ބުދަދުވަހުގެރޭ އަލިފާނުގެ ޙާދިސާ ހިނގި މ.ނިރުފެހިގޭގެ އިމާރާތް ތަޅާލާ، އެ ތަން ސާފުކުރުމުގެ މަސައްކަތް ހައުސިން މިނިސްޓްރީން ފަށައިފިއެވެ.
މި މަސައްކަތް ކުރަނީ މިނިސްޓްރީގެ ޕަބްލިކް ވަރކްސް ސަރވިސަސް ޑިޕަރޓްމަންޓުންނެވެ.
އަމިފާނުގެ ހާދިސާގައި ނިރުފެހިގޭގެެ ބޮޑު ބައެއް ވަނީ އަނދާ އަޅިއަށްވެފައެވެ. ފެންނަންހުރީ، ގޭގެ ކޮންކްރީޓް ތަނބުތަކާ ޝީޓްތައް އެކަންޏެވެ. ގޭގެ އެތެރެ ހަދާފައިވަނީ ލަކުޑިންނެވެ. އެހެންކަމުން އެ ގެ ވަނީ ބޭނުން ނުކުރެވޭވަރަށް އަނދާފައެވެ.
މިނިސްޓްރީން އެ ގެ ތަލާލުމުގެ މަސައްކަތް ކުރަމުންދަނީ، އަލިފާނުގެ ޙާދިސާއެއް ހިނގާފައިވާ ތަނަކަށްވުމާއެކު އެ އިމާތާރުގެ ސަބަބުން އިތުރު ގެއްލުންތަކެއް ވެދާނެތީއެވެ.
ނިރުވެފެހި ގެއަކީ 2 ފަންގިފިލާއަށް ހަދާފައިވާ ގެއެކެވެ. ގޭގެ އެންމެ ތިރީގައި ހުރީ ގަރާޖެކެވެ. އަދި މައްޗަށް ހުރި ދެ ފަންގިފިލާ ބޭނުންކުރަމުން އައީ، ބިދޭސީން ދިރިއުޅުމަށެވެ. އިމާރާތް ހުރީ ޕަރޓިޝަން ޖަހާ، ކުދި ގޭބިސީތަކަކަށް ހަދާ، ކުއްޔަށް ދީފައެވެ.
އެ ގޭގައި 30 އަށްވުރެ ގިނަ ބިދޭސީން ދިރިއުޅެމުން އައިކަމަަށް ކަމާގުޅުންހުރި ފަރާތްތަކުން ލަފާކުރެއެވެ.
ނިރުފެހިގޭ އަލިފާނުގެ ޙާދިސާގައި 10 މީހުން ވަނީ ނިޔާވެފައެވެ. އޭގެތެރޭގައި ހިމެނެނީ އިންޑިއާގެ 7 މީހުންނާ، ބަންގްލަދޭޝްގެ 2 މީހުންނެވެ. އެއީ 5 ފިރިހެނުންނާ 4 އަންހެނުންނެވެ. އަނެއް މީހާއަކީ ކާކުކަން ދެނެ ނުގަނެވޭކަމަށް ފުލުހުން މަޢުލޫމާތުދެއެވެ.
އަލިފާނުގެ ޙާދިސާގައި، ނިރުފެހިގެއާ އިންވެގެން ހުރި ގޭގޭގެ އިމާރާތްތަކުގެ ސްޓްރަކްޗަރއަށް ގެންލުން ލިބުނުތޯވެސް، ޕްލޭނިން މިނިސްޓްރީން ބަލާނެއެވެ. އަދި އަލިފާނުގެ ޙާދިސާގެ ސަބަބުން ގެއްލުން ލިބިފައިވާ ވެހިކަލްތައްވެސް އެ ސަރަހައްދުން ނަގާނެއެވެ.