ރޭގެ އަލިފާނުގެ ހާދިސާގައި ގެދޮރު ދޫކޮށްލަން ޖެހުނު މީހުން ވަގުތީ ހިޔާތަކަށްް ބަދަލުކުރަން ފަށައިފިއެވެ.
ރޭ ދަންވަރު 00:30 ހާއިރު އަލިފާނުގެ ހާދިސާ ހިނގާފައިވަނީ މާފަންނު އިސްކަންދަރު މަގާއި ކޯރުކެނޑި މަގު ގުޅޭ ހިސާބުގައި ހުންނަ މ. ސެންރޯސްގޭގެ އެންމެ ތިރީގައި ހުރި ގަރާޖުގައެވެ. ރޭ ހިނގި އަލިފާނުގެ ހާދިސާގައި މަރުވި މީހުންގެ އަދަދު މިހާރު ވަނީ 9 އަރާފައެވެ. އަދި އެކަކަށް އައިޖީއެމްއެޗްގައި ފަރުވާދެމުން އަންނައިރު އޭނާގެ ހާލު ވަރަށް ސީރިއަސްކަމަށް އެ ހޮސްޕިޓަލާއި ހަވާލާދީ ފުލުހުން ވަނީ ވިދާޅުވެފައެވެ.
ނޭޝަނަލް ޑިޒާސްޓަރ މެނޭޖްމަންޓުން ވިދާޅުވީ ރޭގެ އަލިފާނުގެ ހާދިސާގައި އެ އިދާރާގެ ބެލުމުގެ ދަށަށް 18 ބިދޭސީއަކާއި 13 ދިވެއްސަކު ގެނެސްފައިވާކަމަށެވެ. މީގެތެރެއިން ގިނަ ދުވެހިން އެމީހުންގެ އާއިލީ މީހުން ކައިރިޔަށް މިހާރު ބަދަލުވެފައިވާ އެންޑީއެމުން ވިދާޅުވެއެވެ. އަދި ބާކީ ތިބި މީހުން ގެސްޓު ހައުސްތަކަށް ބަދަލުކުރުމުގެ މަސައްކަތް ފަށާފައިވާކަމަށްވެސް އެންޑީއެމުން ވިދާޅުވެއެވެ.
ރޭގެ އަލިފާނުގެ ހާދިސާ ހިންގާފައިވަނީ ވެހިކަލް މަރާމާތު ކުރާ ގަރާޖެއްގައެވެ. މި ގަރާޖު ހުންނަ ގޭގެ ފުރަތަމަ ފަންގިފިލާގައި ދިރިއުޅެނީ ހުސް ބިދޭންސީކަމަށް އެނގިފައިވެއެވެ. އަދި މި ހާދިސާގައި މިހާތަނަށް މަރުވި އެންމެނަކީވެސް ހުސް ބިދޭސީންކަމަށް މައުލޫމާތު ލިބިފައިވެއެވެ.