އުތުރު ޕްރޮވިންސްގައި ފެރީގެ ޚިދުމަތް ދިނުމަށް ދީބާޖާ އިންޓަރނޭޝަނަލް ކުންފުންޏާއެކު ކުރީގެ ސަރުކާރުން ވެފައިވާ އެއްބަސްވުން ބާޠިލުކޮށްފައިވަނީ ގޯސްކޮށްކަމަށް ސުޕްރިމް ކޯޓުން ހުކުމް ކޮށްފިއެވެ. ސުޕްރިމް ކޯޓުން ހުކުމް ކޮށްފައިވަނީ ދީބާޖާއަށް ލިބެންޖެހޭ ހައްގު ބަދަލުގެ މިންވަރު ދަށުކޯޓުން ކަނޑައެޅުމަށެވެ.
ދީބާޖާއާއެކު އުތުރު ޕްރޮވިންސްގައި ފެރީގެ ޚިދުމަތް ދިނުމަށް އެއްބަސް ވުމަކަށް އައީ ކުރީގެ ރައީސް މުހައްމަދު ނަޝީދުގެ ވެރިކަމުގައި 2010ވަނަ އަހަރުއެވެ. އެއްބަސްވުން ބާތިލް ކޮށްފައިވަނީ ރައީސް ޑރ.މުޙައްމަދު ވަހީދުގެ ވެރިކަމުގައެވެ.
މި މަސައްލާގައި ސުޕްރީމް ކޯޓުގައި ބޭއްވި ޝަރީއަތުގައި މައްސަލަ ބެއްލެވި 3 ފަނޑިޔާރުންގެ ތެރެއިން 2 ފަނޑިޔާރުންގެ ހުކުމުގައި ވިދާޅުވެފައިވަނީ ދިބާޖާގެ އެއްބަސްވުން 2013ވަނަ އަހަރު ބާތިލް ކޮށްފައިވަނީ ގާނޫނާއި ޚިލާފަށް ކަމަށާއި، އެހެންނަމަވެސް ގާނޫނާއި ޚިލާފަށް އެއްބަސްވުން ބާތިލް ކުރުމުގެ ސަބަބުން ދީބާޖާއަށް ހައްގުވާ ބަދަލުގެ މިންވަރުގެ ބަދަލު އަލުން ކަނޑައަޅަން ޖެހޭނެ ކަމަށެވެ.
ހުކުމްގައި ވިދާޅުވެފައިވަނީ، ދިބާޖާ ކުންފުންޏަށް 348 މިލިއަން ރުފިޔާ ދޭން ސިވިލް ކޯޓުން ހުކުމް ކޮށްފައި އޮތީ ގޯސްކޮށް ކަމަށެވެ.
މިއީ މި މައްސަލާގައި ސުޕްރިމް ކޯޓުން ހުކުމް ކުރި 3ވަނަ ފަހަރެވެ. ސުޕްރިމް ކޯޓުގައި މި މައްސަލަ ބެއްލެވި ފަނޑިޔާރުންގެ ބެންޗުގައި ތިއްބެވީ ފަނޑިޔާރު އަލީ ރަޝީދު ހުސައިނާއި ފަނޑިޔާރު މަހާޒް އަލީ ޒާހިރުގެ އިތުރުން ފަނޑިޔާރު ޑރ.މުހައްމަދު އިބްރާހިމެވެ. ބެންޗުގެ ރިޔާސަތު ބެލެހެއްޓެވީ ފަނޑިޔާރު އަލީ ރަޝީދެވެ.
ބެންޗުގައި ހިމެނިވަޑައިގަންނަވާ، ފަނޑިޔާރު އަލީ ރަޝީދު ހުކުމުގައި ވިދާޅުވެފައިވަނި ސަރުކާރުން ދީބާޖާއެކު ވެފައިވާ އެއްބަސްވުން ބާތިލް ކޮށްފައިވަނީ ނޯޓިސްއެއް ދިނުމަކާ ނުލާކަން އެގެން އޮންނައިރު، އެއްބަސްވުން ބާތިލް ކޮށްފައިވަނީ ރާއްޖޭގެ ބޮޑު ސަރަހައްދަކަށް ފެރީގެ ޚިދުމަތް ލިބެމުން ނުދާކަމަށް ބުނެ ކަމަށްވެސް އެގެން އޮންނަ ކަމަށެވެ. އެހެންނަމަވެސް ސަރުކާރުގެ ސިޓީތަކަށް ބަލައިރު، ބޮޑު ސަރަހައްދެއްގައި ފެރީގެ ޚިދުމަތް ލިބޭކަން އެގެން އޮންނަ ކަމުގައެވެ. ފަނޑިޔާރު ޢަލީ ރަޝީދު ބުރަވެ ވަޑައިގެންފައިވަނީ، ދީބާޖާއަށް ލިބެންޖެހޭ ބަދަލުގެ މިންވަރު ސިވިލް ކޯޓުން އަލުން ކަނޑައަޅަންޖެހޭ ކަމަށެވެ.
ބެންޗުގައި ހިމެނިވަޑައިގަންނަވާ ޑރ.މުހައްމަދު އިބްރާހިމްގެ ރައުޔުގައި ވިދާޅުވެފައިވަނީ، ފަނޑިޔާރު އަލީ ރަޝީދުގެ ރައުޔުގައި ހިމެނޭ، ސަރުކާރުން ފުރިހަމަ ކޮށްދޭންޖެހޭ ކަންކަމުގެ ތެރޭގައި ހިމެނޭ، ދީބާޖާއަށް 47 ބިމެއް ދޫކުރުމަށް ވެފައިވާ އެއްބަސްވުމާ ގުޅުންހުރި ބައިތައް ފިޔަވާ، އެރައުޔުގައިވާ އެހެން ބައިތަކަށް ތާއީދު ކުރައްވާ ކަމުގައެވެ.
ބެންޗުގައި ހިމެނިވަޑައިގަންނަވާ ފަނޑިޔާރު މަހާޒު އަލީ ޒާހިރު ނެރުއްވީ އަނެއް ދެ ފަނޑިޔާރުން ރައުޔާއި ޚިލާފް ރަޢުޔެކެވެ. އޭނާގެ ރައުޔުގައި ނިންމަވާފައިވަނީ ސަރުކާރުން އެއްބަސްވުމާއި ޚިލާފްވިކަން ސާބިތު ނުވާކަމަށާއި، އޭގެ ނަތީޖާއެއްގެ ގޮތުން ބަދަލު ނަގައިދެވެންވެސް ނޯންނާނެ ކަމުގައެވެ.
އުތުރު ޕްރޮވިންސްގައި ފެރީގެ ޚިދުމަތް ދިނުމަށް ދީބާޖާއާއެކު ވި އެއްބަސްވުން ބާޠިލުކރި މައްސަލާގައިި ބަދަލެއްގެ ގޮތުގައި 348 މިލިއަން ރުފިޔާ ދައްކަން ދައުލަތުގެ މައްޗަށް 2014ގައި ސިވިލް ކޯޓުން ވަނީ ހުކުމްކޮށްފައެވެ. 348 މިލިއަން ރުފިޔާގެ ބަދަލުދޭން ސިވިލް ކޯޓުން ހުކުމްކޮށްފައިވަނިކޮށް، 2018 ވަނަ އަހަރު ހައިކޯޓުން ވަނީ އެ ހުކުމް ބާތިލުކޮށްފައެެވެ.
ނަމަވެސް ހައިކޯޓުން އެ ހުކުމް ބާތިލުކުރީ އިޖުރައާތްތަކާއި ހިލާފަށްކަމަށް ބުނެ 2019ވަނަ އަހަރު ސުޕްރީމް ކޯޓުން ވަނީ ހައިކޯޓުގެ ހުކުމް ބާތިލުކޮށްފައެވެ. މި މައްސަލައިގެ އަޑުއެހުންތައް ނިންމާލީ މިދިޔަ އަހަރުގެ ފަހުކޮޅުއެވެ.