ލުބުނާނާއި ޔަހޫދީންގެ ދަޢުލަތް ކަމުގައިވާ އިސްރާޢީލާ ދެމެދު ކަނޑުގެ ސަރަޙައްދީ އިން ކަނޑައެޅުމުގައި އުފެދިފައިވާ ޚިޔާލު ތަފާތުވުންތައް ހައްލު ކޮށް، އެއްބަސްވުމެއްގައި ސޮއި ކޮށްފިއެވެ. މި އެއްބަސްވުމާ އެކު، ދެ ޤައުމަށް ވެސް ވަނީ ކަނޑުގެ ޤުދުރަތީ މުއްސަނދި ކަމުން ނަފާ ހޯދުމުގެ ފުރުޞަތު ފަހިގެން ގޮސްފައެވެ.
އެއްބަސްވުމުގައި ލުބުނާނުގެ ފަރާތުން ސޮއި ކުރެއްވީ ރައީސް މިޝެލް ޢާއޫނެވެ. އަދި، އިސްރާޢީލުގެ ފަރާތުން ސޮއި ކުރެއްވީ ބޮޑުވަޒީރު ޔައިރު ލަޕިދެވެ. ނަމަވެސް، އެއްބަސްވުމުގައި ސޮއި ކުރުން ކުރިއަށް ދިޔައީ ވަކިން ދެ ޤައުމުގައެވެ. މި އެއްބަސްވުން އެކުލަވައިލާފައި މި ވަނީ އެމެރިކާއިން މެދުވެރިއެއްގެ ދައުރު އަދާ ކޮށްގެންނެވެ.
"މިއީ ވަރަށް ތާރީޚީ އެއްބަސްވުމެއް. ދެ ޤައުމުން ވެސް މި ވަނީ އެއްބަސްވުމުގެ އެންމެ ފަހު މަރުހަލާ ކާމިޔާބުކޮށް، އެއްބަސްވުމުގައި ސޮއިކޮށް، އ.ދ.އަށް ލިޔެކިޔުންތައް ހަވާލު ކޮށްފައި،" މި ކަމާ ގުޅޭ ގޮތުން ވާހަކަފުޅު ދައްކަވަމުން އެމެރިކާގެ ރައީސް ޖޯ ބައިޑަން ވިދާޅުވިއެވެ.
ލުބުނާނާއި އިސްރާޢީލާ ދެމެދު ކަނޑުގެ ސަރަޙައްދީ އިމުގެ މައްސަލައިގައި ޚިޔާލު ތަފާތުވުން އުފެދިފައި ވަނީ ޤުރުދަރީ ގޭސް މުއްސަނދި ސަރަޙައްދަކާ މެދުއެވެ. އަދި، މި އެއްބަސްވުމާ އެކު ޤުދުރަތީ ގޭސް ސާފު ކުރުމުގެ މަސައްކަތް އިސްރާޢީލާއި ލުބުނާނަށް ވެސް ފެށޭނެއެވެ.
އެ ސަރަޙައްދުގައިވާ ޤަނާގެ ނަން ދީފައިވާ ގޭސް ވަޅުތަކުގެ ސިޔާދަތީ ބާރު ލިބިފައި ވަނީ ލުބުނާނަށެވެ. ނަމަވެސް، އެ ތަނުން ސާފު ކޮށްގެން ވިއްކާ ގޭހުން ލިބޭ އާމްދަނީން ބައެއް އިސްރާޢީލާ ހިއްސާ ކުރަން ޖެހޭނެއެވެ. އަދި، ކަރިޝްގެ ނަން ދީފައިވާ ގޭސް ވަޅުތަކުގެ ސިޔާދަތީ ބާރު މިހާރު ލިބިފައި ވަނީ ޔަހޫދީންނަށެވެ.
ލުބުނާނުގައި ހަރަކާތްތެރިވާ ބާރުގަދަ ހަތިޔާރު އެޅި ޖަމާޢަތެއް ކަމުގައިވާ ހިޒްބުاللهއިން ވެސް ވަނީ އެއްބަސްވުމަށް މަރުޙަބާ ކިޔާފައެވެ. އަދި، ކަނޑުގެ ސަރަޙައްދީ އިމުގެ މައްސަލައިގައި އިސްރާޢީލާ ދެކޮޅަށް އަޅާފައިވާ ފިޔަވަޅުތައް ހުއްޓައިލާނެ ކަމުގައި ބުނެފައެވެ. އެ ޖަމާޢަތުން ކުރިން ވަނީ، ޚިޔާލު ތަފާތުވެފައިވާ ކަނޑުގެ ސަރަޙައްދުގައި ހަރަކާތްތެރިވާ އިސްރާޢީލުގެ އުޅަނދުތަކަށް ހަމަލާދޭނެ ކަމުގެ އިންޒާރު ދީފައެވެ.
މި އެއްބަސްވުމުގެ ސަބަބުން އެންމެ ބޮޑު ފައިދާއެއް ކުރާނެ އެއް ބަޔަކީ އެމެރިކާއާއި ވިލާތުގެ އިއްތިހާދު (އީ.ޔޫ)ގެ ބާރުތަކެވެ. ރަޝިޔާއިން ޔޫކްރެއިނަށް އަރައި ފަށާފައިވާ ހަނގުރާމައާ ގުޅިގެން އީ.ޔޫ.ގެ ޤައުމުތައް މިހާރު ވަނީ ޤުދުރަތީ ގޭހަށް ޖެހިފައެވެ. ރަޝިޔާއާ ދެކޮޅަށް އީ.ޔޫ.އިން އަޅާފައިވާ ދަތި ކުރުމުގެ ފިޔަވަޅުތަކާ ގުޅިގެން އެ ޤައުމުން ވަނީ އީ.ޔޫ.ގެ ޤައުމުތަކަށް ގޭސް ފޯރުކޮށްދިނުމަށް މެދުކަނޑައިލާފައެވެ.