ވެލާނާ އިންޓަރނޭޝަނަލް އެއަރޕޯޓުގައި ޤާއިމްކޮށްފައިވާ ދުނިޔޭގެ އެންމެ ބޮޑު ސީޕްލޭން ޓަރމިނަލް މިއަދު ރަސްމީކޮށް ހުޅުވައިފިއެވެ.
2017 ވަނަ އަހަރު މަސްއަކަތް ފެށިފައިވާ މި ޓަރމިނަލް ރަސްމީކޮށް ހުޅުވައިދެއްވީ ރައީސުލްޖުމްހޫރިއްޔާގެ ނައިބު ފައިޞަލް ނަސީމްއެވެ.
ވެލާނާ އިންޓަރނޭޝަނަލް އެއަރޕޯޓުގައި ތަރައްޤީކޮށްފައިވާ "ނޫވިލު" ސީޕްލޭން ޓަރމިނަލްއަކީ އެއަރކްރާފްޓް މެއިންޓެނަންސް އިމާރާތްތަކާއި، ޑޮކްތައް ހިމެނޭ ގޮތަށް، ޒަމާޏީ ފެންވަރަކަށް ފަރުމާކުރެވިފައިވާ ޓަރމިނަލެކެވެ. މި ޓަމިނަލް ހެދުމަށް 32000 އަކަމީޓަރުގެ ބިން ހުޅުލޭ ފަޅުން ހިއްކައިފާވާއިރު، މި ޓަރމިނަލްއިން އެއްފަހަރާ 100 ބޯޓަށް ޙިދުމަތް ދެވޭނެއެވެ. އަދި މި ޓަރމިންލްގައި ދަތުރުވެރިން ފުރުމަށް ޙާއްސަ 32 ގޭޓް ހުންނާނެކަމަށްވެސް އެމްއޭސީއެލްއިން ބުނެއެވެ.
ރާއްޖެއިން ބޭރުން އަންނަ އިންޓަރނޭޝަނަލް ފްލައިޓްތައް ވެލާނާ އެއަރޕޯޓުގައި ޖެއްސުމާއެކު، ދެން އެންމެ އަވަހަށް ކުރެވޭ ކަމަކީ، ފަތުރުވެރިން އެމީހުންގެ މަންޒިލަށް ގެންދިޔުމުގެ މަސައްކަތްކަން ފާހަގަކުރައްވަމުން ރައީސުލްޖުމްހޫރިއްޔާގެ ނައިބު ފައިޞަލް ނަސީމް ވިދާޅުވީ އަލަށް މިއަދު ހުޅުވުނު، އައު ސީޕްލޭން ޓަރމިނަލާއި އެކު ފަތުރުވެރިންނަށް ވަރަށް ބޮޑެތި ފަސޭހަތަކެއް ލިބި، ދަތުރުތައް އަވަސްވެގެންދާނެކަމަށެވެ. އަދި މިޓަރމިނަލްގައި ދުވާލެއްގެ މައްޗަށް 600 ސީޕްލޭން މޫވްމެންޓް ހިނގާކަންވެސް ފާހަގަކުރެއްވިއެވެ.
މި ރަސްމިއްޔާތުގައި ވާހަކަދައްކަވަމުން އެމް.އޭ.ސީ.އެލްގެ މެނޭޖިންގ ޑިރެކްޓަރ މަޙުޖޫބު ޝުޖާޢު ވިދާޅުވީ، ނޫވިލު ސީޕްލޭން ޓަރމިނަލާއެކު، ކުރިން ވަކިވަކި ތަންތަނުގައި ފޯރުކޮށްދެމުންދިޔަ ސީޕްލޭންގެ ޚިދުމަތް އެއް ފުރާޅެއްގެ ދަށަށް ގެނެވި، އެއަރޕޯޓުގައި އެމް.އޭ.ސީ.އެލްގެ އޮޕަރޭޝަންތައް ހިންގުމަށްވެސް އިތުރު ޖާގަ ލިބިގެންދާނެކަމަށެވެ.
މި ޓަރމިނަލްގައި 42 ލައުންޖް ހިމެނޭއިރު، ދެ ލައުންޖް އޮޕަރޭޓްކުރާނީ އެމް.އޭ.ސީ.އެލްއިންނެވެ. މީގެ ތެރެއިން ވިލު ބިޒްނަސް ލައުންޖްއަކީ އެއްފަހަރާ 235 މީހުންނަށް ޙިދުމަތް ދެވޭ ފެންވަރަށް ތަރައްޤީކުރެވިފައިވާ ލައުންޖްއެކެވެ. އަދި، އެމް.އޭ.ސީ.އެލްގެ "ނީރީ" ލައުންޖްއަކީ 315 މީހުންނަށް ޙިދުމަތްދެވޭނެ ލައުންޖްއެއްކަމަށް އެމް.އޭ.ސީ.އެލްއިން މަޢުލޫމާތުދެއެވެ.
58 މިލިއަން ޑޮލަރު ހަރަދުކޮށްގެން ތަރައްޤީކޮށްފައިވާ ނޫވިލު ސީ ޕްލޭން ޓަރމިނަލް ތަރައްޤީކޮށްފައިވަނީ ޗައިނާގެ ބެއިގިންގެ އަރބަން ކޮންސްޓރަކްޝަން ގުރޫޕުންނެވެ.
އައު ސީ ޕްލޭން ޓަރމިނަލް ފަރުމާކޮށްފައިވަނީ ދިވެހި ވަންތަ، ފަތުރުވެރިންނަށް ހިތްގައިމު ތަޖުރިބާއެއް ޓަރމިނަލާ ހަމައިންވެސް ލިބޭގޮތަށް އަދި ޓަރމިނަލަކީ ރިސޯޓް ފެންވަރުގެ ޚިދުމަތްތައް ލިބޭ ތަނަކަށް ހަދާފައިވެއެވެ. އައު ޓަރމިނަލްގެ ލައުންޖްތަކަކީ މަޑުކޮށްލައިގެން ތިބެން ހިތްފަސޭހަ، އަދި އެތަނުން ފަތުރުވެރިންނަށް ކެއިންބުއިމުގެ ޚިދުމަތް ލިބޭ، ހިތްހަމަޖެހިލައިގެން ތިބެވޭ ތަނަކަށް ވަނީ ހަދާފައެވެ. އަދި ޓަރމިނަލް ފަރުމާކޮށްފައިވަނީވެސް އެއަރޕޯޓްގެ ރީތި "ވިއު" އެންމެ ފުރިހަމައަށް ފެންނަ ގޮތަށެވެ.
މި ޓަރމިނަލްގައި 50 ލައުންޖް ހިމެނެއެވެ. މީގެތެރޭގައި އެމްއޭސީއެލްގެ ކޮމަން ލައުންޖަކާއި، އަދި ބިޒްނަސް ލައުންޖް ހިމެނެއެވެ. މި ލައުންޖްތައްވެސް ހަދާފައިވަނީ އިންޑޯގެ އިތުރުން، އައުޓްޑޯ ބައެއްވެސް ހިމެނޭ ގޮތަށެވެ. އަދި ރިސޯޓްތަކުން ލައުންޖް އޭރިއާ ހެދުމަށް، 43 ލައުންޖް ވަނީ ދޫކޮށްފައެވެ.
4 ފަންގިފިލާގެ ޓަރމިނަލްގެ އެންމެ ތިރީ ފަންގިފިލާ ޚާއްސަކޮށްފައިވަނީ، ރިސެޕްޝަން އޭރިއާގެ ގޮތުގައެވެ. ފުރާ މީހުން ސީ ޕްލޭންތަކަށް އެރުވުމުގެ ކުރިން، މަޑުކުރުމަށް ޚާއްސަ އޭރިއާއެއްވެސް ގްރައުންޑް ފްލޯގައި ހިމެނެއެވެ. އެ ބޯޓަކުން ދަތުރުކުރާ މީހުންނަށް އެކުގައި ތިބުމަށް، 30 އަށްވުރެ ގިނަ ވެއިޓިން އޭރިއާ ވަކިވަކިން ވަނީ ހަދާފައެވެ.
ޓަރމިނަލްގެ ލައުންޖްތައް ހުންނާނީ އިމާރާތުގެ ދެ ވަނަ ފަންގިފިލާއިން ފެށިގެނެވެ. އަދި މިތަނުގައި ޑިއުޓީ ފްރީ ފިހާރަތައްވެސް ހިމެނެއެވެ. ޚިދުމަތް އަވަސް ކުރުމަށް 2 ލިފްޓާއި އެސްކަލޭޓަރއެއްވެސް މިތަނުގައި ހުރެއެވެ.