ދުނިޔޭގެ އެންމެ ބޮޑު ޖަންގަލި ކަމުގައިވާ އެމެޒޯން ހިމާޔަތް ކުރަން އަހަރަކު 200 މިލިޔަން ޑޮލަރު ދޭނެ ކަމަށް ކޮލޮމްބިޔާގެ ރައީސް ގުސްޓާވޯ ޕެތްރޯ އިޢުލާނު ކުރައްވައިފިއެވެ. މިޞްރުގެ ރިސޯޓު ރަށެއް ކަމުގައިވާ ޝަރްމުއްޝައިޚްގައި މިހާރު ކުރިއަށްދާ އ.ދ.ގެ މޫސުމީ ބަދަލުތަކާ ގުޅޭ މަހާސިންތާ (ކޮޕް27)ގައި ވާހަކަފުޅު ދައްކަވަމުން ޕެތްރޯ ވަނީ މީގެ ކުރިން ބާއްވާފައިވާ ކޮޕްގެ ހުރިހާ ބައްދަލުވުމެއް ނާކާމިޔާބުވެފައިވާ ކަމުގައެވެ.
މި މޭރުމުން ވާހަކަފުޅު ދައްކަވަމުން ޕެތްރޯ ވިދާޅުވީ، މީގެ ކުރިން ބާއްވާފައިވާ ކޮޕްގެ ބައްދަލުވުންތަކުގައި ބައިވެރިވި ސިޔާސީ ލީޑަރުން ފޭލުވެފައިވާ ކަމުގައެވެ. އަދި، މޫސުމަށް އަންނަމުންދާ ނޭދެވޭ ބަދަލުތައް ހުއްޓުވަން އެއްވެސް ދެމެހެއްޓެނިވި މަސައްކަތްތަކެއް ކޮށްފައި ނުވާ ކަމުގައެވެ.
"ތެލާއި ބޯޓުދެއްޔާއި ގޭސް އަންދާ މިންވަރު ދުވަހެއް ދުވަހަކަށް ވަނީ އިތުރު. އަދި، މި ކަމަށް ހައްލުތަކެއް ހޯދަން މަސައްކަތް ކުރަންވި ދަނޑިވަޅުގައި ވެސް އަޅުގަނޑުމެންނަށް މުހިންމީ ހަނގުރާމަ ކުރުމާއި ސިޔާސީ ބާރުވެރިކަން އިތުރު ކުރުމާއި އިންސާނުއްޔަތު ކަމުގެ މައްޗަށް ގަދަވުން. އިންސާނުން ހިމާޔަތް ކުރުމެއް ނޫން،" ކޮޕް27ގެ ބައްދަލުވުމުގައި ތަޤުރީރު ކުރައްވަމުން ޕެތްރޯ ވިދާޅުވިއެވެ.
ޕެތްރޯ ވިދާޅުވީ މޫސުމީ ބަދަލުތަކުގެ ސަބަބުން ދުނިޔެ ސަލާމަތް ކުރުމަށް ގިނަގުނަ މަސައްކަތްތަކެއް ކުރަން ޖެހިފައިވާ ކަމުގައެވެ. މީގެ ތެރޭގައި އެމެޒަން ޖަންގަލި ހިމާޔަތް ކުރުން ބޮޑު ދައުރެއް އަދާ ކުރާ ކަމަށާއި، އެ ޖަންގަލި ހިމާޔަތް ކުރުމަށް ކޮލޮމްބިޔާއިން ކުރިއަށް އޮތް 20 އަހަރުގެ ތެރޭގައި ކޮންމެ އަހަރަކު 200 މިލިޔަން ޑޮލަރު ހޭދަ ކުރާނެ ކަމުގައެވެ. "އަޅުގަނޑުމެން މި ތިބީ އެހެން ޤައުމުތަކުން ހަދާ ގޮތެއް ބަލަން،" ޕެތްރޯ ވިދާޅުވިއެވެ.
ކޮޕް27ގެ ބައްދަލުވުމުގައި ޤައުމުތަކާއި ބައިނަލްއަޤުވާމީ ޖަމުޢިއްޔާތަކުގެ ލީޑަރުން ގެންދަވަނީ ތަޤުރީރު ކުރައްވަމުންނެވެ. މި ބައްދަލުވުމުގައި ތަޤުރީރު ކުރައްވަމުން އ.ދ.ގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ވަނީ ހިތްދަތި މެސެޖުތަކެއް ދެއްވާފައެވެ.
ގުތެރޭޝް ވިދާޅުވީ މޫސުމީ ބަދަލުތަކާ ގުޅޭ ގޮތުން ދުނިޔެއަށް މި ވަގުތު ކުރިމަތިލާން ޖެހިފައި އޮތީ އަމިއްލައަށް މަރުވުން ފަދަ ހާލަތަކާ ކަމުގައެވެ. އަދި، އިންސާނުންނަށް އޮތީ ދެ ގޮތެއް ކަމަށާއި، އެއް ގޮތަކީ އެއްބަޔަކު އަނެއްބަޔަކަށް އެއްބާރުލުން ދިނުން ކަމަށާއި، ދެވަނަ ގޮތަކީ ނެތިދިޔުން ކަމުގައި ގުތެރޭޝް އިންޒާރު ކުރެއްވިއެވެ.
މި ކަމަށް އޮތް އެންމެ މުހިންމު ހައްލަކީ އިޔާދަކުރަނިތި ހަކަތަ ބޭނުން ކުރުން އިތުރު ކުރުން ކަމުގައި ގުތެރޭޝް ވިދާޅުވިއެވެ. އަދި، މި ދާއިރާއިން އެމެރިކާއާއި ޗައިނާއިން އިސްނަގައިގެން މަސައްކަތް ކުރުމަށް އޭނާ ގޮވައިލެއްވިއެވެ. އެ ދެ ޤައުމަކީ ދުނިޔޭގެ އެންމެ ބޮޑު ދެ އިޤުތިޞާދެވެ. އަދި، ޖައްވަށް އެންމެ ގިނަ މިންވަރަކަށް ވިހަ ގޭސްތައް ބޭރު ކުރަނީ ވެސް އެ ދެ ޤައުމުންނެވެ.
ނަމަވެސް، އެ ދެ ޤައުމުގެ ލީޑަރުން ކޮޕްގެ ބައްދަލުވުމުގައި އަދި ފެންނާކަށް ނެތެވެ. ޗައިނާގެ ރައީސް ޝީ ޖިންޕިންގް މި އަހަރުގެ ކޮޕްގައި ބައިވެރިވެ ވަޑައިނުގަންނަވާނެއެވެ. އަދި، އެމެރިކާގެ ރައީސް ޖޯ ބައިޑަން ކޮޕް ސަމިޓަށް ވަޑައިގަންނަވާނީ އޭނާގެ ރިޔާސީ ދައުރުގެ މެދުތެރެއިން ބާއްވާ އާންމު އިންތިޚާބުގެ ކަންކަން ނިމުމުންނެވެ.
ޝަރްމުއްޝައިޚްގައި ކުރިއަށްދާ ކޮޕްގެ 27ވަނަ ބައްދަލުވުމުގައި 100އަށްވުރެ ގިނަ ޤައުމުގެ ލީޑަރުން ބައިވެރިވެ ވަޑައިގަންނަވައެވެ. މި ބައްދަލުވުމުން އެންމެ ހަރުކޮށް އިވެމުންދާ އަޑަކީ، މޫސުމީ ބަދަލުތައް ހުއްޓުވަން މުއްސަނދި ޤައުމުތަކުން މަސައްކަތް ނުކުރާ ކަމުގެ ޝަކުވާއެވެ. މޫސުމަށް އަންނަމުންދާ ނޭދެވޭ ބަދަލުތަކުގެ ޒިންމާ އެ ޤައުމުތަކުން ނަގަންޖެހޭނެ ކަމެވެ. އަދި، މޫސުމީ ބަދަލުތަކުގެ ނުރައްކަލާ ކުރިމަތިވެފައިވާ ކުދި، ބިންތިރި އަދި ފަގީރު ޤައުމުތަކަށް އެހީތެރިވުމަށް ގޮވައިލާ އަޑެވެ.