ކަނޑު ދަތުރުފަތުރު ކުރުމުގެ ދުވަހުގެ މުނާސަބަތުގައި ކުރިއަށްގެންދިޔަ "މެރިޓައިމް ސޭފްޓީ ވީކް" ނިންމުމުގެ ރަސްމިއްޔާތު ބާއްވައިފިއެވެ.
މި ޕްރޮގްރާމް ނިންމުމުގެ ގޮތުން މާލޭ ނޯތު ހާބަރުގައި ބޭއްވި ޚާއްޞަ ރަސްމިއްޔާތު ޝަރަފުވެރިކޮށްދެއްވީ މިނިސްޓަރ އޮފް ސްޓޭޓް ފޮރ ޓްރާންސްޕޯޓް އެންޑް ސިވިލް އޭވިއޭޝަންގެ ސްޓޭޓް މިނިސްޓަރ އަޙްމަދު ޒުހައިރެވެ.
ބައިނަލްއަގްވާމީ ގޮތުން ފާހަގަކުރާ މެރިޓައިމް ސޭފްޓީ ވީކް ރާއްޖޭގައި ފާހަގަކޮށްފައިވަނީ ސެޕްޓެމްބަރު މަހުގެ 22ވަނަ ދުވަހުން ފެށިގެން 29ވަނަ ދުވަހުގެ ނިޔަލަށެވެ.
މި ރަސްމިއްޔާތުގައި ވާހަކަފުޅު ދައްކަވަމުން ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރ އަޙްމަދު ޒުހެއިރު ވަނީ މެރިޓައިމް ސޭފްޓީ ވީކް ކާމިޔާބު ކަމާއިއެކު ނިންމާލެވުނުކަން ފާހަގަކުރައްވާފައެވެ. އަދި މި ހަފްތާތެރޭގައި ކުރިއަށް ގެންދިޔަ ހަރަކާތްތައް ފުރިހަމައަށް ނިންމާލެވުމުގެ ފަހަތުގައި ތިބި ކޯސްޓްގާޑާއި މެރިން ޕޮލިހަށް ސްޓޭޓް މިނިސްޓަރ ވަނީ ޝުކުރު އަދާކުރައްވާފައެވެ.
މި ހަފްތާ ފާހަގަ ކުރުމުގެ ގޮތުން ކަނޑު އުޅަނދުފަހަރުގެ ސަލާމަތާ ރައްކާތެރިކަމާއި ތިމާވެށީގެ ރައްކާތެރިކަމާގުޅޭ މައުލޫމާތު ދިނުމުގެ ގޮތުން މާލޭ ނޯތު ހާބާގައި މިނިސްޓްރީގެ މުވައްޒަފުން ވަނީ ހަރަކާތްތެރިވެފައެވެ.
ޓްރާންސްޕޯޓު މިނިސްޓްރީން ވަނީ މި ހަފްތާގައި މުޅި ރާއްޖޭގައި އުޅަނދުފަހަރުގެ ސަލާމަތާއި ރައްކާތެރިކަމުގެ މުހިންމުކަން އަންގާދިނުމަށްޓަކައި ކަނޑުގައި ދުއްވާ ހުރިހާ އުޅަނދެއްގައި ސަލާމަތީ ދިދަ ސެޓް (ސީ.ބީ.5 އަދި އެން ދިދަ) ނަގާފައިއެވެ. އަދި ރާއްޖޭގެ ހުރިހާ ރަށެއްގެ ބަނދަރުތަކަށް އަންނަ އުޅަނދުފަހަރުގައި ސަލާމަތާއި ރައްކާތެރިކަމުގެ ގޮތުން އުޅަނދުފަހަރުގައި ހަމަޖެހިފައި ހުރުން ލާޒިމްކުރާ ކަންކަން ހަމަޖެހިފައި ވޭތޯ ބެލުމަށް ކަމާބެހޭ މުއައްސަސާތަކުން އުޅަނދު ފަހަރަށް އަރައި ޗެކްކޮށް މައުލޫމާތުދީފައެވެ.
މެރިޓައިމް ސޭފްޓީ ވީކްގެ ދަށުން ސްކޫލުތަކުގެ ދަރިވަރުންނަށް ވެސް ކަނޑު ދަތުރުކުރުމާ ގުޅޭ މަޢުލޫމާތުދީ ސްކޫލުތަކުގެ ދަރިވަރުން ހޭލުންތެރި ކުރުމަށް ސެޝަންތަކެއް ކުރިއަށް ގެންގޮސްފައިވެއެވެ.
މި ހަފުތާ ފާހަގަކުރުމުގެ މަގްސަދަކީ ކަނޑު އުޅަނދުފަހަރުގެ ސަލާމަތާ ރައްކާތެރިކަމާއި ތިމާވެށީގެ ރައްކާތެރިކަން އިތުރު ކުރުމަށް ހޭލުންތެރިކުރުވުމާއި ކަނޑު ދަތުރުފަތުރުގެ ސިނާއަތުގައި ހުރި ފުރުސަތުތައް ސްކޫލްތަކުގެ ދަރިވަރުންނަށް އަންގައިދިނުން ކަމަށް ޓްރާންސްޕޯޓު މިނިސްޓްރީން ވިދާޅުވިއެވެ.