އިންޑޮނީޝިޔާގެ މަލަންގްގައި ބޭއްވި ފުޓުބޯޅަ މެޗަކަށް ފަހު ހިނގި ހަމަނުޖެހުންތަކެއްގައި ގިނަ އަދަދެއްގެ ބަޔަކު ފިތި ބާރުވެގެން ހިނގި ހާދިސާގައި މަރުވި މީހުންގެ އަދަދު 174އަށް އަރައިފިއެވެ. މި ހާދިސާ ހިނގާފައި ވަނީ ބަލިވި ޓީމުގެ ސަޕޯޓަރުން ދަނޑުމައްޗަށް އެރުމުން، އެ މީހުން ހުއްޓުވުމަށް ފުލުހުން ކަރުނަ ގޭސް ޖެހުމާ ގުޅިގެން، އެންމެން އެއް ވަގުތެއްގައި އެ ތަނުން ނިކުންނަށް މަސައްކަތް ކުރުމުގެ ތެރޭގައި ފިތި ބާރުވެގެންނެވެ.
އެރީމާ އެފް.ސީ.އާއި ޕްރެސެބާޔާ ސުރަބާޔާއާ ދެކޮޅަށް ކުޅުނު ފޯރިގަދަ ފުޓުބޯޅަ މެޗަކަށް ފަހު ހިނގި މި ހާދިސާގައި އިތުރު 180 މީހަކު ޒަޚަމުވިއެވެ. ފުލުހުން ބުނީ، ބެލުންތެރިންނާ ދެކޮޅަށް ބާރުގެ ބޭނުންކޮށް، ކަރުނަ ގޭސް ޖަހާފައި ވަނީ، އެ މީހުން ހަމަނުޖެހުން ހިންގައި، ފުލުހުންނަށް ހަމަލާދީ ދެ ފުލުހަކު މަރައިލުމުން ކަމުގައެވެ. މިއީ، ކުޅިވަރު ހަރަކާތެއްގައި ހިނގި މި ފަދަ އެންމެ ނުރައްކާތެރި އެއް ހާދިސާއެވެ.
މި ހާދިސާއާ ގުޅިގެން އިންޑޮނީޝިޔާގެ ރައީސް ޖޯކޯ ވިދޯދޯ ވަނީ ފުރިހަމަ ތަހުޤީޤެއް ހިންގުމަށް އަމުރު ކުރައްވާފައެވެ. އަދި، ފުޓުބޯޅަ ދަނޑުތަކުގެ ސަލާމަތާއި ރައްކާތެރިކަން ކަށަވަރު ކުރުމަށް އިތުރު ފިޔަވަޅުތައް އެޅުމަށް އަންގަވާފައެވެ. މި ހާދިސާ ގުޅިގެން އެ ޤައުމުގެ ފުޓުބޯޅައާ ބެހޭ އިދާރާ (ޕީ.އެސް.އެސް.އައި)އިން ވަނީ ކުރިއަށް ރާވާފައިވާ ފުޓުބޯޅަ މެޗުތައް މެއްދަތެއް ނެތް ގޮތަށް ފަސްކޮށްފައެވެ.
ފުޓުބޯޅަ މެޗު ބެލުމަށް އެ ތަނަށް 42,000 އަށްވުރެ ގިނަ މީހުން ޖަމާވި ކަމަށާއި، އޭގެ ތެރެއިން 3,000 އެއްހާ މީހުން އެއް ފަހަރާ ދަނޑަށް އަރާފައިވާ ކަމުގައި ފުލުހުން ބުނެއެވެ. އަދި، ހަމަނުޖެހުންތަކުގައި ފުލުހުންގެ 13 އުޅަނދަކަށް ވެސް ގެއްލުން ދީފައިވާ ކަމުގައި ފުލުހުން ބުނެއެވެ. މި މެޗު ބެލުމަށް ވިއްކުމުގެ ހުއްދަ ދީފައި ވަނީ 38,000 ޓިކެޓެވެ. މި ހާދިސާގައި މަރުވި މީހުންގެ ތެރޭގައި އުމުރުން 5 އަހަރުގެ ތުއްތު ކުއްޖަކު ވެސް ހިމެނެއެވެ.
ޕީ.އެސް.އެސް.އައި.އިން ވަނީ މި ހާދިސާގެ މަޢުލޫމާތު ފުޓުބޯޅައިގެ ބައިނަލްއަޤުވާމީ އިދާރާ ފީފާއާ ވެސް ހިއްސާ ކޮށްފައެވެ. މި ހާދިސާއާ ގުޅިގެން ފީފާއިން އިންޑޮނީޝިޔާއާ ދެކޮޅަށް ފިޔަވަޅެއް ނާޅާނެ ކަމަށް އުންމީދު ކުރާ ކަމުގައި ޕީ.އެސް.އެސް.އައި.ގެ ސެކްރެޓަރީ ޖެނެރަލް ޔޫނުސް ޔޫސީ ވިދާޅުވިއެވެ.
ފުޓުބޯޅައިގެ ސަރަޙައްދީ އިދާރާ އޭޝިޔަން ފުޓްބޯލް ކޮންފެޑެރޭޝަން (އޭ.އެފް.ސީ) އިން ވަނީ މި ހާދިސާއާ ގުޅިގެން ހިތާމާ ފާޅުކޮށްފައެވެ. ފީފާ ދުނިޔޭގެ ތައްޓަށް ކުޅެވޭ އުމުރުން 20 އަހަރުން ދަށުގެ އުމުރުފުރައިގެ ފުޓުބޯޅަ މުބާރާތް އަންނަ އަހަރު ބޭއްވުމަށް ހަމަޖެހިފައި ވަނީ އިންޑޮނީޝިޔާގައެވެ. އަންނަ އަހަރުގެ އޭޝިޔަން ކަޕް ފުޓުބޯޅަ މުބާރާތް ބޭއްވުމަށް ވެސް އިންޑޮނީޝިޔާއިން ވަނީ ބިޑް ހުށަހަޅާފައެވެ.