ނުރައްކާތެރި ބައްޔެއް ކަމުގައިވާ އިބޯލާ ޖެހިފައިވާ އިތުރު 14 މީހަކު ޔުގާންޑާގެ ވެރިރަށް ކަމްޕާލާއިން ފެނިފައިވާ ކަމުގައި އެ ޤައުމުން ބުނެފިއެވެ. އެ ޤައުމުގައި ހަލުވިކަމާ އެކު އިބޯލާ ފެތުރެމުންދާ ކަން ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން ވަނީ ސެޕްޓެންބަރު މަހުގެ ތެރޭގައި ހާމަކޮށްފައެވެ.
އިބޯލާ ވައިރަސް ޑިޒީޒް (އީ.ވީ.ޑީ) ނުވަތަ އިބޯލާއަކީ ޖަނަވާރުންގެ ފުށުން އިންސާނުންގެ ހަށިގަނޑަށް އަރާ ނުރައްކާތެރި ބައްޔެކެވެ. މި ބަލި ފަތުރާ ޖަނަވާރުތަކުގެ ތެރޭގައި ވައު، ޕޯކިޔުޕައިން އަދި ރާމާމަކުނު ޢާއިލާގެ ޖަނަވާރުތައް ހިމެނެއެވެ. އެއަށްފަހު، ހަށިގަނޑުން ބޭރުވާ ދިޔައިގެ ޒަރީޢާއިން މި ބަލި އިންސާނުންގެ ތެރޭގައި ފެތުރެއެވެ.
ސެޕްޓެންބަރު މަހުގެ ފަހުން ޔުގާންޑާގައި މި ބަލީގައި 44 މީހުން މަރުވެފައިވާ ކަމުގައި އެ ޖަމުޢިއްޔާއިން ބުނެއެވެ. ނަމަވެސް، ޔުގާންޑާގެ ޞިއްޙަތާ ބެހޭ ވުޒާރާއިން ޢާންމު ކޮށްފައިވާ ތަފާސްހިސާބުތަކުގެ އަދަދުތައް ތަފާތެވެ. އެ ވުޒާރާއިން ބުނީ މި ބަލި ޖެހިފައި ވަނީ ޖުމުލަ 90 މީހަކަށް ކަމަށާއި، މަރުވި މީހުންގެ އަދަދު 28އަށް އަރާފައިވާ ކަމުގައެވެ.
ޔުގާންޑާގެ ޞިއްޙަތާ ބެހޭ ވަޒީރު ރުތް ޖޭން އެސެންގް ވިދާޅުވީ، ފާއިތުވި 48 ގަޑިއިރުގެ ތެރޭގައި ބަލި ޖެހިފައިވާ އިތުރު 14 މީހުން ދެނެގަނެވިފައިވާ ކަމުގައެވެ. މީގެ ތެރެއިން ނުވަ މީހަކު ފިޔަވައި އެހެން އެންމެންނަށް ބަލި ޖެހިފައި ވަނީ ވެރިރަށް ކަމްޕާލާގައި ބަލި ޖެހިފައިވާ މީހުންގެ ފުށުން ކަމުގައި އޭނާ ވިދާޅުވިއެވެ. އަދި، ނުވަ މީހަކަށް ބަލި ޖެހިފައި ވަނީ، މި ބަލި އެންމެ ހަލުވިކަމާ އެކު ފެތުރެމުންދާ ކަސަންޑާ ކިޔާ ސަރަޙައްދަކުން ކަމުގައި ވެސް އޭނާ ވިދާޅުވިއެވެ.
ކަސަންޑާގެ އިތުރުން މުބެންޑޭގައި ވެސް މި ބަލި ދަނީ ހަލުވިކަމާ އެކު ފެތުރެމުންނެވެ. އެއާއެކު، ޔުގާންޑާގެ ރައީސް ޔޮވެރީ މުސެވެނީ ވަނީ، އެ ދެ ރަށް ފުރަބަންދު ކުރަން ނިންމަވާފައެވެ. ނަމަވެސް، ކަމްޕާލާގެ ހާލަތު ރަނގަޅު ކަމުގައި ޞިއްޙީ ވަޒީރު އެސެންގް ވިދާޅުވިއެވެ.
އިބޯލާގެ ޢަލާމާތްތަކުގެ ތެރޭގައި ހުންއައުމާއި، ހޮޑުލެވުމާއި، ބޭރަށް ހިންގުމުގެ އިތުރުން ހަށިގަނޑުން ލޭއައުން ހިމެނެއެވެ. ގިނަ އަދަދެއްގެ މީހުން ދިރިއުޅޭ ތޮއްޖެހިފައިވާ ރަށެއްގައި މި ބަލި ހަލުވިކަމާ އެކު ފެތުރެން ފަށައިފި ނަމަ، ބަލި ފެތުރުން ކޮންޓްރޯލް ކުރުމަކީ ފަސޭހަ ކަމެއް ނޫން ކަމުގައި މާހިރުން ބުނެއެވެ.
ޔުގާންޑާގައި އެންމެ ފަހުން މި ބަލީގައި މީހަކު މަރުވެފައި ވަނީ 2019ވަނަ އަހަރުއެވެ. މިހާރު ފެތުރެމުން ދަނީ މި ބަލީގެ "ސޫދާން އެބޯލާ ވައިރަސް" ވޭރިއެންޓެވެ. މި ވޭރިއެންޓަށް ޚާއްޞަ ކޮށްފައިވާ ވެކްސިނެއް އުފެއްދުމުގެ މަސައްކަތް ޑަބްލިޔު.އެޗް.އޯ.އިން ދަނީ ކުރަމުންނެވެ. އަދި، ކުރިއަށް އޮތް ހަފުތާތަކުގެ ތެރޭގައި ޓެސްޓުތައް ފަށާނެ ކަމުގައި އެ ޖަމުޢިއްޔާއިން ބުނެއެވެ.