އުތުރު ކޮރެޔާއިން އަނެއްކާ ވެސް ބެލިސްޓިކް މިސައިލް ޓެސްޓުތަކެއް ހަދާފައިވާ ކަމުގައި ދެކުނު ކޮރެޔާއިން ހާމަކޮށްފިއެވެ. އުތުރު ކޮރެޔާއިން މިސައިލް ޓެސްޓުތަކެއް ހަދާފައި މި ވަނީ، އުތުރު ކޮރެޔާއާއި އެމެރިކާ ގުޅިގެން ހިންގި ކަނޑުގެ ސިފައިންގެ ތަމްރީނުތަކަކާ ދިމާކޮށެވެ.
ދެކުނު ކޮރެޔާއިން ބުނީ ބެލިސްޓިކް މިސައިލްތައް އުދުއްސައިލާފައި ވަނީ އުތުރު ކޮރެޔާގެ އިރުމަތީ އައްސޭރިފަށުގައި އޮންނަ ދެ ރަށަކުން ކަމުގައެވެ. އަދި، މި ކަމާ ގުޅިގެން، އެ ސަރަޙައްދުގެ ކަންކަން ވަރަށް ގާތުން ބަލަމުންދާ ކަމުގައި ވެސް ދެކުނު ކޮރެޔާއިން ބުންޏެވެ.
ދެ މިސައިލް ވެސް 24 ކިލޯމީޓަރު މަތިން 230 ކިލޯމީޓަރުގެ ސަރަޙައްދަކަށް ދަތުރު ކޮށްފައިވާ ކަމުގައި ދެކުނު ކޮރެޔާއިން ބުނެއެވެ. އަދި، މި ޓެސްޓުތަކަކީ އ.ދ.ގެ ދަތިކުރުމުގެ ފިޔަވަޅުތަކާ ޚިލާފަށް އުތުރު ކޮރެޔާއިން ހިންގާފައިވާ އަމަލެއް ކަމުގައި ވެސް ދެކުނު ކޮރެޔާއިން ބުނެއެވެ.
ދެކުނު ކޮރެޔާއާއި އެމެރިކާއިން މިހާރު ދަނީ ވައިގެ ސިފައިން ތަމްރީނުތަކެއް ފެށުމަށް ވެސް ތައްޔާރު ވަމުންނެވެ. މި ތަމްރީނުތަކުގައި ދެ ޤައުމުގެ ވައިގެ ސިފައިން 200އަށްވުރެ ގިނަ އަސްކަރީ މަތިންދާބޯޓު ބައިވެރި ކުރާނެ ކަމުގައި ދެ ޤައުމުން ބުނެއެވެ.
އުތުރު ކޮރެޔާއިން އަނެއްކާ ވެސް މިސައިލް ޓެސްޓުތަކެއް ހެދުމާ ގުޅިގެން އެމެރިކާއިން ވަނީ މި ކަމާ ކަންބޮޑުވުން ފާޅު ކޮށްފައެވެ. އަދި، މި ފަދަ އަމަލުތަކުގެ ސަބަބުން ކޮރެޔާ ސަރަޙައްދުގެ ސަލާމަތާއި ރައްކާތެރި ކަމަށް ނުރައްކާވާ ކަމުގައި އެ ޤައުމުން ބުނެއެވެ.
އުތުރު ކޮރެޔާގެ ލީޑަރު ކިމް ޖޮންގް އުން ހުސްވި ސެޕްޓެންބަރު މަހުގެ ތެރޭގައި ވަނީ އުތުރު ކޮރެޔާއަކީ ނިއުކްލިޔަރ ބާރެއްގެ ގޮތުގައި ކަނޑައަޅުއްވާފައެވެ. އަދި، އެ ޤައުމުގެ ނިއުކްލިޔަރ ހަތަކަ އުފެއްދުމުގެ ޕުރޮގުރާމަށް ހުއްޓުމެއް ނުގެންނާނެ ކަމުގައި އޭނާ ވިދާޅުވިއެވެ. އެއާއެކު، އެ ޕުރޮގުރާމު ކޮންޓްރޯލް ކުރުމަށް ބައިނަލްއަޤުވާމީ މުޖުތަމަޢާ އެކު ކުރަމުން ދިޔަ މަޝްވަރާތަކަށް ވަނީ ހުރަސް އެޅިފައެވެ.
އުތުރު ކޮރެޔާއިން މި އަހަރުގެ ތެރޭގައި ރެކޯޑު އަދަދަކަށް މިސައިލް ޓެސްޓުތައް ހަދާފައިވެއެވެ. މިއީ، ނިއުކްލިޔަރ ބޮމެއް ޓެސްޓު ކުރުމަށް ކުރަމުންދާ ތައްޔާރީތަކެއްގެ ގޮތުގައި އެމެރިކާއާއި ދެކުނު ކޮރެޔާއިން ތުހުމަތު ކުރެއެވެ. އުތުރު ކޮރެޔާއިން އެންމެ ފަހުން ނިއުކްލިޔަރ ޓެސްޓެއް ހަދާފައި ވަނީ 2017ވަނަ އަހަރުއެވެ.