މޯލްޑިވްސް މީޑިއާ ކައުންސިލްގެ "ނޫސްވެރިކަމުގެ އެވޯޑް 2021"ގެ އެންމެ މޮޅު ނޫސްވެރިޔާގެ އެވޯޑް ދައުރު ނޫހުގެ އެސިސްޓެންޓް އެޑިޓަރ އާމިނަތު ޝިފްލީން، ހާސިލްކޮށްފިއެވެ. އެމްއެމްސީގެ ނޫސްވެރިކަމުގެ އެވޯޑަކީ، އެންމެ ދިގުމުއްދަތަކަށް މީޑިއާގެ ދާއިރާއިން ރާއްޖޭގައި ދެމުން އައިސްފައިވާ އެވޯޑެވެ. މިއީ މި އެވޯޑް ދިން 11ވަނަ އަހަރެވެ.
އެމްއެމްސީގެ ނޫސްވެރިކަމުގެ އެވޯޑަކީ ޚަބަރާއި މަޢުލޫމާތު ގެނެސްދިނުމުގައި ނޫސްވެރިން ކުރާ މަސައްކަތުގެ އަގު ވަޒަންކޮށް ހިތްވަރުދިނުމަށް މޯލްޑިވްސް މީޑިއާ ކައުންސިލުންދޭ އެވޯޑެކެވެ.
ނޫސްވެރިކަމުގެ އެވޯޑް މިއަހަރު 2 ކެޓަގަރީއަކުން 12 ދާއިރާއަކަށް ދިނުމަށް ހުޅުވާލިއެވެ. ނަމަވެސް މީގެތެރެއިން 5 ދާއިރާއަކުން އެކަށީގެންވާ ހުޅައެޅުންތައް ނުލިބުމުގެ ސަބަބުން، އެ ދާއިރާތަކުން އެވޯޑް ދީފައެއް ނުވެއެވެ.
މިދިޔަ އަހަރުގެ ނޫސްވެރިކަމުގެ އެވޯޑް އެކި ދާއިރާތަކުން 11 ނޫސްވެރިއަކު ހާސިލްކޮށްފައިވެއެވެ. މީގެތެރާއި އިޖްތިމާޢީ، ސިޔާސީ، ކުޅިވަރު އަދި ވިޝުއަލްގެ އެކި ދާއިރާތައްވެސް ހިމެނެއެވެ.
އެވޯޑް ލިބުނު ފަރާތްތަކާ ދާއިރާތައް:
އެންމެ މޮޅު ނޫސްވެރިޔާ، އާމިނަތު ޝިފްލީން - ދައުރު ނޫސް
އެންމެ އުންމީދީ ނޫސްވެރިޔާ، އާލިމް އަބްދުއްލަތީފް - މިހާރު ނޫސް
ދެމެހެއްޓެނިވި ތަރައްޤީއާއި އިޖުތިމާއީ ދާއިރާ، މުޙައްމަދު ހަމްދޫން - މިހާރު ނޫސް
ސިޔާސީ ދާއިރާ، ފަޒީނާ އަޙުމަދު - މިހާރު ނޫސް
ޝަރުޢީ އަދި ޤާނޫނީ ދާއިރާ، ޝަފްނާ ހުސައިން - ދައުރު ނޫސް
ވިޔަފާރިއާއި އިޤްތިޞާދީ ދާއިރާ، އަޙުމަދު ނާއިފް - ދައުރު ނޫސް
ކުޅިވަރުގެ ދާއިރާ، އައްޒާމް އަލިފުޅު - އަދަދު ނޫސް
ވިީޑިއޯ ޖަރނަލިޒަމް ދާއިރާ، އަޙުމަދު އަލީ - ވަގުތު ނޫސް
ފީޗަރ ލިއުމުގެ ދާއިރާ، ނަޖާހު މަސްޢޫދު - މިހާރު ނޫސް
ފޮޓޯގްރަފީ ދާއިރާ، ނިޝާން އަލީ - މިހާރު ނޫސް
ގްރެފިކްސްއާއި އިލަސްޓްރޭޝަން، އަބްދުﷲ ޝަފީޢު - އަދަދު ނޫސް
އެންމެ މޮޅު ނޫސްވެރިޔާ ހޮވާފައިވަނީ، އާއްމުންގެ ވޯޓު ހިމެނޭގޮތަށެވެ. އެގޮތުން އެސްއެމްއެސްއަށް ހުޅުވާލި ފުރުޞަތުގައި 59000އަށްވުރެ ގިނަ އެސްއެމްއެސް ލިބުނު ކަމަށް އެމްއެމްސީން ވިދާޅުވެއެވެ. އަދި އިންޓަވިއުއާއި ތަޢުލީމީ ފެންވަރާއި ތަޖުރިބާ އަދި ޖަޖުންގެ ޕެނަލްއިން މާކްސް ދީފައިވެއެވެ. މިއެވޯޑަށް 5 ނޫސްވެރިއަކު ނޮމިނޭޓްވިއެވެ.
2021 ވަނަ އަހަރުގެ ނޫސްވެރިކަމުގެ އެންމެ ގިނަ އެވޯޑް ހާސިލްކުރީ މިހާރު ނޫހުންނެވެ.
މިފަހަރުގެ ގިނަ އެވޯޑްތައް ލިބިފައިވަނީ ނޫސް މަޖައްލާ ކެޓަގަރީންނެވެ. ބްރޮޑްކާސްޓިން ދާއިރާގެ ހުށައެޅުންތައް މަދުކަމާއި، އަދި އެ ދާއިރާއިން ހުށައެޅި ހުށައެޅުންތަކުގެ ތެރޭގައިވެސް، އެކަށީގެންވާ ހުށައެޅުންތައް ލިބިފައި ނުވާކަން މީޑިއާ ކައުންސިލުން ފާހަގަކުރެއެވެ.