ކެޓެގަރީ ހަތަރެއްގެ ބާރުގަދަ ތޫފާނެއް ކަމުގައިވާ އިއަން އެރުމުގެ ސަބަބުން ބޮޑެތި ގެއްލުންތަކެއް ލުބުނު އެމެރިކާގެ އިރުދެކުނުގައި އޮންނަ ސްޓޭޓެއް ކަމުގައިވާ ފްލޮރިޑާއަށް ރައީސް ޖޯ ބައިޑަން ޒިޔާރަތް ކުރައްވައި، ތޫފާނުގެ ސަބަބުން ލިބިފައިވާ ގެއްލުންތައް ބައްލަވައިލައްވައިފިއެވެ. މި ތޫފާނާ ގުޅިގެން ހިނގި އެކި ހާދިސާތަކުގައި މަރުވި މީހުންގެ އަދަދު 76އަށް އަރާ ކަމަށް ފްލޮރިޑާގެ އޮފިޝަލުން ބުނެއެވެ.
ނަމަވެސް، މަރުވި މީހުންގެ އަދަދު 100އަށްވުރެ މައްޗަށް އަރާނެ ކަމުގައި އެ ޤައުމުގެ މީޑިޔާތަކުން، ކަމާގުޅޭ އިދާރާތަކުގެ އޮފިޝަލުންނާ ހަވާލާދީ ބުނެއެވެ. ތޫފާނުގެ ސަބަބުން ލިބުނު ގެއްލުންތައް ބައްލަވައިލެއްވުމަށް ބައިޑަން ވަނީ ހެލިކޮޕްޓަރުގައި ފްލޮރިޑާގެ އެކި ސަރަޙައްދުތަކަށް ދަތުރު ކުރައްވާފައެވެ.
މި ދަތުރުފުޅުގައި ބައިޑަން ވަނީ އެ ސްޓޭޓްގެ ގަވަރުނަރު ރޮން ޑިސެންޓިސްއާ ވެސް ބައްދަލު ކުރައްވާފައެވެ. ޑިސެންޓިސްއަކީ ރިޕަބްލިކަން ޕާޓީގެ މެންބަރެކެވެ. ނަމަވެސް، ޑިމޮކްރެޓިކް ޕާޓީގެ ރައީސް ބައިޑަން ވަނީ، ސިޔާސީ ދެކޮޅުވެރިކަން އެއްފަރާތް ކުރެއްވުމަށް ފަހު، ޑިސެންޓިސްއާ އެކު މަސައްކަތް ކުރައްވާނެ ކަމުގައި ވިދާޅުވެފައެވެ.
މި ތޫފާނުގެ ސަބަބުން ފްލޮރިޑާގެ ބޮޑު ސަރަޙައްދެއްގައި ފެންބޮޑުވިއެވެ. އަދި، އެތައް މިލިޔަން ގޭބީސީއަކުން ކަރަންޓުގެ ޚިދުމަތް ކެނޑުނެވެ. ފްލޮރިޑާގެ އިތުރުން ދެކުނު ކޮރެލައިނާއާއި އެމެރިކާގެ އިރުމަތީ އައްސޭރިފަށުގެ އެހެން ސްޓޭޓްތަކަށް ވެސް މި ތޫފާނުގެ އަސަރު ކުރިއެވެ.
ސިޔާސީ ނަޒަރަކުން ބަލާއިރު، ބައިޑަން ފްލޮރިޑާއަށް ކުރެއްވި ދަތުރުފުޅަކީ އޭނާއަށް ވަރަށް މުހިންމު ދަތުރުފުޅެކެވެ. އެއް ސަބަބަކީ، އޭނާގެ ކުރިން ރައީސްކަން ކުރެއްވި ޑޮނަލްޑް ޓްރަމްޕަކީ މިހާރު ފްލޮރިޑާގެ ރައްޔިތެކެވެ.
2024 ވަނަ އަހަރު ބާއްވާ ރިޔާސީ އިންތިޚާބުގައި ވާދަކުރައްވަން ބައިޑަން ޝައުގުވެރިކަން ފާޅު ކުރައްވާފައި ވާއިރު، އިންތިޚާބުގައި ޓްރަމްޕާ ކުރިމަތިލައްވަން ޖެހިވަޑައިގަތުމަކީ އެކަށީގެންވާ ކަމެކެވެ. އިންތިޚާބުގައި ޓްރަމްޕަށް ކުރިމަތި ނުލެވޭ ހާލަތެއް މެދުވެރިވެއްޖެ ނަމަ، ބައިޑަންއަށް ދެން ވާދަކުރައްވަން ޖެހިވަޑައިގަންނަވާނެ ކަމަށް ބެލެވޭ އަނެއް ބޭފުޅަކީ ޑިސެންޓިސްއެވެ.
ނަމަވެސް، ސިޔާސީ ދެ ހަތުރުން ކަމުގައިވާ ބައިޑަންއާއި ޑިސެންޓިސް ވަނީ ތޫފާން އިއަންއާ ގުޅޭ ކަންކަމުގައި ސިޔާސީ ވިސްނުން އެއްފަރާތް ކުރައްވާފައެވެ. ތޫފާނުގެ ސަބަބުން ހާލުގައި ޖެހުނު މީހުންނަށް އެހީތެރިކަން ފޯރުކޮށްދިނުމަށް ބައިޑަންގެ ސަރކާރުން ކޮށްފައިވާ މަސައްކަތްތަކަށް ޑިސެންޓިސް ވަނީ ތަޢުރީފު ކުރައްވާފައެވެ. އަދި، ބައިޑަން ވެސް ވަނީ ޑިސެންޓިސްގެ ބެލުމުގެ ދަށުން ކޮށްފައިވާ މަސައްކަތްތައް ފާހަގަ ކުރައްވާފައެވެ.
ކޮވިޑް-19 ކޮންޓްރޯލް ކުރުމަށް ބައިޑަންގެ ސަރުކާރުން އަޅާފައިވާ ރައްކާތެރި ކަމުގެ ފިޔަވަޅުތަކާ އެންމެ ބޮޑަށް ދެކޮޅު ހެއްދެވި އެއް ބޭފުޅަކަށް ޑިސެންޓިސް ވާނެއެވެ. އަދި، ސަރުކާރުން ސްޓޭޓްތަކުގެ ހިންގުމަށް ހުރަސް އަޅައި، ނުހައްޤު ބާރުގެ ބޭނުން ކުރަން މަސައްކަތް ކޮށްފައިވާ ކަމުގައި ޑިސެންޓިސް ވަނީ ތުހުމަތު ކުރައްވާފައެވެ.
ވައިޓް ހައުސްގެ ޕްރެސް ސެކްރެޓަރީ ކެރިން ޜޯން-ޕިއަރ ވިދާޅުވީ، ފްލޮރިޑާއަށް ބައިޑަން ވަޑައިގެންނެވުމުގެ މައިގަނޑު މަޤުޞަދަކީ، އެ ސްޓޭޓްގެ ރައްޔިތުންގެ ހާލަތު ދެނެގަތުމެވެ. މި ދަތުރުފުޅުގައި ބައިޑަން ވަނީ ފްލޮރިޑާގެ ކުދި ވިޔަފާރި ހިންގާ މީހުންނާއި، ޢާންމުންނާ ވެސް ބައްދަލު ކުރައްވާފައެވެ.
ފްލޮރިޑާއަށް ވަޑައިގެންނެވުމުގެ ކުރިން ބައިޑަން ވަނީ ޕުއެރްތޮ ރީކޯއަށް ވެސް ޒިޔާރަތް ކުރައްވާފައެވެ. އަދި ހުސްވި ސެޕްޓެންބަރު މަހު އެ ސަރަޙައްދަށް އެރި ބާރުގަދަ ތޫފާން ފިޔޯނާގެ ސަބަބުން ލިބިފައިވާ ގެއްލުންތައް ބައްލަވައިލައްވާފައެވެ. ވިދާޅުވީ، ތޫފާނުގެ ސަބަބުން ގެއްލުން ލިބުނު ޢާއިލާތަކާއި ހާލުގައި ޖެހުނު މީހުންނަށް ސަރުކާރުން އެހީތެރިކަން ފޯރުކޮށްދޭނެ ކަމުގައެވެ.