް ގެސްޓް ހައުސް ހިންގުމާއި ބެހޭ ޤަވާއިދާ އެއްގޮތަށް، އާއްމު އިޖްތިމާޢީ މިންގަނޑަށް ފެތޭ ފަދަ ހެދުމެއްގައި އުޅުމަށް ފަތުރުވެރިންނާ ބިދޭސީ މަސައްކަތްތެރިންނަށް އިރުޝާދު ދިނުމަށްވެސް އިސްލާމިކް މިނިސްޓްރީން ވަނީ އަންގާފައެވެ.
ދާދިފަހުން ރާއްޖޭގެ ރަށެއްގައި މަޝްރޫއެއް ފެށުމުގައި އެހެން ދީނެއްގެ ޝިޢާރެއް ފާޅުކުރިކުރުން ކުށްވެރިކޮށް، އެ މައްސަލަ ބެލުމަށް އިސްލާމިކް މިނިސްޓްރީންވަނީ ފުލުހުންނަށްވެސް ހުށައަޅާފައިވެއެވެ. މިޢަމަލު ހިންގާފައިވަނީ، ރާއްޖޭގައި އެ މަސައްކަތް ކުރާ ބޭރުގެ ކުންފުނީގެ މުވައްޒަފުންނެވެ.