ޔަހޫދީން އަޅުވެތި ކޮށްފައިވާ ފަލަސްޠީނުގެ ބިންތަކުގައި ހިންގަމުންދާ އުދުވާންތައް އިތުރަށް ވަރުގަދަކޮށް، ފަލަސްޠީނުގެ އިތުރު ހަ މީހަކު ޝަހީދު ކޮށްލައިފިއެވެ. އެ މީހުން ޝަހީދު ކޮށްލާފައި ވަނީ، ފަލަސްޠީނުގެ މިނިވަން ކަމަށް ކުރާ ޖިހާދުގައި އަލަށް ބައިވެރިވި ހަތިޔާރުއެޅި ޖަމާޢަތެއް ކަމުގައިވާ "ލަޔަންސް ޑެން"އަށް ނިސްބަތްވާ މީހުން ހޯދުމަށް ޔަހޫދީ އިސްރާޢީލުގެ ސިފައިން ފަށާފައިވާ އުދުވާންތަކުގެ ތެރެއިންނެވެ.
މީގެ ތެރެއިން ފަސް މީހަކު ޝަހީދު ކޮށްލާފައި ވަނީ، ޔަހޫދީ އިސްރާޢީލުގެ އިސްތިއުމާރީ ސިފައިން ހުޅަނގު އައްސޭރީގެ އުތުރުގައިވާ ނާބުލުސްގައި ހިންގި އުދުވާންތަކެއްގައި ކަމުގައި ފަލަސްޠީނުގެ ޞިއްޙަތާ ބެހޭ ވުޒާރާއިން ބުނެއެވެ. ހަވަނަ މީހާ ޝަހީދު ކޮށްލާފައި ވަނީ ރާމަاللهގެ އުތުރުން އޮންނަ ނަބީ ޞާލިޙް އަވަށުގައެވެ.
ޔަހޫދީންގެ ދައުލަތުގެ ބޮޑުވަޒީރު ޔައިރު ލަޕިދު ވަނީ އޭނާގެ ސިފައިން ފަލަސްޠީނުގެ ބިންތަކަށް އަރައި ހިންގަމުންދާ އުދުވާންތަކަށް ތަޢުރީފު ކުރައްވާފައެވެ. މި އުދުވާންތަކުގައި ލަޔަންސް ޑެން ޖަމާޢަތުގެ އިސްވެރިޔާ ކަމުގައި ބެލެވޭ ވާދީ އަލްޙޫޙް ވެސް ޝަހީދު ކޮށްލާފައިވާ ކަމުގައި އޭނާ ބުންޏެވެ. އަދި، ހަތިޔާރު އެޅި ޖަމާޢަތްތަކަށް ނިސްބަތްވާ މެންބަރުން ހޯދާނެ ކަމުގެ އިންޒާރު ވެސް އޭނާ ދެއްވިއެވެ.
ލަޔަންސް ޑެން ޖަމާޢަތާ ދެކޮޅަށް ކަމަށް ބުނެ ޔަހޫދީ ސިފައިން ފަށާފައިވާ އުދުވާންތަކުގައި ހުޅަނގު އައްސޭރީގެ ގިނަ ޢިމާރާތްތަކަކަށް ވެސް ވަނީ ހަމަލާދީފައެވެ. ބައެއް ޢިމާރާތްތައް ވަނީ ބޮމުގެ ހަމަލާތަކުގައި ބިމާ ހަމަކޮށްލާފައެވެ. އެ ޢިމާރާތްތަކަކީ ހަތިޔާރު އުފައްދަން ބޭނުން ކުރާ ތަންތަން ކަމުގައި ލަޕިދު ވިދާޅުވިއެވެ.
"ފަލަސްޠީނުގެ މިނިވަން ކަމަށް ކުރާ ޖިހާދުގައި އަމާން ދިނުމަކީ މި ޖަމާޢަތުން ކުރާނެ ކަމެއް ނޫން. އަމާން ދިނުން ވާނީ ފިނޑި އަމަލަކަށް. މިއީ، ލަޔަންސް ޑެންގެ ހަނގުރާމަވެރިން ޔަހޫދީންގެ އިސްތިއުމާރީ ބާރާ ދެކޮޅަށް ތެދުވެ ޖިހާދު ކުރަންވީ ވަގުތު،" ހަމަލާތަކާ ގުޅިގެން ލަޔަންސް ޑެން ޖަމާޢަތުން ނެރުނު ބަޔާނެއްގައި ބުނެފައިވެއެވެ. ޔަހޫދީންގެ ސިފައިން ހުސްވި އޮގަސްޓު މަހުގެ ތެރޭގައި ވަނީ އެ ޖަމާޢަތުގެ ކުރީގެ ލީޑަރު އިބްރާހީމް އަލްނަބުސްލީ ޝަހީދު ކޮށްލާފައެވެ.
ފަލަސްޠީނުގެ ބިންތަކަށް އަރައި ޔަހޫދީ ސިފައިން ހިންގަމުންދާ އުދުވާންތައް ހުއްޓުވުމަށް އިސްރާޢީލާ އެކު މަޝްވަރާ ކުރަމުންދާ ކަމުގައި ފަލަސްޠީނުގެ ރައީސް މަޙުމޫދު އައްބާސްގެ ތަރުޖަމާނު ނަބީލް އަބޫ ރުދައިނާ ވިދާޅުވިއެވެ. މި އުދުވާންތަކާ ގުޅިގެން ޣައްޒާގައި ވެރިކަން ކުރާ ހަމާސް ޖަމާޢަތުން ބުނީ، ޔަހޫދީން ފަލަސްޠީނުގެ ސުލްޙަމަސަލަސް ކަން ނަގައިލާފައިވާ ކަމުގައެވެ.
އިސްލާމިކް ޖިހާދު ޖަމާޢަތުން ވަނީ ޔަހޫދީންގެ އިސްތިއުމާރީ ވެރިކަމާ ދެކޮޅަށް މުޒާހަރާ ކުރުމަށް ގޮވައިލާފައެވެ. އަދި، އެ ޖަމާޢަތުގެ އިސްވެރިއެއް ކަމުގައިވާ ޚާލިދް އަލް-ބަތްޝް ވަނީ، ޔަހޫދީން ސިފައިންނާ ކުރިމަތިލުމަށް އެ ޖަމާޢަތުގެ މެންބަރުންނަށް ގޮވައިލާފައެވެ.
ޔަހޫދީންގެ ލާއިންސާނީ އުދުވާންތަކުގައި މި އަހަރުގެ ތެރޭގައި 120އަށްވުރެ ގިނަ ފަލަސްޠީނުގެ ރައްޔިތުން ވަނީ ޝަހީދު ކޮށްލާފައެވެ. މީގެ ތެރޭގައި ގިނަ އަދަދެއްގެ ޢާންމުން ވެސް ހިމެނެއެވެ. ޔަހޫދީން ފަލަސްޠީނުގެ ބިންތަކަށް އަރައި، އެ ޤައުމުގެ ރައްޔިތުން އަޅުވެތި ކޮށްފައި ވަނީ 1967ވަނަ އަހަރުއެވެ. އަދި، ހުޅަނގު އައްސޭރީގައި 475,000އަށް ވުރެ ގިނަ ޔަހޫދީން މިހާރު ވަނީ ވަޒަންވެރި ކުރުވާފައެވެ.