އ.ދ.ގެ މޫސުމީ ބަދަލުތަކާ ބެހޭ މަހާސިންތާ ނުވަތަ 27ވަނަ ކޮންފަރެންސް އޮފް ދަ ޕާޓީސް (ކޮޕް27)ގެ ބައްދަލުވުން މިޞްރުގެ ރިސޯޓު ރަށެއް ކަމުގައިވާ ޝަރްމުއްޝައިޚްގައި ފެށިއްޖެއެވެ. މިއީ، ބައިނަލްއަޤުވާމީ މައިދާނުގައި ބާއްވާ މޫސުމީ ބަދަލުތަކާ ގުޅޭ އެންމެ ބޮޑު މަހާސިންތާއެވެ. މި މަހާސިންތާގެ އެންމެ މަތީ ފަންތީގެ ބައްދަލުވުންތަކާއި މަޝްވަރާތަކުގައި 120 ޤައުމެއްގެ އިސްވެރިން ބައިވެރިވެ ވަޑައިގަންނަވާނެއެވެ.
ނަމަވެސް، ދުނިޔޭގެ އެންމެ ބޮޑު ދެ އިޤުތިޞާދު ކަމުގައިވާ އެމެރިކާއާއި ޗައިނާގެ ރައީސުން މި ބައްދަލުވުމަށް ދެއްވާ އަހަންމިއްޔަތު ކަން ކުޑައެވެ. އެ ދެ ޤައުމަކީ ޖައްވަށް އެންމެ ގިނައިން ވިހަ ގޭސްތައް ބޭރު ކުރާ ދެ ޤައުމެވެ.
ސިނާޢީ ތަރައްޤީގެ ނަމުގައި އެ ދެ ޤައުމުން ޖައްވަށް ބޭރުކޮށްފައިވާ ވިހަ ގޭސްތަކާ އެކު ދެ ޤައުމުގެ އިޤްތިޞާދު ވަނީ އެތައް ގުނައަކަށް ކުރިއަރާފައެވެ. ނަމަވެސް، އެ ކަމުގެ ބުރައާއި ނުރައްކާތެރިކަމާ ކުރިމަތިލާން ޖެހިފައި ވަނީ ކުދި އަދި ފަގީރު ޤައުމުތަކާއި ބިންތިރި ޤައުމުތަކެވެ. ފާއިތުވި މަދު މަސްތަކުގެ ތަފާސްހިސާބުތަކަށް ބަލައިލި ނަމަވެސް، ފެނިގެން ދަނީ މޫސުމީ ބަދަލުތަކާ ގުޅިގެން ކުރިމަތިވި ކާރިސާތަކުގައި ގެއްލިގެން ދިޔަ އެތަކެއް ހާސް ފުރާނައެއްގެ އަދަދުތަކެވެ.
މޫސުމީ ބަދަލުތަކާ ގުޅިގެން ދުނިޔޭގެ އެކި ކަންކޮޅުތަކުގައި ކުރިމަތިލާން ޖެހިފައިވާ ތޫފާންތަކާއި ޤުދުރަތީ ކާރިސާތަކުގެ ނުރައްކާތެރިކަން ވަނީ އެތައް ގުނައެއް އިތުރުވެފައެވެ. ފާއިތުވި މަދު މަސްތަކުގެ ތެރޭގައި ވެސް މޫސުމީ ކާރިސާތަކުގައި އެތަކެއް މިލިޔަން ބަޔަކަށް ވަނީ އެ މީހުންގެ އަމިއްލަ ގެދޮރުން ނުކުންނަން ޖެހިފައެވެ. އަދި، ފަގީރު އެތަކެއް ޤައުމަކަށް ވަނީ ބިލިޔަން ޑޮލަރުގެ ގެއްލުމާ ކުރިމަތިލާން ޖެހިފައެވެ.
މި އަހަރުގެ ތެރޭގައި ދުނިޔޭގެ އެކި ކަންކޮޅުތަކަށް ކުރިމަތިވެފައިވާ އެންމެ ބޮޑެތި މޫސުމީ ކާރިސާތަކުގެ ތެރޭގައި ޕާކިސްތާނާއި ނައިޖީރިޔާގައި ފެން ބޮޑުވުމާއި، އެމެރިކާގެ ހުޅަނގު ބިތުގެ ސަރަޙައްދުތައް ހަނަފަސްވުމާއި، ކެރީބިޔަންގެ ސަރަޙައްދުތަކުގެ ޤައުމުތަކަށް ކުރިމަތިވެފައިވާ ނުރައްކާތެރި ތޫފާންތައް ފާހަގަ ކޮށްލެވެއެވެ. އަދި، ތިން ބައްރެއްގައި ފިނިހޫނުމިން އިންތިހާއަށް މައްޗަށް ދިޔުން ފާހަގަ ކުރެވެއެވެ.
ކަން މިހެން އޮތް ނަމަވެސް، މިޞްރުގެ ޝަރްމުއްޝައިޚުން ފެނިގެން ނުދާނެ އެއް މޫނަކީ ޗައިނާގެ ރައީސް ޝީ ޖިންޕިންގްގެ މޫނެވެ. އެމެރިކާގެ ރައީސް ޖޯ ބައިޑަން ވެސް މި މަހާސިންތާއަށް އެހާ ބޮޑު އަހަންމިއްޔަތު ކަމެއް ދޭ މަންޒަރެއް ނުފެނެވެ.
އެމެރިކާއިން މިހާރު ތައްޔާރު ވަމުން ދަނީ އެ ޤައުމުގެ ރިޔާސީ ދައުރުގެ މެދުތެރޭގައި ބާއްވާ އިންތިޚާބަށެވެ. ބައިޑަން މިޞްރަށް ވަޑައިގަންނަވާނީ ނޮވެންބަރު 8ވަނަ ދުވަހު ބާއްވާ އިންތިޚާބަށް ފަހުގައި ކަމަށް ވައިޓް ހައުސްއިން ވަނީ ބުނެފައެވެ.
ދުނިޔޭގެ ފިނިހޫނުމިން 1.5 ޑިގްރީ ސެލްސިޔެސްގައި ހިފެހެއްޓުމަށް ދުނިޔެއިން ކުރަން ޖެހޭ މަސައްކަތްތައް ބުރަވެފައި ބޮޑެވެ. އެންމެ މުހިންމު ކަމަކީ، ޖައްވަށް ބޭރު ކުރާ ގިހާ ގޭސްތަކުގެ މިންވަރު ދަށް ކުރުމެވެ. އަމާޒު ހިފާފައި 2030ވަނަ އަހަރުގެ ކުރިން އެ އަދަދު 45 އިންސައްތަ ދަށް ކުރުމަށެވެ. ނަމަވެސް، މިހާރު ކަން ހިނގަމުންދާ ގޮތަށް ބަލާއިރު، އެއީ ހާސިލު ކުރެވޭނެ ލަނޑުދަނޑިއެއް ކަމާ މެދު މިހާރު ދަނީ ސުވާލު އުފެދެމުންނެވެ.
ސައިންސްވެރިން އެންމެ ފަހުން ހަދާފައިވާ ދިރާސާތަކުން ފެންނަނީ ވަރަށް ބިރުވެރި މަންޒަރެކެވެ. ޖައްވަށް ބޭރުކުރާ ކާބަންގެ މިންވަރު މި ޤަރުނު ނިމުމުގެ ކުރިން 10 އިންސައްތަ އިތުރުވާނެ ކަމަށް ސައިންސްވެރިންގެ ހިސާބުތަކުން ދައްކައެވެ. އަދި އެ ގޮތަށް ކަން ވެއްޖެ ނަމަ، ދުނިޔޭގެ ފިނިހޫނުމިން 2.8 ޑިގްރީ ސެލްސިއެސްއިން އުފުލޭނެއެވެ.
މި އަހަރުގެ ކޮޕް މަހާސިންތާއިން ޝީގެ މޫނު ނުފެނުނު ނަމަވެސް، އަދި ބައިޑަން ވަޑައިގެންނެވުން ލަސްވި ނަމަވެސް، ވަރަށް މުހިންމު އެއް ބައިވެރިއެއްގެ މި ބައްދަލުވުމުން ފެނިގެންދާނެއެވެ. އެއީ، ބްރެޒިލްގެ އިންތިޚާބީ ރައީސް ލުއީޒް އިނާސިޔޯ ލޫލާ ޑެ ސިލްވާއެވެ.
ބްރެޒިލްގެ ރިޔާސީ އިންތިޚާބު ލޫލާ ކާމިޔާބު ކުރައްވާފައި ވަނީ، ތިމާވެށި ހިމާޔަތް ކުރުމަށް ގިނަ މަސައްކަތްތަކެއް ކުރައްވާނެ ކަމުގެ ވަޢުދާ އެކުގައެވެ. ޚާއްޞަކޮށް، ދުނިޔޭގެ އެންމެ ބޮޑު ޖަންގަލި ކަމުގައިވާ އެމެޒަން ޖަންގަލި ހިމާޔަތް ކުރަން ގިނަގުނަ މަސައްކަތްތަކެއް ކުރައްވާނެ ކަމުގައި ލޫލާ ވިދާޅުވެއެވެ.