ބީއެމްއެލް އިނޮވޭޝަން ލެބް ހެކަތަން ފަށައިފި

30 އަށް ވުރެގިނަ ބައިވެރިންނާއެކު ބޭންކް އޮފް މޯލްޑިވްސް އިން އިނޮވޭޝަން ލެބް ހެކަތަން ހޮޓެލް ޖެންގައި ފަށައިފިއެވެ.

މި ހެކަތަން ކުރިޔަށް ގެންދަނީ "ބޭންކިންގ ސޮލިއުޝަންސް ޓު އެންހޭންސް ކަސްޓަމަރ އެކްސްޕީރިއެންސް" ތީމްގެ ދަށުންނެވެ. ބީއެމްއެލުން ވިދާޅުވީ، 48 ގަޑިއިރަށް ދެމިގެންދާ މި ހެކަތަންގައި ރަޖިސްޓްރީކޮށްފައިވާ އަމިއްލަ ފަރުދުންނާއި، ޓީމްތަކަށް ފިންޓެކްގެ ދާއިރާއިން އީޖާދީ ހިޔާލުތަކާއި، ހައްލުތައް ހުށަހެޅުމަށް ހުޅުވާލާފައިވާކަމަށެވެ.

މި ހެކަތަންގައި 3 ޓީމު ހޮވައި މި ޓީމްތަކުން ހުށަހަޅާ ހިޔާލު ކާމިޔާބުކަމާއެކު ނިންމާލުމަށް ބީއެމްއެލް އިނޮވޭޝަން ލެބްގައި މަސައްކަތްކުރުމަށް 6 މަސް ދުވަހުގެ މުއްދަތެއް ލިބޭނެއެވެ.

ހޮވޭ ޓީމުތަކާއެކު އެ ފަރާތްތަކުން ހުށަހަޅާ ސޮލިއުޝަން ބޭންކާއެކު އެއްބަސްވެވޭ އަގެއްގައި ގަތުމަށްވަނީ ހަމަޖެހިފައެވެ.

ބޭންކުން ފުރިހަމަކޮށްދޭނެ ކަންތައްތައް :

• މަސައްކަތްކުރުމަށް ހާއްސަ އޮފީހެއް (ތަނެއް) ހަމަޖައްސައިދިނުން
• ކޮންމެ ޓީމަކަށް އެލަވަންސްގެ ގޮތުގައި މަހަކު 20،000 ރުފިޔާ
• ޑިވެލޮޕްކުރާ ސޮލިއުޝަންއަށް ދިގު މުއްދަތެއްގެ މެއިންޓެނަންސް ކޮންޓްރެކްޓެއް

މި ހެކަތަން ކާމިޔާބު ކުރާ ޓީމުތައް ހޮވުމަށް ހަމަޖެހިފައިވަނީ 16 އޮކްޓޯބަރު 2022 ގައެވެ.