އެމެރިކާގެ ނައިބު ރައީސް ކަމަލާ ހެރިސް ދެކުނު ކޮރެޔާއަށް ވަޑައިގަންނަވައި، ދެ ކޮރެޔާ ގުޅޭ ސަރަޙައްދީ ރޮނގު ބަލަހައްޓާ އެމެރިކާ ސިފައިންނާ ބައްދަލު ކުރައްވައިފިއެވެ. ހެރިސް ދެކުނު ކޮރެޔާއަށް ވަޑައިގަންނަވާފައި މި ވަނީ ދެ ޤައުމުގެ ދެމެދުގައި އޮތް ގުޅުންތައް އިތުރަށް ބަދަހި ކުރުމުގެ ބޭނުމުގައެވެ.
ދެކުނު ކޮރެޔާގެ ރައީސް ޔޫން ސުކް-ޔޯލްއާ ބައްދަލު ކުރައްވައި ވާހަކަފުޅު ދައްކަވަމުން ހެރިސް ވިދާޅުވީ ދެ ޤައުމުގެ ދެމެދުގައި އުފެދިފައި އޮތީ ލާމަސީލު ގުޅުމެއް ކަމުގައެވެ. "އަޅުގަނޑުގެ ބޭނުމަކީ ދެ ޤައުމުގެ ދެމެދުގައި އޮތް ގުޅުންތައް އިތުރު ހަރުފަތަކަށް ގެންދިޔުން. ދެ ޤައުމު ގުޅިގެން އިތުރު މަސައްކަތްތަކެއް ކުރުން،" ހެރިސް ވިދާޅުވިއެވެ.
ހެރިސްގެ ދަތުރުފުޅާ ދިމާކޮށް އުތުރު ކޮރެޔާއިން ވަނީ ދެ ބެލިސްޓިކް މިސައިލެއްގެ އަޖުމަ ބެލުމުގެ ޓެސްޓުތައް ހަދާފައެވެ. އެ ޤައުމުން މި އަހަރުގެ ތެރޭގައި މި ފަދަ ގިނަ މިސައިލް ޓެސްޓުތަކެއް ހަދާފައިވެއެވެ.
ދެކުނު ކޮރެޔާގެ ސަލާމަތީ ކަންކަން ބެލެހެއްޓުމަށް އެ ޤައުމުގައި އެމެރިކާގެ 28,500 އަށްވުރެ ގިނަ ސިފައިންގެ މައްޗަށް އެކުލެވޭ ބޮޑު ފައުޖެއް އޮވެއެވެ. އަދި، ހުސްވި ހަފުތާގައި ދެ ޤައުމުން ގުޅިގެން ވަނީ ވަރުގަދަ އަސްކަރީ ތަމްރީނުތަކެއް ބާއްވާފައެވެ.
މި ދަތުރުފުޅުގައި ހެރިސް ވަނީ ދެ ކޮރެޔާ ގުޅޭ ސަރަޙައްދީ ރޮނގުގައި އޮންނަ "ޑީމިލިޓަރައިޒްޑް ޒޯން" ނުވަތަ ހަތިޔާރު ގެންގުޅުން މަނާ ސަރަޙައްދަށް ޒިޔާރަތް ކުރައްވާފައެވެ. މިއީ، އުތުރު ކޮރެޔާއިން ވަރަށް ބޮޑަށް ނުރުހުން ވާނެ ޒިޔާރަތެކެވެ. އުތުރު ކޮރެޔާއިން ޤަބޫލު ކުރާ ގޮތުގައި އެމެރިކާއަކީ ދެ ކޮރެޔާގެ ޞުލްޙައަށް އޮތް އެންމެ ބޮޑު ނުރައްކަލެވެ.
އުތުރު ކޮރެޔާއަށް ވަޑައިގެންނެވުމުގެ ކުރިން ހެރިސް ވަނީ ޖަޕާނަށް ދަތުރުފުޅެއް ކުރައްވާފައެވެ. އަދި، އެ ޤައުމުގެ ކުރީގެ ބޮޑުވަޒީރު ޝިންޒޯ އަބޭގެ ޖަނާޒާގައި ބައިވެރިވެ ވަޑައިގެންނެވިއެވެ. އެ ޤައުމުގައި ތިބޭ އެމެރިކާގެ ފައުޖާ ބައްދަލުކުރައްވައި ހެރިސް ވިދާޅުވީ، ދުނިޔޭގެ އެއްވެސް ބިތެއްގައި ހަރަކާތްތެރިވުމަށް އެމެރިކާއިން ފަސް ނުޖެހޭނެ ކަމުގައެވެ.
އުތުރު ކޮރެޔާއިން އަނެއްކާ ވެސް ނިއުކްލިޔަރ ބޮމެއްގެ އަޖުމަ ބެލުމަށް ޓެސްޓެއް ހެދުމަށް ތައްޔާރުވަމުންދާ ކަމުގައި އެމެރިކާއާއި ދެކުނު ކޮރެޔާއިން ތުހުމަތު ކުރެއެވެ. ދެކުނު ކޮރެޔާގެ ޖާސޫސީ އިދާރާއިން ބުނީ އެ ފަދަ ޓެސްޓެއް އަންނަ އޮކްޓޫބަރު މަހު ހެދުން ގާތް ކަމުގައެވެ.
2006ވަނަ އަހަރަށް ފަހު އުތުރު ކޮރެޔާއިން ވަނީ ހަ ފަހަރެއްގެ މަތިން ނިއުކްލިޔަރ ހަތިޔާރުގެ ޓެސްޓުތައް ހަދާފައެވެ. 2017ވަނަ އަހަރު އެ ޤައުމުން ހަދާފައި ވަނީ ވަރަށް ބާރުގަދަ ބޮމެއްގެ ޓެސްޓެކެވެ. އެއީ 270 ކިލޯޓަނުގެ ބާރުގަދަ ހައިޑްރޮޖަން ބޮމެއްގެ ކަމުގައި އުތުރު ކޮރެޔާއިން ބުނެއެވެ.