ޓެރަރިޒަމާ ދެކޮޅަށް ސަލާމަތީ ބާރުތަކުން ފަށާފައިވާ އޮޕަރޭޝަންގައި 13މީހަކު ހައްޔަރުކޮށްފިއެވެ. އިއްޔެ ފެށި މި އޮޕަރޭޝަނަކީ ދިވެހި ފުލުހުންގެ ޚިދުމަތާއި ޤައުމީ ދިފާޢީ ބާރުން ގުޅިގެން ކުރިއަށްގެންދާ އޮޕަރޭޝަނެކެވެ.
ކައުންޓަރ ޓެރަރިޒަމްގެ މި އޮޕަރޭޝަން އައްޑޫ ސިޓީއާއި މާލޭގައި އެއްގަމާ ކަނޑުގެ ސަރަޙައްދުގައި އަންނަނީ ހިންގަމުންނެވެ.
ފުލުހުން ވިދާޅުވީ މިއޮޕަރޭޝަންގައި މިހާތަނަށް ހައްޔަރުކުރި 13މީހުންގެ ތެރޭގައި ހިމެނެނީ، އައްޑޫ ސިޓީން ހައްޔަރުކުރި 9 މީހުންނާއި މާލެ ސަރަޙައްދުން ހައްޔަރުކުރި 2 މީހުންނާއި ކ.ގުރައިދޫން ހައްޔަރުކުރި 2 މީހުން ކަމަށެވެ. ހައްޔަރުކުރި އެންމެންނަކީވެސް ފިރިހެނުންނެވެ.
މި އޮޕަރޭޝަން އަދިވެސް ކުރިއަށްދާ ކަމަށް ފުލުހުން ވިދާޅުވެއެވެ. ފުލުހުން ވިދާޅުވީ މި އޮޕަރޭޝަނުގެ ތަފްސީލް ހާމަކުރެވެން އޮތް މިންވަރަކުން ހާމަކުރަމުން ދާނެކަމަށެވެ.
ޓެރަރިޒަމާއި ދެކޮޅަށް އޮޕަރޭޝަނެއް ފަށާފައިވާއިރު ޓެރަރިޒަމާ ދެކޮޅަށް ރާއްޖޭގައި މުހިންމު ބޮޑެތި މަސައްކަތްތަކެއް ދަނީ ކުރަމުންނެވެ. އެގޮތުން ހިންގި އެކި އޮޕަރޭޝަންތަކުގައި މީގެ ކުރިންވެސް މީހުން ހައްޔަރުކޮށްފައިވެއެވެ.
މިމަސައްކަތުގައި އެންމެ މުހިންމު އެއް ކަމެއްގެ ގޮތުގައި، މިދިޔަ އަހަރުވަނީ ޓެރަރިޒަމްގެ ޤާނޫނަށް އިސްލާހު ގެނެސްފައެެވެ. ޤާނޫނަށް ގެނައި ބަދަލުތަކުގައި ޤާނޫނު ތަންފީޒުކުރާ އިދާރާތަކަށް ވަނީ މުހިއްމު ބާރުތަކެއް ދީފައެވެ.