ޔުގާންޑާގެ ވެރިރަށް ކަމްޕާލާގައި ހުންނަ ލޯފަން ކުދިންނަށް ކިޔަވައިދޭ ސްކޫލެއްގައި ހިނގި އަލިފާނުގެ ހާދިސާއެއްގައި 11 ދަރިވަރުން މަރުވެއްޖެއެވެ. މި ހާދިސާ ހިނގާފައި ވަނީ ކަމްޕާލާގެ މުކޯނޯ އަވަށުގައި ހުންނަ ސަލާމާ ސްކޫލުގައެވެ.
އަލިފާން ރޯވެފައި ވަނީ ސްކޫލްގައި ތަޢުލީމު ހާސިލު ކުރާ ދަރިވަރުން ދިރިއުޅޭ ޢިމާރާތުގައެވެ. އެއީ، އަންހެން ކުދިން ބައިތިއްބާފައިވާ ޢިމާރާތެކެވެ. އަދި، އަލިފާން ރޯވުމުން އެ ޢިމާރާތުގައި ނިދާފައި ތިބި ކުދިންނަށް ސަލާމަތް ވުމަށް ހުރަސް އެޅުނީ، ވައްކަން ކުރުން ހުއްޓުވުމަށް އެ ތަނުގެ ކުޑަދޮރުތަކުގައި ދަގަނޑު ތޭރި ޖަހާފައި ހުރުމުގެ ސަބަބުން ކަމުގައި ކަމްޕާލާގެ އޮފިޝަލުން ބުނެއެވެ.
މުކޯނޯ ޑިސްޓްރިކްޓުގެ އިސްވެރިޔާ ފާތުމާ އެންޑިބާސާ ވިދާޅުވީ އަލިފާން ރޯވި ވަގުތު އެ ޢިމާރާތުގައި 21 ދަރިވަރުން ތިބި ކަމަށާއި، މި ހާދިސާގައި މަރުވި ކުދިންގެ ހަށިތައް ވަރަށް ބޮޑަށް ފިހިފައިވާ ކަމުގައެވެ. އަދި، އެ ކުދިންނަކީ ކޮން ބަޔެއް ކަން ދެނެގަތުމަށް ޑީ.އެން.އޭ. ޓެސްޓު ހެދުމަށް ނިންމާފައިވާ ކަމުގައި ވެސް އޭނާ ވިދާޅުވިއެވެ.
މި ހާދިސާ ވަރަށް ބޮޑަށް ފިހުނު އިތުރު ހަތް ކުދިންގެ ތެރެއިން ހަ ކުއްޖެއްގެ ހާލު ސީރިޔަސް ކަމުގައި ވެސް ފާތުމާ ވިދާޅުވިއެވެ. ޢިމާރާތުގައި އަލިފާން ރޯވުމުން އެ ތަނުން ސަލާމަތް ވެވުނީ އެންމެ ތިން ކުދިންނަށެވެ. އެ ޢިމާރާތާއި ޖެހިގެން ހުންނަނީ ނުކުޅެދުންތެރިކަން ހުންނަ ފިރިހެން ކުދިން ދިރިއުޅޭ ޢިމާރާތެކެވެ.
މި ހާދިސާއާ ގުޅިގެން ސްކޫލް ބަންދުކޮށް، ފުރިހަމަ ތަހުޤީޤެއް ހިންގަމުންދާ ކަމުގައި ޔުގާންޑާގެ ދާޚިލީ ވަޒީރު ޖެނެރަލް ކަހިންޑާ އޮޓަފީރޭ ވިދާޅުވިއެވެ. އަދި، އެ ތަނުގައި އަލިފާން ރޯވުމަކީ ބަޔަކު ގަސްދުގައި ހިންގާފައިވާ އަމަލެއް ކަމުގައި ބަލައިގެން ތަހުޤީޤު ކުރާނެ ކަމުގައި ވެސް އޭނާ ވިދާޅުވިއެވެ.
ސަލާމާ ސްކޫލުގައި އަލިފާނުގެ ހާދިސާއެއް ހިނގައި ގިނަ އަދަދެއްގެ ދަރިވަރުންތަކެއް މަރުވެފައި މި ވަނީ، އިނގިރޭސި ވިލާތުގެ ރަސްގެފާނު ޗާލްސް ތިންވަނައިގެ ކޮއްކޯފުޅު ޕްރިންސަސް އޭން ޔުގާންޑާއަށް ދަތުރުފުޅެއް ކުރެއްވުމަށް ހަމަޖެހިފައިވާ ދަނޑިވަޅެއްގައެވެ. މި ދަތުރުފުޅުގައި، ޕްރިންސަސް އޭން އެ ސްކޫލަށް ވެސް ޒިޔާރަތް ކުރެއްވުމަށް އޮތީ ހަމަޖެހިފައެވެ.
އަލިފާނުގެ ހާދިސާ ހިނގާފައިވާ ސަލާމާ ސްކޫލަކީ އުމުރުން ހަ އަހަރާއި 14 އަހަރާ ދެމެދުގެ އުމުރުފުރައިގެ ލޯފަން އަންހެން ކުދިންނަށް ކިޔަވައިދޭ ސްކޫލެކެވެ. އެ ތަނުގައި، ނުކުޅެދުންތެރިކަން ހުންނަ އެ އުމުރުފުރައިގެ ފިރިހެން ކުދިން ވެސް ބައިތިއްބައެވެ. މީގެ ތެރެއިން ގިނަ ކުދިންނަކީ ދިރިއުޅޭނެ ތަނެއް ނެތް ކުދިންނެވެ.
ޔުގާންޑާގައި 2018ވަނަ އަހަރުގެ ނޮވެންބަރު މަހު ހިނގި މި ފަދަ އަލިފާނުގެ ހާދިސާއެއްގައި 11 ފިރިހެން ކުދިން މަރުވިއެވެ. އެ ޤައުމުގެ ދެކުނުގައި ހުންނަ ބޯޑިންގް ސްކޫލެއްގައި ހިނގި މި ހާދިސާގައި އިތުރު 20 ކުއްޖަކު ފިހުނެވެ.
2006ވަނަ އަހަރުގެ މާރިޗު މަހު ޔުގާންޑާގެ އިސްލާމީ ތަޢުލީމު އުނގަންނައިދޭ ސްކޫލެއްގައި ހިނގި އަލިފާނުގެ ހާދިސާއެއްގައި 13 ކުދިން މަރުވިއެވެ. އަދި، އެ އަހަރުގެ ޖުލައި މަހު ވެސް ސްކޫލެއްގައި ހިނގި އަލިފާނުގެ ހާދިސާއެއްގައި ވެސް ހަ ކުދިން މަރުވިއެވެ.