ޕާރައިވެޓް ކުންފުނިތަކުގެ މަސްއޫލުވެރިކަން ޕަބްލިކް ކުންފުންޏަކަށް ބަދަލުނުކޮށް، ސެކިއުރިޓީޒް ދޫކޮށްގެން، ފައިސާ ހޯދުމުގެ ފުރުސަތުތައް ކުންފުނިތަކަށް ހޯދައި ދިނުމަށްޓަކައި ގާއިމްކުރި "ވިޔަނަ" ޕްލެޓްފޯމް އިފްތިތާޙުކޮށްފިއެވެ.
މޯލްޑިވްސް ސްޓޮކް އެކްސްޗޭންޖުން ގާއިމްކުރި މި ޕްލެޓްފޯމް އިފްތިތާހުކޮށްދެއްވީ އެކަމަށްޓަކައި ބޭއްވި ހާއްސަ ރަސްމިއްޔާތެއްގައި އިކޮނޮމިކް މިނިސްްޓަރ ފައްޔާޟް އިސްމާއިލްއެވެ.
މި ރަސްމިއްޔާތުގައި ވާހަކަފުޅުދައްކަވަމުން މޯލްޑިވްސް ސްޓޮކް އެކްސްޗޭންޖުގެ ސީއީއޯ އައުޝަން ލަތީފް ދެއްކެވި ވާހަކަފުޅުގައި ވަނީ ވިޔަނަ ޕްލެޓްފޯމަކީ ކެޕޓަލް މާކެޓަށް ގެނެވުނު އިންގިލާބީ ބަދަލެއްގެ ގޮތުގައި ސިފަކުރައްވާފައެވެ. އަދި ވިޔަނަ ޕްލެޓްފޯމްގެ ސަބަބުން ވިޔަފާރިތަކަށް ފައިނޭންސް އާއި އިންވެސްޓްމަންޓްގެ ފުރުސަތުތައް ހުޅުވިގެންދާނޭކަންވެސް އައުޝަން ފާހަގަކުރެއްވިއެވެ.
Today, we are thrilled to have launched the e-platform developed by MSE for the Private Securities Segment - Viyana!
— Maldives Stock Exchange (@StockExchangeMV) September 28, 2022
Launched by Economic Minister @faya_i alongside our CEO Mr. Aushan Latheef and DCEO of @CMDA_MV Ms. Fathimath Kamaludeen.@phaadeen @AushanL @MoEDmv #viyanabymse pic.twitter.com/tg4fjJW3j8
.
ރާއްޖޭގެ ސެކިއުރިޓީޒްގެ ބާޒާރު ފުޅާކުރުމުގެ ގޮތުން ކެޕިޓަލް މާކެޓް ޑިވެލޮޕްމަންޓް އޮތޯރިޓީ އާއި މޯލްޑިވްސް ސްޓޮކް އެކްސްޗޭންޖުން ވަނީ ސެކިއުރިޓީޒްގެ ބާޒާރުގައި ޕްރައިވެޓް ޕްލޭސްމަންޓުގެ އުސޫލުގެ ދަށުން ސެކިއުރިޓީޒް ދޫކުރާނެ ނިޒާމެއް ގާއިމުކޮށްފައެވެ. އެ ނިޒާމުގެ ދަށުން ޕްރައިވެޓް ކުންފުނިތަކުގެ މަސްއޫލުވެރިކަން ޕަބްލިކް ކުންފުންޏަކަށް ބަދަލުނުކޮށް، ސެކިއުރިޓީޒް ދޫކޮށްގެން، ފައިސާ ހޯދުމުގެ ފުރުސަތުތައް ކުންފުނިތަކަށް ލިބޭނެއެވެ.
ވިޔަނަ ޕްލެޓްފޯމަކީ ކުރިއަރާފައިވާ ޒަމާނީ ޓެކްނޮލޮޖީގެ ވަސީލަތްތައް ބޭނުންކޮށްގެން، ޕްރައިވެޓް ސެކިއުރިޓީޒްގެ ބާޒާރުގައި މުއާމަލާތްތައް ކުރިއަށް ގެންދިއުމަށް މޯލްޑިވްސް ސްޓޮކް އެކްސްޗޭންޖުން ގާއިމްކުރި ޕްލެޓްފޯމެކެވެ.
"ވިޔަނަ" މެދުވެރިކޮށް، ޕްރައިވެޓް ސެކިއުރިޓީޒް ސެގްމަންޓުގައި ރަޖިސްޓަރީވެފައިވާ ފަރާތްތަކަށް ސެކިއުރިޓީޒް ގަތުމަށް ހުށަހެޅުމުގެ ފުރުސަތު ރާއްޖޭގައި ރަޖިސްޓަރީ ކޮށްފައިވާ ޕްރައިވެޓް ކުންފުނިތަކާއި، އެހެން ގާނޫނީ ޝަހުސުތަކަށް ލިބޭނެއެވެ. އަދި އެ ވިޔަފާރިތަކުގައި އިންވެސްޓު ކުރުމުގެ ފުރުސަތުވެސް އިންވެސްޓަރުންނަށް ފަހިވެގެން ދާނެއެވެ.
މީގެއިތުރުން ވިޔަނައަކީ ހާއްސަ އުސޫލެއްގެ ދަށުން ރަޖިސްޓަރީ ކޮށްފައިވާ އިންވެސްޓަރުންނަށް އެ މާކެޓުގައި އިންވެސްޓުކުރުމުގެ ފުރުސަތު ލިބިގެންދާ ޕްރައިވެޓް ސެކިއުރިޓީޒްގެ ނިޒާމެކެވެ.
މޯލްޑިވްސް ސްޓޮކް އެކްސްޗޭންޖުން ގަބޫލުކުރާގޮތުގައި ރާއްޖޭގައި ހިންގާ ވިޔަފާރިތައް ތަރައްގީކޮށް ކުރިއެރުވުމަށް "ވިޔަނަ" މެދުވެރިކޮށް ރާއްޖޭގެ ސެކިއުރިޓީޒް ބާޒާރުގެ ދޮރު އިތުރަށް ހުޅުވިގެންދާނެއެވެ. އަދި ސެކިއުރިޓީޒް ބާޒާރުގެ ޕްރައިވެޓް ސެގްމަންޓުގައި ފަސޭހައިން އިންވެސްޓުކޮށް، ފައިދާ ލިބިގަތުމުގެ ފުރުސަތު އިންވެސްޓަރުންނަށް ލިބިގެންދާނެކަމަށްވެސް މޯލްޑިވްސް ސްޓޮކް އެކްސްޗޭންޖުން ބުނެއެވެ.