ރޭ މާލޭގައި ހިނގި ނުރައްކާތެރި އަލިފާނުގެ ހާދިސާގައި މަރުވި މީހުންގެ އަދަދު 10އަށް އަރައިފިއެވެ.
ރޭ ދަންވަރު 00:30 ކަންހާއިރު އަލިފާނުގެ ހާދިސާ ހިނގާފައިވަނީ މާފަންނު އިސްކަންދަރު މަގާއި ކޯރުކެނޑި މަގު ގުޅޭ ހިސާނުގައި ހުންނަ މ. ސެންރޯސް ކިޔާ ގެއެއްގެ އެންމެ ތިރީގައި ހުރި ގަރާޖެއްގައެވެ.
އެމްއެންޑީއެފްގެ ފަޔަރ އެންޑް ރެސްކިއު ސަރވިސަސްގެ ކާނަލް ކޮމަޑާންޓް އިބްރާހިމް ރަޝީދު ވިދާޅުވީ މިއީ ރާއްޖޭގައި މިހާތަނަށް ހިނގި އަލިފާނުގެ އެންމެ ހިތާމަވެރި ހާދިސާކަމަށެވެ. އަދި މިހާދިސާގައި މިހާތަނަށް 10 މީހުން މަރުވެފައިވާކަމަށްވެސް އޭނާ ވިދާޅުވިއެވެ.
ކާނަލް އިބްރާހިމް ރަޝީދު ވިދާޅުވީ މިހާތަނަށް އައިރު މި ހާދިސާ ހިނގަން މެދުވެރިވި ސަބަބެއް ހޯދިފައިނުވާކަމަށެވެ. އަދި އެ ތަނަކީ ބަންގްލަދޭޝް، ސްރީލަންކާ އަދި އިންޑިއާ ރައްޔިތުން އުޅޭ ތަނެއްކަމަށްވެސް އެމްއެންޑީއެފްއިން ވިދާޅުވެއެވެ.
އަލިފާނުގެ ހާދިސާއާ ގުޅިގެން އެސަރަހައްދުގައި އުޅޭ 30 ވަރަކަށް ދިވެހިން ރައްކާތެރި ހިސާބުތަކަށް ބަދަލުކޮށްފައިވާކަމަށްވެސް ކަމާއިބެހޭ ފަރާތްތަކުން ވިދާޅުވެއެވެ.