"މަރުވެފައި އޮތް މީހެއްގެ ހަށިގަނޑު ހުޅުމާލެއިން ފެނިއްޖެ! އަޒްހާނުގެ ހަށިގަނޑުކަމަށް ބެލެވޭ"
ހުޅުމާލެއިން ގެއްލިގެން ހޯދަމުންދާ މުޙައްމަދު އަޒްހާންގެ ހަށިގަނޑުކަމަށް ބެލެވޭ މީހެއްގެ ހަށިގަނޑު ހުޅުމާލެއިން ފެނިއްޖެއެވެ.
ފުލުހުން ވިދާޅުވީ، އަޒްހާން ގެއްލިގެން ހޯދުމަށް ހިންގާ ތަހުގީގުގެ ތެރެއިން ހިންގި އޮޕަރޭޝަނެއްގައި މިއަދު 17:45 އެހައިކަންހާއިރު އަޒްހާންކަމަށް ބެލެވޭ މީހެއްގެ ހަށިގަނޑު ފެނިފައިވާކަމަށެވެ. މިކަމުގެ އިތުރު މަޢުލޫމާތު މިރޭ ފަހުން ހާމަކުރައްވާނެކަމަށް ފުލުހުން ވިދާޅުވެއެވެ.
ހުޅުމާލެ ފޭސް ދޭކުން އަޒުހާން ގެއްލިގެން އޭނާ ހޯދަމުންދާކަން ފުލުހުން އިއުލާންކުރީ މިދިޔަ ހޯމަ ދުވަހުގެރޭގެ ވަގުތެއްގައެވެ. ފުލުހުން ކުރިން ވިދާޅުވެފައިވަނި އެންމެފަހުން އޭނާ ފެނުނުއިރު ލައިގެން ހުރީ މާޖެހި ޕީޗް ކުލައިގެ އަތްކުރު ގަމީހެއް ކަމަށެވެ.
މުޙައްމަދު އަޒްހާން ގެއްލުމުގެ ކުރިން އެންމެ ފަހުން ފެނުނީ ކޮންބަޔަކާއިއެކުކަމެއް ފުލުހުން ހާމަކޮށްފައެއް ނުވެއެވެ. މަޢުލޫމާތު ލިބިފައިވާ ގޮތުގައި އަޒްހާން މިދިޔަ އާދީއްތަ ދުވަހު ހެނދުނު 6:00 ހާއިރު ގެއިން ނުކުމެގެން ދިޔަ ގޮތަށް ޚަބަރެއް ނުވެއެވެ.