ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކަށް ބައިނަލްއަގްވާމީ ފެންވަރުގައި ދޭ އެންމެ ޝަރަފުވެރި އެވޯޑްކަމަށްވާ، ވޯލްޑް ޓްރެވަލް އެވޯޑްސްގެ "ވޯލްޑްސް ލީޑިންގް ޑެސްޓިނޭޝަން"ގެ އެވޯޑަށް ވޯޓުލުމުގެ ފުރުސަތު ހުޅުވާލައިފިއެވެ.
ވޯލްޑް ޓްރެވަލް އެވޯޑްސްގެ "ވޯލްޑްސް ލީޑިންގް ޑެސްޓިނޭޝަން"ގެ އެވޯޑަށް ވޯޓުލުމުގެ ފުރުސަތު ހުޅުވާލާފައިވާއިރު ވޭތުވެދިޔަ ދެ އަހަރުވެސް "ވޯލްޑްސް ލީޑިންގް ޑެސްޓިނޭޝަން"ގެ އެވޯޑް ކާމިޔާބުކޮށްފައިވަނީ ރާއްޖެއިނެވެ.
ޑަބްލިޔުޓީއޭގެ ވޯލްޑްސް ލީޑިން ޑެސްޓިނޭޝަންގެ އެވޯޑަކީ، މި އެ އެވޯޑް ރަސްމިއްޔާތުގެ އެންމެ ޝަރަފުވެރި އެވޯޑެވެ. މިދިޔަ ދެ އަހަރު ރާއްޖެއިން ކާމިޔާބުކޮށްފައިވާ "ވޯލްޑްސް ލީޑިންގް ޑެސްޓިނޭޝަން"ގެ އެވޯޑް ރާއްޖެއިން މިފަހަރު ކާމިޔާބުކޮށްފިނަމަ، ރާއްޖޭގެ ފަތުރުވެރިކަމަށް 50 އަހަރު ފުރޭ މި ޙާއްސަ އަހަރުވެގެންދާނީ "ވޯލްޑްސް ލީޑިންގް ޑެސްޓިނޭޝަން"ގެ ޝަރަފުވެރި ލަޤަބު ރާއްޖެއަށް މިލްކުވެގެންދާނެ އަހަރަށެވެ.
އެމްއެމްޕީއާރުސީން ހާމަކުރާ ގޮތުގައި ޑަބްލިއުޓީއޭގެ އެވޯޑްތަކަށް ވޯޓުލުން ހުޅުވާލާފައިވަނީ 20 އޮކްޓޯބަރ 2022ގެ ނިޔަލަށެވެ..
އެމްއެމްޕީއާރުސީއިން ބުނީ ފަތުރުވެރިކަމުގެ ރަން އަހަރު ފާހަގަކުރާއިރު ތިންވަނަ ފަހަރަށް މި އެވޯޑް ހާސިލްކުރުމަކީ ފަތުރުވެރިކަމުގެ މަޝްހޫރު މަންޒިލެއްގެ ގޮތުގައި ދިވެހިރާއްޖޭގެ ނަން އިތުރަށް ވަރުގަދަވެގެންދާނެ ކަމެއްކަމަށެވެ. އަދި މި އެވޯޑާއިއެކު، ދަތުރުފަތުރުގެ ވިޔަފާރީގައި ދުނިޔޭގެ ލީޑަރެއްގެ ގޮތުގައި ރާއްޖޭގެ ނަން އިތުރަށް އުޖާލާކުރުމުގެ ފުރުސަތު ތަނަވަސް ވެގެންދާނެކަމަށްވެސް އެމްއެމްޕީއާރުސީން މަޢުލޫމާތުދެއެވެ.
މި އަހަރުގެ ޑަބްލިއުޓީއޭގެ އެންމެ ޝަރަފުވެރި އެވޯޑަށް ރާއްޖެ ނޮމިނޭޓްވެފައި އޮތުމުގެ އިތުރުންވެސް ފާހަގަކޮށްލެވޭ އެވޯޑްތަކަށް ރާއްޖެ ވަނީ ނޮމިނޭޓްވެފައެވެ. އޭގެތެރޭގައި ވޯލްޑްސް ލީޑިންގ އައިލެންޑް ޑެސްޓިނޭޝަންގެ އިތުރުން އަދި ވޯލްޑްސް މޯސްޓް ރޮމޭންޓިކް ޑެސްޓިނޭޝަންގެ އެވޯޑް ހިމެނެއެވެ.
ކޯވިޑްގެ ބަލިމަޑުކަމާއިއެކުވެސް، ވޭތުވެދިޔަ ދެ އަހަރު ރާއްޖެއިން މި ލަގަބު ކާމިޔާބުކޮށްފައި ވަނީ، ރާއްޖޭގެ ފަތުރުވެރިކަމުގެ ސިނާޢަތުގައި މަސްއަކަތްކުރާ ހުރިހާ ފަރާތްތަކުގެ މަސްއަކަތްތަކުގެ ފުރިހަމަކަމުންކަމަށް އެމްއެމްޕީއާރުސީން ފާހަގަކުރެއެވެ..