ވިލުންތެރި މުޖުތަމަޢުއެއް ބިނާކުރުމަށް ބާރުއަޅާ، މިނިސްޓްރީ އޮފް ޔޫތްއާއި ކަމާގުޅުންހުރި އިދާރާތައް ގުޅިގެން ކުރިއަށްގެންދާ ހަފްތާރެސްގެ 10ވަނަ ޕްރޮގްރާމް މުލަކަތޮޅުގައި ފަށައިފިއެވެ.
މި ޕްރޮގްރާމްގެ އެންމެ ބޮޑު ބޭނުމަކީ މުޖުތަމަޢުގެ ގުޅުން ބަދަހިކޮށް، އެކަކު އަނެކަކަށް އިޙުތިރާމްކުރާ އަޅާލާ މުޖުމަޢުއެއް ބިނާކުރުމެވެ. އަދި މުޖުތަމަޢުގައި ހުރި އިޖްތިމާޢީ އެކިއެކި މައްސަލަތައް ޙައްލުކުރުމަށް، ގުޅިގެން މަސައްކަތްކުރުމަށް ހޭލުންތެރިކުރުމެވެ.
މިފަހަރުގެ ޕްރޮގްރާމްގެ ސެޝަންތައް މުލަކަތޮޅު މުލި، މުލައް، ވޭވަށް، ދިއްގަރު، މަޑުއްވަރި، ކޮޅުފުށި އަދި ނާލާފުށީގައި ކުރިއަށްދާނެއެވެ.
ހޭންތެރިކުރުމުގެ ސެޝަންތައް، ރަށްރަށުގެ އެކި ކޮމިއުނިޓީތަކަށް ބަހާލައިގެން ކުރިއަށްގެންދާނެކަމށް ޔޫތު މިނިސްޓްރީން ވިދާޅުވިއެވެ. އެގޮތުން ސްކޫލް ދަރިވަރުންނާ، މުދައްރިސުންނާއި ބެލެނިވެރިންނަށް ކުރިއަށްގެންދާ ސެޝަންތަކާއި، ޒުވާނުން އަދި ސަރުކާރުގެ މުއައްސަސާތަކަށް ސެޝަންތައްވެސް ކުރިއަށްގެންދާނެއެވެ.
ސެޝަންތައް ނަގައިދެނީ ޔޫތް މިނިސްޓްރީ، ނެޝަނަލް ސެންޓަރ ފޮރ ކައުންޓަރ ޓެރަރިޒަމް، އިސްލާމިކް މިނިސްޓްރީ، އެޑިއުކޭޝަން މިނިސްޓްރީ، އިސްލާމީ ޔުނިވަރސިޓީ އަދި މޯލްޑިވްސް ރެޑްކްރަސެންޓުންނެވެ.
މި ޕްރޮގްރާމްގެތެރެއިން މާދަމާ މ.މުލީގައި ހަފްތާރެސް އާއިލީ ހަވީރުވެސް އޮންނާނެއެވެ. މި ހަވީރުގައި ޔޫތް މަރކެޓް، މިއުޒިކް، ކުޅިވަރު އަދި އެހެނިހެން ހަރަކާތްތައް އޮންނާނެކަމަށް ޔޫތު މިނިސްޓްރީން ވިދާޅުވިއެވެ.
މ.އަތޮޅުގައި ކުރިއަށްދާ ހަފްތާރެސް ޕްރޮގްރާމްގެ ސެޝަންތައް މިމަހުގެ 30ވަނަ ދުވަހާ ހަމައަށް ކުރިއަށްދާނެއެވެ.