ށ.މައުނގޫދޫގައި ދިން ޙަމަލާގައި ބޮޑެތި ޒަޚަމްތައް ލިބުނު މީހާގެ އޮޕަރޭޝަން، ކުޅުދުއްފުށީ ހޮސްޕިޓަލުން ކާމިޔާބުކަމާއެކު ކޮށްފިއެވެ. ހަމަލާގައި މިމީހާގެ ގޮހޮރަށް ބޮޑެތި ގެއްލުންތަކެއްވަނީ ލިބިފައެވެ.
އަންގާރަދުވަހުގެ ރޭ ދަންވަރު 12:40ހާއިރި ހިނގި ހާދިސާގައި ބޮޑެތި ޒަޚަމްތަކެއް ލިބުނު މީހާ ކުޅުދުއްފުށީ ހޮސްޕިޓަލަށް އިތުރުފަރުވާއަށް ގެންދިޔައީ ބުދަ ދުވަހުގެ ފަތިހުއެވެ. އެއީ 31 އަހަރުގެ ދިވެހި ފިރިހެނެކެވެ. ކުޅުދުއްފުށީ ހޮސްޕިޓަލަށް އެމީހާ އިތުރު ފަރުވާއަށް ގެންދިޔައީ، ވާތު އަރިކައްޓަށް ލިބުނު ޒަޚަމްތަކާ ގުޅިގެންނެވެ.
ސީޓީ ސްކޭން، އަދި މީހާގެ ބަނޑަށް ކެމެރާ ލައްވައިގެން އިތުރަށް ބެލިބެލުމުން، ފަލަ ގޮހޮރަށް ބޮޑެތި ގެއްލުންތަކެއް ލިބިފައިވާތީ އިތުރު އޮޕަރޭޝަނެއްވަނީ ކޮށްފައެވެ. 3 ގަޑިއިރުގެ މިއޮޕަރޭޝަންގައި އެމީހާގެ ގޮހޮރަށް ގެއްލުން ލިބުނު ބައި ބުރިކޮށްލާފައިވާ ކަމަށް އެ ހޮސްޕިޓަލުން ބުނެއެވެ. އޮޕަރޭޝަނަށް ފަހު އެމީހާ އޮތީ އައިސީޔޫގައެވެ. ދެ މަސް ފަހުން، އިތުރު އޮޕަރޭޝަނެއް ކުރުމަށްވެސް ވަނީ އިރުޝާދު ދީފައެވެ. އޮޕަރޭޝަނަށް ފަހު ބަލިމީހާގެ ޙާލު ރަނގަޅުކަމަށާއި، އޮޕަރޭޝަން ކާމިޔާބުކަމަށްވެސް އެ ހޮސްޕިޓަލުން ބުނެއެވެ.
އޮޕަރޭޝަން ކުރިއަށްގެންދިޔައީ އައިޖީއެމްއެޗްގެ ދެ ޑޮކްޓަރުންނާއި ކުޅުދުއްފުށީ ހޮސްޕިޓަލްގެ ޑޮކްޓަރުން ހިމެނޭހެން، ޖުމްލަ 4 ޑޮކްޓަރުންގެ ޓީމަކުންނެވެ.
ށ.މާއުނގޫދޫގައި ތޫނު އެއްޗަކުން ޙަމަލާދިން މައްސަލައިގައި 2 މީހަކު ޒަޚަމްކޮށްލާފައިވެއެވެ. މީގެ ތެރެއިން 25 އަހަރުގެ ފިރިހެން މީހާއަށް މާއުނގޫދޫ ސިއްޙީ މަރުކަޒުގައިވަނީ ފަރުވާ ދީފައެވެ.
މި މައްސަލަ ފުލުހުން ދަނީ ތަޙުޤީގުކުރަމުންނެވެ. މައްސަލައާ ގުޅިގެން 31 އަހަރުގެ މީހަކު ވަނީ ހައްޔަރުކޮށްފައެވެ.