ރާއްޖޭގައި ގަވާއިދާ ޚިލާފަށް ރަޖިސްޓްރީކޮށްފައިވާ 100 އެއްހާ އުޅަނދުގެ ރަޖިސްޓްރީ ބާތިލްކޮށްފިއެވެ.
މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ކުރި އިއުލާނުގައި ބުނިގޮތުގައި ރަޖިސްޓްރީ ބާތިލްކުރީ ރާއްޖޭގައި ރަޖިސްޓްރީ ކުރެވޭ އުމުރު ހަމަވެފައިވާ އުޅަނދުތަކާއި، ގަވާއިދާ ޚިލާފަށް މާލެ ޒޯނަށް ރަޖިސްޓްރީ ބަދަލުކޮށްފައިވާ އުޅަނދުތައް ކަމަށެވެ. އެގޮތުން ޖުމްލަ 98 ވެހިކަލެއް ރަޖިސްޓްރީކޮށްފައިވާ ކަމަށް މިނިސްޓރީން ބުނެފައިވެއެވެ.
ޓްރާންސްޕޯޓުން ބުނީ ރަޖިސްޓްރީ ބާތިލްކުރީ އެއީ ގަވާއިދާ ޚިލާފަށް ރަޖިސްޓްރީ ކޮށްފައިވާ ވެހިކަލްތަކެއްކަން ފާހަގަވުމުން ކަމަށެވެ. އަދި އެކަން ހާމަކޮށް ކުރި އިއުލާނުގައިވަނީ އެއުޅަނދުތަކުގެ ރަޖިސްޓްރީ ނަންބަރުވެސް އާންމުކޮށްފައެވެ.
މާލޭގައި ދިމާވެފައިވާ އެންމެ ބޮޑު އެއް މައްސަލައަކީ އެއްގަމު އުޅަނދު ގިނަވެ މަގުތައް ތޮއްޖެހުމުގެ މައްސަލައެވެ. މިހާތަނަށް 80000 އަށްވުރެ ގިނަ ވެހިކަލް މާލެއަށް ރަޖިސްޓްރީކޮށްފައިވާއިރު މީގެތެރޭގައި 4500 އަށްވުރެ ގިނަ ކާރު ހިމެނެއެވެ. ރާއްޖޭގައި ވެހިކަލް ރަޖިސްޓަރކުރެވެނީ ގަރާޖެއްގެ ދަށުންނެވެ. އެހެންނަމަވެސް އެއް ގަރާޖެއްގައި ގިނަ ޢަދަދެއްގެ ވެހިކަލް ރަޖިސްޓްރީކުރުމުގެ މައްސަލަ ބޮޑުވެ އެކަމަށް ޙައްލުގެނައުމަށް ވަކި ޢަދަދަކަށް ރަޖިސްޓްރީކޮށްފައިވާނަމަ އެގަރާޖެއްގެ ދަށުން އުޅަނދު ރަޖިސްޓްރީކޮށްދިނުން މިހާރުވަނީ ހުއްޓާލާފައެވެ.
ގަވާޢިދާ ޚިލާފަށް އެތައް ވެހިކަލެއް ގަރާޖެއްގައި ރަޖިސްޓްރީކުރުމުގެ ސަބަބުން ޕާކުކުރާނެ ތަނެއް ނެތި އުޅަނދުތައް މަގުމަތީ ޕާކުކުރަންޖެހުމަކީ ޢާއްމުންގެ ޝަކުވާ ބޮޑުވެފައިވާ މައްސަލައެކެވެ. ރާއްޖެއަށް އެތެރެކުރެވޭ ވެހިކަލްތައް ކޮންޓްރޯލްކުރުމަށް ސަރުކާރުން އަންނަނީ މަސައްކަތް ކުރަމުންނެވެ. މިގޮތުން އުޅަނދު ރަޖިސްޓްރީކުރެވޭ އުސޫލު ހަރުދަނާކޮށް އެކަމުގައި ހިންގަމުން ދިޔަ ކޮރަޕްޝަންގެ ބޮޑެތި ވިޔަފާރިތައް ހުއްޓުވާ މާލޭގެ އެތެރޭގައި ޢާއްމު ދަތުރުފަތުރު، ނިޒާމެއް ޤާއިމުކޮށް ޚިދުމަތްދޭންވަނީ ފަށާފައެވެ.