އިތިއޯޕިޔާގެ ދެ އަހަރުވީ ދާޚިލީ ހަނގުރާމައަށް ނިމުމެއް ގެނައުމަށް ޞުލްޙައިގެ މަޝްވަރާތައް ފަށައިފިއެވެ. މި މަޝްވަރާތައް ކުރިއަށް ދަނީ އިތިއޯޕިޔާގެ ސަރުކާރާއި އެ ޤައުމުގެ އިރުމަތީގައިވާ ޓިގްރޭ ސަރަޙައްދު ކޮންޓްރޯލް ކުރަމުންދާ ހަނގުރާމަވެރި ޖަމާޢަތްތަކުގެ އިސްވެރިންނާ ދެމެދުގައެވެ.
ދެކުނު އެފްރިކާގައި ފަށައިގެން ކުރިއަށްދާ މި މަޝްވަރާތަކުގައި މެދުވެރިއެއްގެ ދައުރު އަދާ ކުރަމުން ދަނީ އެފްރިކަން ޔޫނިއަން (އޭ.ޔޫ)އިންނެވެ. މިއީ، އިތިއޯޕިޔާގެ ސަރުކާރާއި ޓިގްރޭ ހަނގުރާމަވެރިންނާ ދެމެދު ޞުލްޙަ ޤާއިމު ކުރުމަށް ރަސްމީ ހައިސިއްޔަތެއްގައި މަޝްވަރާތައް ބާއްވާ ފުރަތަމަ ފަހަރެވެ.
އިތިއޯޕިޔާއަކީ އެފްރިކާ ބައްރުގެ ދެވަނައަށް އެންމެ އާބާދީ ބޮޑު ޤައުމެވެ. އެ ޤައުމުގެ އުތުރުގައިވާ ޓިގްރޭ ސަރަޙައްދުގައި ފަށާފައިވާ ދާޚިލީ ހަނގުރާމައަށް ދެ އަހަރު ފުރިފައި ވާއިރު، މި ހަނގުރާމައިގައި މިހާތަނަށް އެތަކެއް ހާސް ބަޔަކު ވަނީ މަރުވެފައެވެ. އަދި، އެތަކެއް މިލިޔަން ބަޔަކު ވަނީ ގެދޮރުނެތިފައެވެ. އަދި، މި ހަނގުރާމައާ ގުޅިގެން އިތިއޯޕިޔާގެ ރައްޔިތުންނަށް ވަނީ ބަނޑުހައިހޫނުކަމާ ކުރިމަތިލާން ޖެހިފައެވެ.
އިތިއޯޕިޔާގެ ސަރުކާރާއި ޓިގްރޭގެ ހަނގުރާމަވެރިންނާ ދެމެދު ޞުލްޙައިގެ މަޝްވަރާތައް ފަށާފައި މި ވަނީ، ސަރުކާރު ފައުޖުތަކުން ހަނގުރާމައިގެ މައިދާނުގައި ބޮޑެތި ކުރިއެރުންތަކެއް ހޯދަމުންދާ ދަނޑިވަޅެއްގައެވެ. ފާއިތުވި ހަފުތާތަކުގެ ތެރޭގައި ސަރުކާރު ސިފައިން ވަނީ ޓިގްރޭ ސަރަޙައްދުގެ ބައެއް ރަށްތައް ހިފާފައެވެ.
ނަމަވެސް، ދެ ފަރާތުގެ ދެމެދުގައި ޞުލްޙައިގެ މަޝްވަރާތައް ފެށުމުން ޤައުމުތަކުން ވަނީ އެ ކަމަށް މަރުޙަބާ ކިޔާފައެވެ. މީގެ ތެރޭގައި އެފްރިކާގެ ޤައުމުތަކުގެ އިތުރުން އެމެރިކާއާއި ވިލާތުގެ އިއްތިހާދު (އީ.ޔޫ)ގެ ޤައުމުތައް ހިމެނެއެވެ. އަދި، އެމެރިކާގެ އިތުރުން އ.ދ.އިން ވެސް ދަނީ މަޝްވަރާތަކުގައި އޮބްޒަރވަރުންގެ ގޮތުގައި ބައިވެރިވަމުންނެވެ.
"ޕްރިޓޯރިޔާގައި ކުރިއަށްދާ ޞުލްޙައިގެ މަޝްވަރާތައް އަޅުގަނޑުމެން މި ދަނީ ވަރަށް ގާތުން ބަލަމުން. އުންމީދަކީ މަޝްވަރާތައް ކާމިޔާބުވުން. މި ކަމަށް ހައްލެއް ހޯދޭނެ ހަމައެކަނި މަގަކީ މަޝްވަރާ ކުރުން،" އ.ދ.ގެ ރެފިޔުޖީންނާ ބެހޭ އިދާރާގެ އިސްވެރިޔާ ފިލީޕޯ ގްރޭންޑީ ވިދާޅުވިއެވެ.
އެމެރިކާއިން ވެސް ވަނީ މަޝްވަރާތައް ކާމިޔާބު ކުރުމަށް ދެ ފަރާތަށް ގޮވައިލާފައެވެ. އެ ޤައުމުގެ ޚާރިޖީ ވަޒީރު އެންތަނީ ބްލިންކެން ވިދާޅުވީ މަޝްވަރާތަކާ އެކު ދެ ފަރާތުގެ ދެމެދުގައި ހަމަލާ ބަދަލު ކުރުންތައް ވަގުތުން ހުއްޓައިލާނެ ކަމަށް އުންމީދު ކުރައްވާ ކަމުގައެވެ.
ޓިގްރޭގެ ހަނގުރާމަވެރި ޖަމާޢަތްތައް ތަމްސީލު ކުރާ ޓިގްރޭ ޕީޕަލްސް ލިބެރޭޝަން ފްރަންޓް (ޓީ.ޕީ.އެލް.އެފް)އަކީ 2018ވަނަ އަހަރާ ޖެހެންދެން އިތިއޯޕިޔާގެ ގުޅިފައިވާ ސަރުކާރުގައި އިސް ދައުރެއް އަދާ ކުރަމުން ދިޔަ ޕާޓީއެކެވެ. ނަމަވެސް، ސަރުކާރުގައި އޮތް ޕާޓީގެ ބާރު ކެނޑުމާ ގުޅިގެން ޓިގްރޭގެ ހަނގުރާމަވެރި ޖަމާޢަތްތަކުން ވަނީ ޓިގްރޭ ސަރަޙައްދުގައި އެ ޖަމާޢަތްތަކުގެ ބާރާއި ނުފޫޒު އިތުރަށް ވަރުގަދަ ކޮށްފައެވެ.
ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)ގެ ޑިރެކްޓަރ-ޖެނެރަލް ޓެޑްރޯސް އަދަނޮމް ގެބްރިއޭސޮސްއަކީ ޓިގްރޭއަށް ނިސްބަތްވާ ބޭފުޅެކެވެ. ދާދި ފަހުން އޭނާ ވަނީ ޓިގްރޭ ސަރަޙައްދުގައި ދިރިއުޅޭ ރައްޔިތުންނަށް ކުރިމަތިވެފައިވާ ނިކަމެތި ހާލާ ގުޅޭ ގޮތުން ވާހަކަފުޅު ދައްކަވާފައެވެ.
"ސަރުކާރުގެ ފައުޖުތަކުން ވަނީ ޓިގްރޭ ސަރަޙައްދު ބަންދު ކޮށްފައި. ޓިގްރޭއަށް އިންސާނީ އެހީ ފޯރުކޮށްދޭނެ ފުރުޞަތު ބަންދު ކޮށްފައި. މި ކަމާ ގުޅިގެން ޓިގްރޭގައި ގިނަ އަދަދެއްގެ ބަޔަކު ވަނީ ބަނޑުހައިހޫނު ކަމުގައި މަރުވެފައި. ޓިގްރޭގެ ރައްޔިތުންނަށް ބަނޑުހައިހޫނު ކަމާ ކުރިމަތިލާން ޖެހުނީ އިތިއޯޕިޔާ ސަރުކާރުގެ އަމަލުތަކުގެ ސަބަބުން،" ޓެޑްރޯސް ވިދާޅުވިއެވެ.