އީރާނުގެ އުފައްދާފައިވާ ޑްރޯންތަކެއް ރަޝިޔާއަށް ފޯރުކޮށްދީފައިވާ ކަމަށް އީރާނުން ފުރަތަމަ ފަހަރަށް އެއްބަސްވެއްޖެއެވެ. ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައިގައި އީރާނުގައި އުފައްދާފައިވާ ޑްރޯން ބޭނުން ކޮށްފައިވާ ކަމުގައި ޔޫކްރެއިނާއި ހުޅަނގުން ދަނީ ތުހުމަތު ކުރަމުންނެވެ.
އީރާނުން ކުރިން ބުނެފައި ވަނީ ރަޝިޔާއަށް ޑްރޯން ވިއްކާފައި ނުވާނެ ކަމުގައެވެ. އަދި، ރަޝިޔާއިން ވެސް ވަނީ، ޔޫކްރެއިނުގެ އަމާޒުތަކަށް ހަމަލާދިނުމަށް އީރާނުގެ ޑްރޯންތައް ބޭނުން ކޮށްފައި ނުވާނެ ކަމަށް ބުނެފައެވެ. ނަމަވެސް، ރަޝިޔާއަށް ޑްރޯން ވިއްކާފައިވާ ކަމަށް އީރާނުން މި ވަނީ ފުރަތަމަ ފަހަރަށް އެއްބަސްވެފައެވެ.
މި ކަމާ ގުޅޭ ގޮތުން އީރާނުގެ ޚާރިޖީ ވަޒީރު ޙުސައިން ޢަބްދުاللهހިއަން ވިދާޅުވީ، އެ ޤައުމުން ރަޝިޔާއަށް ޑްރޯން ވިއްކާފައި ވަނީ ރަޝިޔާގެ ފައުޖުތަކުން ޔޫކްރެއިނަށް އަރައި ހަނގުރާމަ ފެށުމުގެ ކުރިން ކަމުގައެވެ. އަދި، ރަޝިޔާއަށް ވިއްކާފައި ވަނީ ވަރަށް މަދު އަދަދެއްގެ ޑްރޯންތަކެއް ކަމުގައި ވެސް އޭނާ ވިދާޅުވިއެވެ.
މި ކަމާ ގުޅޭ ގޮތުން އޭނާ ވަނީ ޔޫކްރެއިނުގެ ރައީސް ވޮލޮޑޮމީރް ޒެލެންސްކީއާ ފޯނުން ގުޅުއްވައި ވާހަކަފުޅު ދައްކަވާފައެވެ. އަދި، ޔޫކްރެއިނުގެ އަމާޒުތަކަށް ހަމަލާ ދިނުމަށް ރަޝިޔާއިން އީރާނުގެ ޑްރޯންތައް ބޭނުން ކޮށްފައިވާ ކަމުގެ ހެކި ފޯރުކޮށްދިނުމަށް އޭނާ ވަނީ ޒެލެންސްކީގެ ކިބައިން އެދިވަޑައިގަންނަވާފައެވެ.
ޔޫކްރެއިނުން ބުނީ އެ ޤައުމުގެ ރައްޔިތުންނަށް އަމާޒުކޮށް ހަމަލާދިނުމަށް ރަޝިޔާއިން 400އަށްވުރެ ގިނަ ޑްރޯން ބޭނުން ކޮށްފައިވާ ކަމުގައެވެ. އަދި، އިތުރު 2,000 ޑްރޯން ގަތުމަށް ރަޝިޔާއިން އޯޑަރު ޖަހާފައިވާ ކަމުގައި ވެސް ޔޫކްރެއިނުން ތުހުމަތު ކުރެއެވެ.
މީގެ އިތުރުން، އީރާނުން ރަޝިޔާއަށް މިސައިލް ވިއްކަން އުޅޭ ކަމުގައި އެމެރިކާގެ ނޫސްތަކުން ދަނީ ތުހުމަތު ކުރަމުންނެވެ. އެމެރިކާގެ ނޫހެއް ކަމުގައިވާ ދަ ވޮޝިންގްޓަން ޕޯސްޓްއިން އެ ކަން ހާމަކޮށްފައި ވަނީ އޮކްޓޫބަރު 16ވަނަ ދުވަހު ޝާއިޢު ކުރި ރިޕޯޓެއްގައެވެ.
ނަމަވެސް، ޢަބްދުاللهހިއަން ވަނީ އެ ތުހުމަތުތައް ދޮގު ކުރައްވާފައެވެ. އަދި، އީރާނުން ރަޝިޔާއަށް މިސައިލް ވިއްކަން އުޅޭ ކަމުގެ ޚަބަރަކީ އެއްވެސް ހަޤީޤަތެއް ނެތް ވާހަކެއް ކަމުގައި ބުނެފައެވެ. އީރާނުން ރަޝިޔާއަށް ޑްރޯން ވިއްކާފައިވާ ކަމަށް ތުހުމަތުތައް ވިލާތުގެ އިއްތިހާދު (އީ.ޔޫ)އާއި އިނގިރޭސި ވިލާތުން ވަނީ އީރާނާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތައް އިތުރަށް ހަރުކަށި ކޮށްފައެވެ.