އެކި ނަންބަރުތަކުން ގުޅައިގެން އޮޅުވާލައިގެން ފައިސާ ހޯދުމަށް އެންމެ ގިނައިން ފޯން ކޯލްތައް އަންނަ މާފުށީ ޖަލުގައި ޖޭމަރު ހަރުކޮށްގެން ކޯލް ނުކުރެވޭނެ ގޮތްތަކެއް ހެދުމުގެ މަސައްކަތް ކުރަމުން އަންނަކަމަށް ފުލުހުން ވިދާޅުވެއްޖެއެވެ.
މަކަރާއި ޙީލަތުން އަދި އެކި ނަންބަރުތަކުން އެކި ކުންފުނިތަކުގެ ނަމުގައި ގުޅައިގެން އޮޅުވާލައިގެން ބޮޑެތި ޢަދަދުތަކުން ފައިސާ ހޯދާ މައްސަލަތައް ވަނީ ފަހަކަށް އައިސް އިތުރުވެފައެވެ. މިފަދަ މައްސަލަތައް ހައްލުކުރުމަށް ފުލުހުން ކުރަމުން އަންނަ މަސައްކަތްތަކާގުޅޭގޮތުން ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން ފުލުހުންގެ ހެޑް އޮފް ފައިނޭންޝަލް ކްރައިމް ޔުނިޓްގެ އިންސްޕެކްޓަރ އޮފް ޕޮލިސް ޔޫސުފް ލޫތު ވިދާޅުވީ، އޮޅުވާލައިގެން ފައިސާ ހޯދުމަށް ގުޅާ ގިނަ ނަންބަރުތަކަކީ އެއްވެސް މީހެއްގެ ނަމުގައި ރަޖިސްޓްރީކޮށްފައި ނުވާ ނަންބަރުތަކެއްކަމަށެވެ. ނުވަތަ އެފަދަ ނަންބަރުތަކަކީ ބިދޭސީއެއްގެ ނަމުގައި ރަޖިސްޓްރީކޮށްފައިހުންނަ ނަންބަރުތައްކަމަށާއި، އެފަދަ ޙާލަތުގައި އެމީހުން ދެނެގަނަންނައިރު، އެއީ އެތައް އަހަރެއްކުރިން ރާއްޖެ ދޫކޮށް ޤައުމަށް ގޮސްފައިވާ ބިދޭސީއަކަށްވާކަމަށް، ލޫތު ވިދާޅުވިއެވެ. އެހެންކަމުން އެފަދަ ޙާލަތްތަކުގައި ފޯނުކުރާ މީހާ ހޯދުމަށް ބޮޑެތި ގޮންޖެހުންތަކާ ކުރިމަތިވާކަން ލޫތު ފާހަގަކުރެއްވިއެވެ.
އޮޅުވާލައިގެން މަކަރާއި ޙީލަތުން ފައިސާ ހޯދުމަށް ގިނައިން ފޯނުކުރާ ސަރަހައްދަކީ މާފުށި ސަރަހައްދު ނުވަތަ މާފުށީ ޖަލުކަމަށް ފުލުހުން ކުރިން ވިދާޅުވެފައިވެއެވެ. އެހެންކަމުން އެ ސަރަހައްދުން އެފަދަ ކޯލް ނިކުރެވޭނެގޮތް ހެދުމަށް ކުރާ މަސައްކަތްތަކާ ގުޅޭގޮތުން ލޫތު ވިދާޅުވީ މާފުށީ ސަރަހައްދަކީ ޓޫރިޒަމްގައިވެސް މުހިންމު ސަރަހައްދެއްކަމަށެވެ. ނަމަވެސް މާފުށީ ޖަލުން ފޯން ނުކުރެވޭނެގޮތް ހެދުމަށް ފުލުހުން އިސްނަގައިގެން، ޖަލުގައި ޖޭމަރު ހަރުކުރުމަށް ޕޮލިސީ ލެވެލްގައި މަޝްވަރާތައް ކުރެވި އެކަމަށް ހައްލެއް ގެނައުމުގެ މަސައްކަތް ކުރަމުން އަންނަކަމަށެވެ.
"ސެލް ލޮކޭޝަން މާފުށީ ޖަލު ދެއްކިނަމަވެސް މާފުށީ އެ ސަރަހައްދަކީ ޓޫރިޒަމްގެ ވަރަށް މުހިންމު ސަރަހަދެއް. އެތަނުން ފޯން ކޯލް ނުކުރެވޭނެ ގޮތްތަކެއް ހެދުމަށްޓަކައި ޖޭމަރު ހަރުކުރުން. އެއީތޯ ޙައްލަކީ؟ އެކަމާއި ގުޅޭގޮތުން ޕޮލިސީ ލެވެލްގައި މަޝްވަރާކުރެވި ހައްލު ގެނައުމުގެ މަސައްކަތްތައް ފުލުހުންގެ އިސްނެގުމުގެ މަތިން ކުރެވެމުންދާކަން ފާހަގަކޮށްލަން." ފުލުހުންގެ ހެޑް އޮފް ފައިނޭންޝަލް ކްރައިމް ޔުނިޓްގެ އިންސްޕެކްޓަރ އޮފް ޕޮލިސް ޔޫސުފް ލޫތު ވިދާޅުވިއެވެ.
އެކި މީހުންނަށް ގުޅައި ފޯންކޮށްގެން އޮޅުވާލައިގެން ބޮޑެތި ޢަދަދުތަކުން ފައިސާ ހޯދާ މައްސަލާގައި ފުލުހުން ވަނީ، މޮބައިލް ސިމް ވިއްކުން ހަރުކަށިކޮށް، ހަރުދަނާ ފިޔަވަޅުތަކެއް އަޅަން މިހާރު ފަށާފައިވާކަމަށެވެ. އެގޮތުން އެއްވެސް މީހެއްގެ ނަމުގައި ރަޖިސްޓްރީކޮށްފައިނުވާ ނަންބަރުތައް 24 ގަޑިއިރުގެ ތެރޭގައި ބްލޮކްކުރުމަށް ނިންމާފައިވާކަމަށް ލޫތު ވިދާޅުވިއެވެ.
ފުލުހުންގެ ތަފާސްހިސާބުތަކުން ދައްކާގޮތުގައި މިއަހަރުގެ މިހާތަނަށް ސްކޭމް ކޯލްތަކާއި ގުޅުންހުރި 220 އަށްވުރެ ގިނަ މައްސަލަ އެއިދާރާގައި ވަނީ ރިޕޯޓްކޮށްފައެވެ. މިމައްސަލަތަކުގައި އެކި މީހުންގެ އަތުން ހަތަރު މިލިޔަން ރުފިޔާ ވަނީ އޮޅުވާލައިގެން އަތުލާފައެވެ.