މީހެއްގެ އަޚްލާގު ފެންނަ އެންމެ މުހިންމު ސިފައަކީ، އެމީހާ އަނެކާއާ މެދު ޢަމަލުތައް ބަހައްޓާގޮތް ކަމަށް މިނިސްޓަރ އޮފް އިސްލާމިކް އެފެއާޒް ޑރ.އަޙުމަދު ޒާހިރު އަލީ ވިދާޅުވެއްޖެއެވެ. ރާއްޖެ އިސްލާމްވި ދުވަހުގެ ޖަލްސާގައި ވާހަކަފުޅުދައްކަވަމުން މިނިސްޓަރ ވިދާޅުވީ ދިވެހިންނަށް ލިބުނު އެންމެ މާތް ނިޢުމަތަކީ އިސްލާމް ދީން ކަމަށެވެ.
ރާއްޖެއަށް އިސްލާމްދީނުގެ ހިދާޔަތު ލިބުނުތާ 896 އަހަރު ފުރުން ފާހަގަކުރުމަށް، އިސްލާމީ މަރުކަޒުގައި ބޭއްވި ޖަލްސާ ޝަރަފުވެރިކޮށްދެއްވީ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިހުއެވެ. އަދި ރައީސުލްޖުމްހޫރިއްޔާގެ ނައިބު ފައިސަލް ނަސީމްއާއި، ވަޒީރުންނާއި ސަރުކާރުގެ އިސް ބޭފުޅުން މިޖަލްސާގައި ބައިވެރިވެވަޑައިގެންނެވިއެވެ. މީގެ އިތުރުން އާއްމުންނާއި، ސްކޫލް ދަރިވަރުންވެސް ބައިވެރިވިއެވެ.
ޖަލްސާގައި ވާހަކަފުޅު ދައްކަވަމުން އިސްލާމިކް މިނިސްޓަރ ޑރ.އަޙުމަދު ޒާހިރު އަލީވަނީ، އިހުގެ އިސްލާމީ ވާހަކަތަކުން މިސާލު ނަންގަވާ މުޖުތަމަޢަށް މުހިންމު މެސެޖުތަކެއް ދެއްވާފައެވެ. މިނިސްޓަރ ވިދާޅުވީ އިސްލާމް ދިނަކީ މި ކުޑަ ރާއްޖެ އަލި މަގަށް ގެނެސްދިން ހިދާޔަތްކަމަށެވެ. އިސްލާމް ދީނުގެ ހިދާޔަތާއެކު ދިވެހިންގެ އަޚްލާގަށާއި މުޅި މުޖުތަމަޢަށްވެސް އޭގެ ހެޔޮ ބަދަލު އައިކަމަށެވެ.
މިނިސްޓަރ ވިދާޅުވީ އިސްލާމް ދީނުގެ ތާރީޚަށް ބަލާއިރުވެސް ޚިލާފު އުފެދޭ އެކިއެކި ރަޢުޔުތައް އަންނަމުންދިޔަކަށެވެ. ނަމަވެސް އޭރު ޢަމަލު ކުރެއްވި ގޮތަކީ، އެއްމޭޒަކަށް ޖަމާވެ ކަންކަމުގައި ޙައްލު ހޯދުންކަމަށެވެ. އެހެންކަމުން ޚިޔާލު ތަފާތުވާ ރަޢުޔުތަކުގައިވެސް އެކަކު އަނެކަކަށް އިހްތިރާމްކުރުމުގެ ރިވެތި އަޚްލާގު ދަމަހައްޓަންޖެހޭކަމަށް ވިދާޅުވިއެވެ.
އަދި އިސްލާމްދީނުގެ ރިވެތި އަޚްލާގުގެ މަތީގައި ނަފްސު ސާބިތުކުރުމަށް، މީހާގެ ޢަމަލުތަކާމެދު ފުންކޮން ވިސްނަންޖެހޭކަމަށް އިސްލާމިކް މިނިސްޓަރ ވިދާޅުވިއެވެ. އިންސާނާގެ އަޚްލާގު ބުނެދެނީ އެމީހެއްގެ ޢަމަލުތަކުންނާ، މުޖުތަމަޢުގައި އެހެން މީހުންނާމެދު ޢަމަލުތައް ބަހައްޓާ ގޮތުންކަމަށްވެސް މިނިސްޓަރ ވިދާޅުވިއެވެ. އެހެންކަމުން އަމިއްލަ ނަފްސާމެދު ވިސްނާ، ފިކުރުކޮށް، އަބަދުވެސް އަމިއްލަ ނަފުސް މުރާޖަޢާ ކުރުމަށް މިނިސްޓަރ އެދިވަޑައިގެންނެވިއެވެ.
"މީހާ އެހެން މީހުންނާ މެދު މުޢާމަލާތް ކުރާ ގޮތް ވަރަށް މުހިންމު. އަމިއްލަ ނަފުސް މުރާޖަޢާކުރަން، ތިމާ އަނެކާއާ މެދު ޢަމަލުތައް ބެހެއްޓޭގޮތަށް ބަލަންޖެހޭ. ޢަޒުމް ކަނޑައަޅަންވީ މި ބަދަލު ދިރިއުޅުމަށް ގެންނަން. އަނެކާއަށް ކަމޭހިތުން، އިހުތިރާމްކުރުން، އެހީވުން، މިއިން ކޮންމެ ކަމަކުން ބުނެދެނީ ތިމާމެ އަޚްލާގު." އިސްލާމިކް މިނިސްޓަރ ވިދާޅުވިއެވެ.
ރާއްޖެ އިސްލާމްވި ދުވަސް ފާހަގަކުރުމަށް ބޭއްވި ޖަލްސާގައި ސްކޫލް ދަރިވަރުން ވަނީ، 4 ރާގަށް ކީރިތި ޤުރުޢާން ހުށައަޅާދީފައެވެ. އަދި ދެ ދަރިވަރަކު ވަނީ މަދަހަވެސް ހުށައަޅާފައެވެ. އަދި ދުވަހާ ގުޅޭ ޚާއްސަ ދުޢާއެއްވެސްވަނީ ކޮށްފައެވެ.
ދިވެހި ތާރީޚުން ފެންނަން އޮތް ގޮތުގައި އިސްލާމްދީނުގެ ހިދާޔަތުގެ އަލިކަން ދިވެހި ޤައުމަށް ލިބުނީ ހިޖުރައިން 548 ވަނަ އަހަރުގެ ރަބީޢުލް އާޚިރު މަހުގެ 2 ވަނަ ދުވަހުއެވެ. އެއީ މީލާދީން 1153 ވަނަ އަހަރުއެވެ. މިއަދު ފާހަގަކުރަނީ ރާއްޖެ އިސްލާމްވިތާ 896ވަނަ އަހަރެވެ.