މަސްތުވާތަކެތި ބޭނުންކޮށް ގެންގުޅުމުގެ ތުޙުމަތުގައި ހައްޔަރުކުރި 12 މީހުންގެ ބަންދަށް މުއްދަތު އިތުރުކޮށްފިއެވެ.
މަސްތުވާތަކެއްޗާއި ދެކޮޅަށް މާލެ ސަރަހައްދުގައި ފުލުހުން ހިންގި އޮޕަރޭޝަނުގައި 12 މީހުން ހައްޔަރުކޮށްފައިވަނީ އިއްޔެ އެވެ. މި އޮޕަރޭޝަނަކީ މަސްތުވާތަކެއްޗާ ދެކޮޅަށް ފުލުހުން، އާއްމު އުސޫލުން ކުރަމުން އަންނަ މަސައްކަތުގެ ދަށުން ހިންގި އޮޕަރޭޝަނެއްކަމަށް ފުލުހުން ވިދާޅުވެއެވެ.
މި އޮޕަރޭޝަންގައި މާލެ އަދި ހުޅުމާލެއިން މީހުން ވަނީ ހައްޔަރުކޮށްފައެވެ. ފުލުހުންގެ ބެލުމުގެ ދަށަށް ގެންދިޔަ މީހުންގެ ތެރޭގައި ހިމެނެނީ 4 އަންހެނުންނާ 8 ފިރިހެނުންނެވެ. އެއީ 23 އަހަރާ 38 އަހަރާއި ދެމެދުގެ މީހުންނެވެ. އެމީހުން ހައްޔަރުކޮށް ބަންދަށް މުއްދަތު ޖެހުމަށް ކޯޓަށް ޙާޒިރުކުރުމުން އެކި މީހުންނަށް ވަނީ އެކި މުއްދަތު ޖަހާފައެވެ. އެގޮތުން ބައެއް މީހުންގެ ބަންދަށް އެއް މަސްދުވަސްވެސް ޖަހާފައިވެއެވެ.
މަސްތުވާތަކެތި ބޭނުންކުރުމާއި، މަސްތުވާތަކެތި ގެންގުޅުމުގެ ތުޙުމަތު މި މީހުންގެ މައްޗަށް ފުލުހުން ކުރެއެވެ.
މި މައްސަލަ ފުލުހުން އަންނަނީ އިތުރަށް ތަހުޤީޤުކުރަމުންނެވެ.