އެފްރިކާ ބައްރުގެ ޤައުމެއް ކަމުގައިވާ ނައިޖީރިޔާއަށް ބޯކޮށް ވާރޭވެހި، ފެންބޮޑުވުމާ ގުޅިގެން ކުރިމަތިވި އެކި ހާދިސާތަކުގައި މަރުވި މީހުންގެ އަދަދު 300 އަށްވުރެ މައްޗަށް އަރައިފިއެވެ. ފެންބޮޑުވުމާ ގުޅިގެން އެ ޤައުމުގެ ބޮޑު ސަރަޙައްދަކަށް ވަނީ ގެންލުންވެފައެވެ. ދަނޑުބިންތައް ވަނީ ހަލާކުވެފައެވެ. އަދި، ގިނަ އަދަދެއްގެ ގެދޮރަށް ވަނީ ގެއްލުންވެފައެވެ.
ނައިޖީރިޔާގެ ނޭޝަނަލް އެމަރޖެންސީ މެނޭޖްމެންޓް އޭޖެންސީ (އެން.އީ.އެމް.އޭ) އިން ބުނީ ފެންބޮޑުވުމާ ގުޅިގެން 100,000 އަށްވުރެ ގިނަ މީހުންގެ ގެދޮރު ހަލާކުވެފައިވާ ކަމުގައެވެ. މިއީ، 2012 ވަނަ އަހަރަށް ފަހު އެ ޤައުމަށް ކުރިމަތިވި ފެންބޮޑުވުމުގެ އެންމެ ނުރައްކާތެރި ހާދިސާއެވެ.
2012 ވަނަ އަހަރު ފެންބޮޑުވުމާ ގުޅިގެން 363 މީހުން މަރުވިއެވެ. އަދި، 2.1 މިލިޔަން މީހުންނަށް އަސަރު ކުރިއެވެ. މި އަހަރުގެ ވިއްސާރަ މޫސުމުގައި ހުއްޓުމެއް ނެތި ބޯކޮށް ވާރޭވެހުމާ ގުޅިގެން އެ ޤައުމުގެ 36 ސްޓޭޓުގެ ތެރެއިން 29 ސްޓޭޓެއްގައި ވަނީ ފެންބޮޑުވެފައެވެ.
"ކުރިއަށް އޮތް މަހުގައި ވެސް ވިއްސާރަ މުޅިން އަލިވާނެ ކަމަކަށް ނުބެލެވޭ. ފެންބޮޑުވުމުގެ ސަބަބުން ގިނަ އަދަދެއްގެ ދަނޑުބިންތައް މިހާރު ވެސް ވަނީ ހަލާކުވެފައި. އަދި، ކުރިއަށް އޮތް ތަނުގައި އިތުރު ގެއްލުން ލިބޭނެ ކަމަށް ބެލެވޭ،" އެން.އީ.އެމް.އޭ.ގެ ތަރުޖަމާނު މާންޒޯ އިޒީކިއެލް ވިދާޅުވިއެވެ.
ނައިޖީރިޔާގެ ސަރަޙައްދުތަކުގައި ފެންބޮޑުވެ ބޮޑެތި ގެއްލުންތަކެއް ލިބިފައި ވަނީ، ނައިޖަރ ކޯރުގައި ކެމަރޫންއިން ހަދާފައިވާ ޑޭމްއަކުން ފެންގަނޑު ދޫކޮށްލުމުން ކަމުގައި ނައިޖީރިޔާއިން ތުހުމަތު ކުރެއެވެ. ނަމަވެސް، ކެމަރޫންއިން އެ ކަން ދޮގު ކުރެއެވެ. އަދި، ޑޭމްއިން ފެންގަނޑު ދޫކޮށްލުމުގެ ސަބަބުން ނައިޖީރިޔާއަށް ބޮޑު އަސަރެއް ކޮށްފައި ނުވާ ކަމުގައި އެ ޤައުމުން ބުނެއެވެ.
ވިއްސާރައިގެ އަސަރު ނައިޖީރިޔާއާ އިންވެގެން އޮތް ނީޖިއޭއަށް ވެސް ވަނީ ކޮށްފައެވެ. އެ ޤައުމުގައި ފެންބޮޑުވުމާ ގުޅިގެން ހިނގި އެކި ހާދިސާތަކުގައި މަރުވި މީހުންގެ އަދަދު ވަނީ 159 އަށް އަރާފައެވެ. އަދި، 25,900 އަށްވުރެ ގިނަ ގެދޮރު ހަލާކުވެފައި ވާއިރު، 225,000 އަށްވުރެ ގިނަ މީހުން ހާލުގައި ޖެހިފައިވާ ކަމުގައި އެ ޤައުމުން ބުނެއެވެ. އަދި ގިނަ އަދަދެއްގެ ދަނޑުބިންތައް ހަލާކުވެ، ނައަމްސޫފި ވަނީ މަރުވެފައެވެ.
މިދިޔަ އަހަރު އެ ޤައުމުގައި ހިނގި ފެންބޮޑުވުމުގެ ހާދިސާތަކުގައި 70 މީހުން މަރުވިއެވެ. އަދި، 200,000 އަށްވުރެ ގިނަ މީހުން ގެދޮރުނެތި ހާލުގައި ޖެހުނެވެ.
އަވަށްޓެރި ޗާޑްގައި ވެސް ފެންބޮޑުވުމާ ގުޅިގެން 622,500 އަށްވުރެ ގިނަ މީހުން ހާލުގައި ޖެހިފައިވާ ކަމުގައި އ.ދ.އިން ބުނެއެވެ. އެ ޤައުމުގެ ދެބައިކުޅަ އެއްބަޔަށް ވުރެ ބޮޑު ސަރަޙައްދެއްގައި ފެންބޮޑުވެފައިވާ ކަމުގައި އ.ދ.އިން ބުނެއެވެ. އެ ޤައުމުގައި މިދިޔަ އަހަރު ހިނގި ފެންބޮޑުވުމުގެ ހާދިސާތަކާ ގުޅިގެން 5.5 މިލިޔަން މީހުން ހާލުގައި ޖެހި، އިންސާނީ އެހީތެރިކަމަށް ބޭނުން ޖެހުނެވެ.