ހުޅުމާލެގައި 4 މަޝްރޫއުއެއްގެ މަސައްކަތް ކުރުމަށް 4 ބަޔަކާއި ހަވާލުކޮށް، ހައުސިންގް ޑިވެލޮޕްމެންޓް ކޯޕަރޭޝަން، އެޗް.ޑީ.ސީން އެކަމާއި ގުޅޭ އެއްބަސްވުމުގައި ސޮއިކޮށްފިއެވެ.
މި އެއްބަސްވުންތަކުގައި އެޗް.ޑީ.ސީގެ ފަރާތުން ސޮއިކުރެއްވީ އެޗް.ޑީ.ސީގެ މެނޭޖިން ޑީރެކްޓަރ އަހްމަދު އާތިފްއެވެ.
ރާއްޖޭގެ ރައްޔިތުންނަށާއި މުޖުތަމައުއަށް ދިމާވެފައިވާ މައްސަލަތަކަށް ހައްލު ހޯދައިދިނުމަށް އެޗް.ޑީ.ސީއިން އެކުލަވާލެވިފައިވާ ހާއްސަ މާސްޓަރޕްލޭންގެ ދަށުން، އެޗް.ޑީ.ސީން ސޮއިކުރި 4 މަޝްރޫއަކީ ރާޢްޖޭގައި މަސައްކަތް ކުރާ ބިދޭސީންނަށް ޙާއްސަ ވޯކަރސް ބިލްޑިންގްއަކާއި އޮޓޯ ސެންޓަރއަކާއި ޕާރކިން ބިލްޑިންއެއްގެ އިތުރުން ޑޭ-ކެއަރ ސެންޓަރެއް ޤާއިމްކުރުމުގެ މަޝްރޫޢުއެވެ.
ވޯކަރސް ބިލްޑިންގ
ވަރކަރސް ބިލްޑިންގްއަކީ 7000 ލޭބަރުންނާއި 2000 ހޮސްޕިޓަލިޓީ ސްޓާފުން އެކޮމޮޑޭޓް ކުރެވޭ 18 ބްލޮކް ހިމަނޭ ތަނެއްކަން އެޗް.ޑީ.ސީން ވިދާޅުވެއެވެ. މިއިން ކޮންމެ ބްލޮކެއްގައި 4 އަދި ހަ މީހުންގެ ޖާގައިގެ ކޮޓަރިތަކާއި ފާހަނަބަރިތަކާއި ނަމާދުގެ ތަކުގެ އިތުރުން ފިހާރަތައް ހިމެނެއެވެ. އޮފީސްތަކާއި ސެކިއުރިޓީ ރޫމާއި ކޮންފެރެންސް ހޯލް އަދި މެޑިކަލް ރޫމް ހިމެނޭ ބިދޭސިންނަށް ރައްކާތެރި ގޮތަށް ފަރުމާކުރެވިފައިވާ މި މަޝްރޫއުގެ ކޮންޓްރެކްޓަރަކީ ހޮންގްކޮންގެ ރޯޓައިމް އިންޖިނައަރިންގް ޓެކްނޮލޮޖީ ޕްރައިވެޓް ލިމިޓެޑެވެ.
މި ޕްރޮޖެކްޓްގެ މަސައްކަތް އެގްރީމަންޓްގައި ސޮއިކުރާ ދުވަހުން ފެށިގެން 14 މަސްދުވަސްތެރޭ ނިންމާލުމަށް ހަމަޖެހިފައިވާ ކަމަށް އެޗް.ޑީ.ސީއިން ވިދާޅުވެއެވެ.
އޮޓޯ ސެންޓަރ
ރައްކާތެރިގޮތެއްގައި ގަރާޖުގެ ޙިދުމަތައް ފޯރުކޮށްދިނުމަށްޓަކައި އެޗް.ޑީ.ސީއިން ތަރައްޤީކުރެވޭ އޮޓޯ ސެންޓަރަކީ 35400 އަކަފޫޓުގެ 5 ބުރި އިމާރާތެކެވެ. އެޗް.ޑީ.ސީއިން މަޢުލޫމާތުދޭ ގޮތުގައި ސަސްޓެއިނެބަލް ސިޓީ މޮޑެލްގެ ދަށުން މި އިމާރާތުން ވާރޭފެން ހާރވެސްޓް ކުރެވޭނެއެވެ. އަދި އިރުގެ ހަކަތަ ސޯލާ ޕަވަރ މި އިމާރާތުގައި ބޭނުންކުރުމުގެ އިތުރުން ކަރަންޓް ކާރުތަކަށް ހާއްސަ ޗާޖިންގ ސްޓޭޝަންތައްވެސް މިއިމާރާތުގައި ޤާއިމްކުރެވިގެންދާނެކަމަށް އެޗް.ޑީ.ސީއިން ވިދާޅުވެއެވެ.
ޕާރކިންގް ބިލްޑިން
މި މަޝްރޫޢުތަކުގެ ތެރެއިން 2،700 އަކަފޫޓުގެ ޕާރކިންގް ބިލްޑިންއަކީ ވެހިކަލް ޕާކްކުރުމަށް ޙާއްސަކުރެވިފައިވާ 6 ފަންގިފިލާގެ އިމާރާތެކެވެ. މި އިމާރަތުގައި އަވިން ހަކަތަ ޖެނަރޭޓްކުރުމަށް ސޯލާ ޕެނެލް ހަރުކުރެވިފައި ހުރުމުގެ އިތުރުން، ރައްޔިތުންނަށް ލުއިފަސޭހަކުރުމުގެ ގޮތުން ފިހާރަތކާއި ފާހަނާތައްވެސް މި އިމާރަތުގައި ހުންނާނެކަމަށް އެޗް.ޑީ.ސީން ބުނެއެވެ. އަދި ހާއްސަ އެހީއަށް ބޭނުންވާ ފަރާތްތަކަށްވެސް ހާއްސަ ޕާކިންގ ހިދުމަތް މި ބިލްޑިންގްގައި ހިމެނޭނެކަމަށްވެސް އެޗް.ޑީ.ސީން މަޢުލޫމާތުދެއެވެ.
ޑޭކެއަރ ސެންޓަރ
ވަޒީފާ އަދާކުރާ ފަރާތްތަކުގެ ދަރިންނަށް ރައްކާތެރި މާހައުލެއް ބިނާކުރުމުގެ މަޤްސަދުގައި އޭބީއޭ އާއި ގުޅިގެން ޤާއިމްކުރެވޭ ޑޭކެއަރ ސެންޓަރަކީ 3000 އަކަފޫޓުގެ 6 ބުރީގެ އިމާރާތެކެވެ. އެޗް.ޑީ.ސީއިން މަޢުލޫމާތުދޭ ގޮތުގައި ޒަމާނީ ޑޭކެއަރގެ ހުރިހާ ހިދުމަތެއް ލިބެން ހުނަގޮތަށް ފަރުމާކުރެވިފައިވާ ޑޭކެއަރ ސެންޓަރަކީ ހާއްސަ އެހީއަށް ބޭނުންވާ ކުދިންނަށްވެސް ހާއްސަ ކްލިނިކާއިއެކު ޤާއިމްކުރުމަށްވަނީ ހަމަޖެހިފައިވާ ސެންޓަރެކެވެ. މި ޕްރޮޖެކްޓްގެ މަސައްކަތް އެގްރީމަންޓްގައި ސޮއިކުރާ ދުވަހުން ފެށިގެން 24 މަސްދުވަސްތެރޭ ނިންމާލުމަށްވަނީ ހަމަޖެހިފައެވެ.
އެޗް.ޑީ.ސީގެ ފަރާތުން ހުޅުމާލެ ތަރައްޤީކުރުމުގައި އެކުލަވާލާ ޕްރޮޑަކްޓްތަކަކީ ހުޅުމާލެ ތަރައްޤީކޮށް، ރައްޔިތުންނަށް ފޯރުކޮށްދޭންޖެހޭ އެންމެހާ ޚިދުމަތްތަކުގެ ފެންވަރު ދުވަހަކަށް ވުރެއް ދުވަހެއް ރަނގަޅުކުރުންކަމަށް އެކުންފުނިން ވިދާޅުވެފައިވެއެވެ