ރަޝިޔާގެ އަސްކަރިއްޔާއާ އަލަށް ގުޅުނު ސިފައިން ތަމްރީނު ކުރާ މަރުކަޒަކަށް ރައީސް ވްލަޑިމިއަރ ޕުޓިން ޒިޔާރަތް ކުރައްވައި، ތަމްރީނުތައް ކުރިއަށްދާ ގޮތް ބައްލަވައިލައްވައިފިއެވެ. ރަޝިޔާއިން ޔޫކްރެއިނުގައި ކުރަމުންދާ ހަނގުރާމައިގެ ކުރީ ސަފަށް ފޮނުވާނެ އިތުރު ސިފައިން ހޯދަން ޕުޓިން އިޢުލާނު ކުރައްވާފައި ވަނީ ސެޕްޓެންބަރު މަހުގެ 21ވަނަ ދުވަހުއެވެ.
އެއާ އެކު ރަޝިޔާގެ ދިފާޢީ ވުޒާރާއިން ވަނީ އިތުރު 300,000 މީހުންނަށް އެ ޤައުމުގެ އަސްކަރިއްޔާއާ ގުޅުމުގެ ފުރުޞަތު ހުޅުވައިލާފައެވެ. ރަޝިޔާގެ ދިފާޢީ ވަޒީރު ސަރްގޭ ޝޮއިގޫ ވިދާޅުވީ، މި ގޮވައިލުމަށް އިޖާބަ ދިނުމުގެ ގޮތުން 200,000އަށްވުރެ ގިނަ މީހުން އެ ޤައުމުގެ އަސްކަރިއްޔާއާ ގުޅިފައިވާ ކަމުގައެވެ. މިއީ، އެ އިޢުލާނަށް ފަހު ސިފައިން ތަމްރީނު ކުރާ މަރުކަޒަކަށް ޕުޓިން ވަޑައިގެންނެވި ފުރަތަމަ ފަހަރެވެ.
އެ ތަނަށް ކުރެއްވި ޒިޔާރަތުގައި ޕުޓިން ވަނީ، އަލަށް ގުޅުނު ސިފައިން ގެންގުޅޭ ހަތިޔާރާއި އެހެނިހެން ތަކެތި ބައްލަވައިލައްވާފައެވެ. އަދި، ބައެއް ސިފައިންނާ ވަކިވަކިން ބައްދަލު ކުރައްވައި، އެ މީހުންނަށް ހިތްވަރު ދެއްވިއެވެ. ޕުޓިންގެ ޒިޔާރަތަކީ، ޔޫކްރެއިނުގައި ހަނގުރާމަ ކުރަމުންދާ ރަޝިޔާ ސިފައިންނަށް އެންމެ އެކަށީގެންވާ ސާމާނު ފޯރުކޮށްދީފައި ނުވާ ކަމުގެ ތުހުމަތުތައް ފެތުރެމުންދާ ދަނޑިވަޅެއްގައި ކުރެއްވި ޒިޔާރަތެކެވެ.
ރަޝިޔާގެ އަސްކަރިއްޔާއާ ގުޅުމުގެ ފުރުޞަތު އެ ޤައުމުން އަލުން ހުޅުވައިލާފައި ވަނީ، ޔޫކްރެއިނު ހަނގުރާމައިގައި ލިބެމުން ދިޔަ ނާކާމިޔާބީތަކާ ގުޅިގެން ކަމަށް ބެލެވެއެވެ. ރަޝިޔާއިން ވަނީ ހަނގުރާމައިގެ ކުރީކޮޅު ޔޫކްރެއިނުގެ ހަތަރު ސަރަޙައްދެއް ހިފާފައެވެ. އޭގެ ތެރޭގައި އިރުމަތީގައިވާ ޑޮނެޓްސްކްއާއި ލުހާންސްކްގެ އިތުރުން ދެކުނުގައިވާ ޚާރްސަންއާއި ޒަޕޮރީޜިޔާ ހިމެނެއެވެ.
އެ ސަރަޙައްދުތަކުގައި ފެންނަ ނުފެންނަ ވޯޓުތަކެއް ނެގުމަށް ފަހު، އެއީ ރަޝިޔާގެ ބައެއްގެ ގޮތުގައި އެ ޤައުމުން ވަނީ ކަނޑައަޅާފައެވެ. ނަމަވެސް، ޔޫކްރެއިނުގެ ސިފައިން ދަނީ ރަޝިޔާ ސިފައިން ކޮންޓްރޯލް ކުރަމުންދާ ރަށްތަކާއި އަވަށްތައް މިނިވަން ކުރުމަށް ފަށާފައިވާ ކެމްޕޭނުގައި ކުރިއެރުންތަކެއް ހޯދަމުންނެވެ.
މި ކެމްޕޭނުގެ ދަށުން އިރުމަތީގައިވާ ބައެއް ސަރަޙައްދުތައް ވަނީ މިނިވަން ކޮށްފައެވެ. އަދި، އެމެރިކާއާއި ހުޅަނގުގެ ޤައުމުތަކުން ފޯރުކޮށްދީފައިވާ އައު ހަތިޔާރުތަކާ އެކު ޔޫކްރެއިނުން ސިފައިން ދަނީ ކެމްޕޭން އިތުރަށް ވަރުގަދަކޮށް، ފުޅާ ކުރަމުންނެވެ.
ޔޫކްރެއިން ސިފައިން ވަނީ ރަޝިޔާއިން ޤާއިމު ކޮށްފައިވާ އަސްކަރީ މައި މަރުކަޒުތަކަކަށް ވެސް ވަރުގަދަ ހަމަލާތަކެއް ދީފައެވެ. މީގެ ތެރޭގައި ޔޫކްރެއިނުގެ ދެކުނުގައި އޮންނަ ކްރައިމިޔާގައި ހުންނަ އަސްކަރީ ދެ މަރުކަޒަކަށް ދިން ހަމަލާތައް ފާހަގަ ކޮށްލެވެއެވެ.
މީގެ އިތުރުން، ރަޝިޔާއާއި ކްރައިމިޔާ ގުޅައިދޭ މައި ބުރިޖުގައި ދުއްވާފައި ދިޔަ އުޅަނދެއް ގޮއްވައިލައިގެން ދިން ވަރުގަދަ ހަމަލާ ހިމެނެއެވެ. އެ ހަމަލާގައި ބުރިޖުގެ ބޮޑު ބަޔަކަށް ވަނީ ވަރަށް ބޮޑެތި ގެއްލުންތަކެއް ލިބިފައެވެ. މި ހަމަލާތަކުގެ ޒިންމާ ޔޫކްރެއިނުން އުފުލާފައި ނުވި ނަމަވެސް، ރަޝިޔާއިން ތުހުމަތު ކުރަނީ އެއީ ޔޫކްރެއިނުގެ ސްޕެޝަލް ފޯސްގެ ސިފައިން ދީފައިވާ ހަމަލާތަކެއް ކަމުގައެވެ.
ކްރައިމިޔާއަކީ ވެސް ރަޝިޔާ ސިފައިން އަތްގަދަކޮށް، ވެރިވެގަނެފައިވާ ސަރަޙައްދެކެވެ. އެ ތަން ރަޝިޔާ ސިފައިން ހިފާފައި ވަނީ 2014ވަނަ އަހަރުއެވެ. މި އަހަރުގެ ކުރީކޮޅު ރަޝިޔާ ސިފައިން ޔޫކްރެއިނަށް އަރާފައި ވަނީ ފެބުރުވަރީ މަހުގެ 24ވަނަ ދުވަހުއެވެ. މި ހަނގުރާމައަށް އަށް މަސް ފުރުމާ ގާތްވެފައި ވާއިރު، ހަނގުރާމައަށް ނިމުމެއް އަންނާނެ ތާރީޚެއްގެ ކޮޅުމަތި އަދި ފެންނާކަށް ނެތެވެ.