ޓެންޒެނިޔާގައި މަތިންދާބޯޓެއް ވެއްޓުނު ހާދިސާގައި މަރުވި މީހުންގެ އަދަދު 19އަށް އަރައިފިއެވެ. ވެއްޓިފައި ވަނީ ޕްރިސިޝަން އެއަރ ކުންފުނީގެ މަތިންދާބޯޓެކެވެ. ބޯޓު ވެއްޓިފައި ވަނީ އެ ޤައުމުގެ ހުޅަނގުއުތުރުގައިވާ ބަކުބޯ ސިޓީގެ ވައިގެ ބަނދަރުގައި ޖައްސަން އުޅުމުގެ ތެރޭގައި ވައިގެ ބަނދަރާ 100 މީޓަރު ދުރުގައި އޮންނަ ފެންގަނޑެއް ކަމުގައިވާ ލޭކް ވިކްޓޯރިޔާއަށެވެ.
މި ހާދިސާ ހިނގި ވަގުތު ބޯޓުގައި 43 މީހުން ތިބި ކަމަށާއި، އެއީ 39 ފަސިންޖަރުންނާއި ދެ ޕައިލެޓުންނާއި ދެ ކެބިން ކްރޫ ކަމުގައި ޓެންޒެނިޔާގެ އޮފިޝަލުން ބުނެއެވެ. ބޯޓު ވެއްޓިފައި ވަނީ މޫސުން ގޯސްވުމުގެ ސަބަބުން ކަމަށް ބެލެވޭ ކަމުގައި ވެސް އޮފިޝަލުން ބުނެއެވެ. މި ހާދިސާގައި ފެންގަނޑަށް ގެއްލިފައިވާ ކަމަށް ބެލެވޭ މީހުން ހޯދުމުގެ މަސައްކަތް މިހާރު ދަނީ ކުރަމުންނެވެ.
އެ މަސައްކަތުގައި އެ ސަރަޙައްދުގެ މަސްވެރިން ވެސް ދަނީ ހަރަކާތްތެރި ވަމުންނެވެ. ބޯޓުގައި ދަތުރު ކުރި މީހުންގެ ތެރެއިން 26 މީހަކު ސަލާމަތްކޮށް، މިހާރު ހޮސްޕިޓަލުގައި ފަރުވާ ދެމުންދާ ކަމުގައި ޓެންޒެނިޔާގެ ފުލުހުން ބުނެއެވެ.
މި ހާދިސާ ހިނގުމާ ގުޅިގެން ޓެންޒެނިޔާގެ ބޮޑުވަޒީރު ޤާސިމް މަޖަލީވާ ވަނީ ބަކުބޯއަށް ވަޑައިގަންނަވައި، ގެއްލުނު މީހުން ހޯދުމުގެ މަސައްކަތް ކުރިއަށްދާ ގޮތް ބައްލަވައިލައްވާފައެވެ. އަދި، މި ހާދިސާގެ ފުރިހަމަ ތަހުޤީޤެއް ހިންގާނެ ކަމުގައި އޭނާ ވިދާޅުވިއެވެ. ޕްރިސިޝަން އެއަރގެ އިތުރުން ޓެންޒެނިޔާގެ ވައިގު އުދުހުންތަކާ ބެހޭ އިދާރާގެ ފަންނީ މާހިރުންގެ ޓީމުތައް ވެސް މިހާރު ވަނީ ބަކުބޯއަށް ގޮސްފައެވެ.
ޓެންޒެނިޔާގެ ރައީސް ސަމިޔާ ސުލުހޫ ޙަސަން ވެސް ވަނީ ބޯޓު ވެއްޓުނު ހާދިސާއާ ގުޅިގެން މަރުވި މީހުންގެ ޢާއިލާތަކަށް ތަޢުޒިޔާ ދަންނަވާފައެވެ. އޭ.ޓީ.އާރް-42 މަރުކާގެ މި ބޯޓު ވެއްޓިފައި ވަނީ ވެރިރަށް ދާރުއްސަލާމުން ފުރައިގެން ބަކުބޯއަށް ދަތުރު ކުރަމުން ދަނިކޮށެވެ.
ޕްރިސިޝަން އެއަރއަކީ ޓެންޒެނިޔާގައި ހިންގާ އެންމެ ބޮޑު އަމިއްލަ އެއަރލައިނެވެ. 1993ވަނަ އަހަރު އުފައްދާފައިވާ އެ ކުންފުންޏަކީ ކެންޔާ އެއަރވޭޒްގެ ހިއްސާ އޮންނަ ކުންފުންޏެކެވެ. އެތެރޭގެ އުދުހުންތަކުގެ އިތުރުން އެ ސަރަޙައްދުގެ އެހެން ޤައުމުތަކަށް ވެސް ޕްރިސިޝަން އެއަރއިން ދަތުރު ކުރެއެވެ.
މީގެ ފަސް އަހަރު ކުރިން ވެސް ޓެންޒެނިޔާގައި މިފަދަ ހާދިސާއެއް ހިނގާފައިވެއެވެ. ކޯސްޓަލް އޭވިއޭޝަންގެ މަތިންދާބޯޓެއް ވެއްޓި ހިނގި ހާދިސާގައި 11 މީހުން މަރުވިއެވެ.
2019ވަނަ އަހަރުގެ މާރިޗު މަހު އިތިއޯޕިޔަން އެއަރލައިންސްގެ މަތިންދާބޯޓެއް ވެސް ވެއްޓިފައިވެއެވެ. އަޑިސް އަބަބާއިން ފުރައިގެން ކެންޔާގެ ނައިރޯބީއަށް ދަތުރު ކުރަނިކޮށް އެ ބޯޓު ވެއްޓުނު ހާދިސާގައި 157 މީހުން މަރުވިއެވެ. 2007ވަނަ އަހަރު އައިވަރީ ކޯސްޓުގެ އަބީޖާނުން ފުރައިގެން ނައިރޯބީއަށް ދަތުރު ކުރި ކެންޔާ އެއަރވޭޒްގެ މަތިންދާބޯޓެއް ވެއްޓުނު ހާދިސާގައި 114 މީހުން މަރުވިއެވެ.
2000ވަނަ އަހަރު ކެންޔާ އެއަރލައިންސްގެ އެހެން މަތިންދާބޯޓެއް ވެއްޓި 169 މީހުން މަރުވިއެވެ. އެ ހާދިސާ ހިނގާފައި ވަނީ އަބީޖާނުން ފުރައިގެން ނައިރޯބީއަށް ދަތުރު ކުރި މަތިންދާބޯޓެއް އެޓްލާންޓިކް ކަނޑަށް ވެއްޓިގެންނެވެ. އެ ހާދިސާގައި ބޯޓުން ދަތުރު ކުރި މީހުންގެ ތެރެއިން ސަލާމަތްވީ އެންމެ 10 މީހުންނެވެ.