ރާއްޖެ ވަކިވަކި ރަށްތަކެއްގެ ގޮތުގައި އޮތުމަކީ ތަރައްޤީއަށް އޮތް ހުރަހެއް ނޫންކަމަށާ، އެ ތަރައްގީގެ މައިބަދައަކީ ފެރީގެ ނިޒާމުކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
އެމްޓީސީސީން ހއ.ހޯރަފުށީގެ މަގުތަކުގައި ތާރުއެޅުމުގެ މަސައްކަތް ފެށުމުގެ ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ އަސްލަމް ވަނީ ދުނިޔެ ތަރައްގީވެފައި އޮތަސް ރާއްޖެ ތަރައްޤީވަމުން ދިޔަ ސްޕީޑް ލަސްކަން ފާހަގަކުރައްވައި ، ފަހަކަށް އައިސް ތަރައްގީގެ ދުވެލި ބާރުވެއްޖެކަމަށް ވިދާޅުވެފައެވެ. އަދި އޭގެ މައިގަނޑު ސަބަބަކީ ވާދަވެރި ސިޔާސީ ހަރަކާތްތައްކަމަށް ވިދާޅުވިއެވެ.
އަސްލަމް ވިދާޅުވީ، މީގެ ކުރީގެ ވެރިކަމެއްގައި ވަރަށްބޮޑަށް ފިކުރު ހުރީ ރާއްޖޭގެ %70 މީހުން މާލެ ސަރަހައްދަށް ޖަމާކުރުމަށްކަމަށެވެ. ނަމަވެސް މި ސަރުކާރުގެ ވިސްނުމަކީ އެއީ ނޫންކަމަށެވެ. އަސްލަމް ވިދާޅުވީ އަސާސީ ތައުލީމަށްފަހު ރާއްޖެއަށް އަންނާނެ އެންމެ ބޮޑު ބަދަލަކީ ދަތުރުފަތުރުގެ ނިޒާމުކަމަށެވެ.
މި ސަރުކާރުން ފެށި މަގު ހެދުމުގެ މަސައްކަތްތަކުގެ ތެރެއިން 5 ރަށެއްގެ މަސައްކަތް މިހާތަނަށް ނިންމާލާފައިވާއިރު، އިތުރު 21 ރަށުގެ މަސައްކަތް މިހާރުވެސް ކުރިއަށްދާކަން އަސްލަމް ފާހަގަކުރެއްވިއެވެ. އަދި 7 ރަށެއްގެ ބިން ހިއްކުމުގެ މަސައްކަތް ނިމިފައިވާއިރު، އިތުރު 7 ރަށުގެ ބިން ހިއްކުމުގެ މަސައްކަތް ކުރިއަށްދާ ކަމަށާ، އެއް އެއާޕޯޓުގެ މަސައްކަތް ނިމިފައިވާއިރު، ތިން އެއާޕޯޓުގެ މަސައްކަތް މިހާރު ކުރިއަށްދާކަމަށްވެސް ވިދާޅުވިއެވެ.