ޖުޑީޝަލް ސަރވިސް ކޮމިޝަން (ޖޭއެސްސީ) އެކުލެވިގެންވާ ގޮތް އިޞްލާޙުކުރުމަށްޓަކާ ކުރިއަށް ގެންދާ މަޝްވަރާތައް ފަށައިފިއެވެ.
އެޓާނީ ޖެނެރަލްގެ އޮފީހުގެ ޑިރެކްޓަރ ކޮމިއުނިކޭޝަން ޙުސައިން ޙަސަން ވިދާޅުވީ، ޖޭއެސްސީ އެކުލެވިގެންވާގޮތް އިސްލާހުކުރުމަށް ކުރިއަށްގެންދާ މަޝްވަރާތަކުގެ ތެރެއިން ބަންޑާރަ ނާއިބު އަލްއުސްތާޛް އިބްރާހީމް ރިފްޢަތު، ޖޭއެސްސީ އާއި ސުޕްރީމް ކޯޓާ ބައްދަލުކޮށްފައިވާކަމަށެވެ. ޖޭއެސްސީ އެކުލެވިގެންވާގޮތް މުރާޖަޢާކޮށް، ޤާނޫނުއަސާސީއަށް އިސްލާޙު ގެނައުމަކީ، ޝަރުޢީދާއިރާ އިސްލާޙުކުރުމަށް މިސަރުކާރުން ވެފައިވާ ވަޢުދުތަކުގެ ތެރޭގައި ހިމެނޭ މުހިންމު އެއް ވަޢުދެވެ.
ޙުސައިން ޙަސަން ވިދާޅުވީ، ޖޭއެސްސީ އެކުލެވިގެންވާގޮތް މުރާޖަޢާކޮށް ޤާނޫނު އަސާސީއަށް އިސްލާޙު ގެނައުމަށްޓަކައި އެކުލަވާލަންޖެހޭ ޤާނޫނު އެކުލަވާލުވުމުގެ މަސައްކަތް މިހާރު ފަށާފައިވާކަމަށެވެ.
އެގޮތުން ޤާނޫނުއަސާސީގެ ބަޔާންކޮށްފައިވާ ޖުޑީޝަލް ސަރވިސް ކޮމިޝަނަކީ ދެފުށް ފެންނަ ސިޔާސީ ނުފޫޒުން މިނިވަން ވެފައިވާ މުއައްސަސާއެއްކަން ކަށަވަރުކުރުމަށްޓަކައި، ކަމާގުޅޭ ބައިނަލްއަޤުވާމީ ހަމަތަކާއި އުސޫލުތަކަށް ރިޢާޔަތްކޮށް ޤާނޫނު އަސާސީއަށް ގެންނަންޖެހޭ އިސްލާޙުތައް އޭޖީ އޮފީހުން އެކުލަވާލާ މިބިލްގައި ހިމެނޭނެކަމަށް ޙުސައިން ޙަސަން ވިދާޅުވިއެވެ.
އަދި މިހާރު ހިނގަމުންދާ ރައްޔިތުންގެ މަޖިލީހުގެ 3ވަނަ ދައުރުގެ ތެރޭގައި މިބިލް މަޖިލީހަށް ހުށަހެޅުމަށް ނިންމަވާފައިވާކަމަށްވެސް އޭޖީ އޮފީހުގެ ޑިރެކްޓަރ ކޮމިއުނިކޭޝަން ޙުސައިން ޙަސަން ވިދާޅުވިއެވެ.