އިލެކްޓްރިކް ވެހިކަލްގެ އާ މޮޑެލްއެއް ޖަޕާނުގެ އޮޓޯ ވެހިކަލް އުފައްދާ ކުންފުނި ހޮންޑާއިން ޗައިނާގައި ތައާރަފްކޮށްފިއެވެ.
ކުރިއަށް އޮތް ފަސް އަހަރު ތެރޭގައި ޕާޓްނަރު ޖީއޭސީ އާއި ޑޮންގްފެންގް މޮޓޯއާ ގުޅިގެން "އީ:އެން ސީރީޒް"ގެ ނަމުގައި އާ ބްރޭންޑެއްގެ ދަށުން އިލެކްޓްރިކް ވެހިކަލްގެ މޮޑެލްތައް ތައާރަފް ކުރަން ރާވާފައިވާކަމަށް މިދިޔަ އަހަރު ހޮންޑާއިން ވަނީ ބުނެފައެވެ.
ހޮންޑާގެ ފުރަތަމަ މޮޑެލް ޗައިނާގައި ވިއްކަން ފެށީ މިދިޔަ އޭޕްރީލް މަހުއެވެ.
ހަމައެކަނި ހޮންޑާއަށް އުފެއްދޭނެ ތަފާތު އިލެކްޓްރިކް ސާމާނު މާކެޓަށް ނެރެގެން ހޮންޑާއިން އަންނަނީ ޗައިނާގައި އިލެކްޓްރިކް ބްރޭންޑަކަށް ބަދަލުވަމުންކަމަށް ހޮންޑާގެ ސީއީއޯ ތޮޝިހިރޯ މައިބް ނެރުނު ބަޔާނެއްގައި ވަނީ ބުނެފައެވެ.
އިލެކްޓްރިކް ވެހިކަލްގެ 30 މޮޑެލް ތައާރަފްކޮށް 2030 ގެ ނިޔަލަށް އަހަރަކު 2 މިލިއަން އިލްކެޓްރިކް ވެހިކަލް އުފައްދަން ހޮންޑާއިން ވަނީ އަމާޒު ހިފާފައެވެ.
2030 އަށްފަހު ޗައިނާގައި އުފައްދާނީ ހަމައެކަނި އިލެކްޓްރިކް ވެހިކަލް ކަމަށްވެސް ހޮންޑާއިން މިދިޔަ އަހަރު ވަނީ ބުނެފައެވެ. މީގެތެރޭގައި ބެޓްރީ އިލެކްޓްރިކް، ހައިޑްރިޖަން ފިއުލް ސެލް ނުވަތަ ޕެޓްރޯލް އިލެކްޓްރިކް އޮޓޯމޮބައިލް ހިމެނެއެވެ.
ހޮންޑާގެ އިތުރުން އޮޓޯ ވެހިކަލް އުފައްދާ ޖަޕާނުގެ މައިގަނޑު ކުންފުނިތައް ކަމަށްވާ ޓޮޔޯޓޯ މޮޓޯ ކޯ އަދި ނިސާން މޮޓޯ ކޯ އަށްވެސް އޮތް އެންމެ ބޮޑު ގޮންޖެހުމަކީ އިލެކްޓްރިކް ވެހިކަލް އުފައްދުމުގައި ކުރިއަރާފައިވާ ކުންފުނިތައް ކަމަށްވާ ޓެސްލާ ފަދަ ކުންފުނިތަކާއި އެއް ހަމަކޮށްލުން އުދަނގޫވުމެވެ.