"ކިންގް ޢަބްދުލް ޢަޒީޒް އިންޓަރނޭޝަނަލް ހޯލީ ޤުރުއާން" މުބާރާތުގައި ބައިވެރިވި ދިވެހި ދަރިވަރުންނާ ރައީސުލްޖުމްހޫރިއްޔާގެ ނައިބު ފައިޞަލް ނަސީމް ބައްދަލުކުރައްވައި، ހިތްވަރު ދެއްވައިފިއެވެ.
"ކިންގް ޢަބްދުލް ޢަޒީޒް އިންޓަރނޭޝަނަލް ހޯލީ ޤުރުއާން" މުބާރާތުގައި ރާއްޖެއިން ބައިވެރިވި ދެ ދަރިވަރުންނަކީ އަޙްމަދު ނަބީޙް ޢަބުދުލްޤާދިރުއާއި މުޙައްމަދު ޔޫޝަޢުއެވެ. މި ދެ ދަރިވަރުންގެ ތެރެއިން އަޙްމަދު ނަބީޙް ވަނީ މުބާރާތުގެ ފައިނަލަށް ދަތުރުކޮށްފައެވެ.
މިއަދު މެންދުރުފަހު ރައީސުލްޖުމްހޫރިއްޔާގެ އޮފީހުގައި މި ދެދަރިވަރުންނާއި މި ދެދަރިވަރުންގެ ބެލެނިވެރިންނާ ބައްދަލުކުރައްވައި ރައީސުލްޖުމްހޫރިއްޔާގެ ނައިބު ވަނީ މި ދެ ދަރިވަރުން މުބާރާތުގައި ބައިވެރިވުމަކީ ރާއްޖެއަށް ލިބުނު ރީތި ނަމަކާ ޝަރަފެއްކަން ފާހަގަކުރައްވައި މި ދަރިވަރުންނާއި ދަރިވަރުންގެ މައިންބަފައިންނަށް ތަޢުރީފާއި ޝުކުރު އަދާކުރައްވާފައެވެ. އަދި ވަކިން ޚާއްޞަކޮށް މި މުބާރާތުގެ ފައިނަލަށް ދަތުރުކޮށް އަޙްމަދު ނަބީޙް ހޯދި ކާމިޔާބީ އެމަނިކުފާނު ފާހަގަކުރެއްވިއެވެ.
ރައީސުލްޖުމްހޫރިއްޔާގެ ނައިބު ވިދާޅުވީ ސަރުކާރުން އަބަދުވެސް މަސައްކަތްކުރާނީ ޤުރުއާނަށް ކުދިން ހިތްޖައްސައި، ދަރިވަރުނަށް ވީހާވެސް ގިނަ ފުރުޞަތުތައް ތަނަވަސްކޮށްދީ އެހީތެރިވެދިނުމަށްކަމުގައެވެ. މި ބައްދަކުރެއްވުމުގައި މި ދެދަރިވަރުންގެ ބެލެނިވެރިންގެ ފަރާތުން ވަނީ ސަރުކާރުން މިދަރިވަރުންގެ ކަންކަމުގައި ދެއްވާ އެއްބާރުލުމާއި ވެދެއްވާ އެހީތެރިކަން ޝުކުރުވެރިކަމާއެކު ފާހަގަކުރައްވާފައެވެ.
މި ބައްދަލުކުރެއްވުމުގައި މި ދެ ދަރިވަރުންގެ މައިންބަފައިންގެ އިތުރުން މިނިސްޓަރ އޮފް އިސްލާމިކް އެފެއާޒް ޑޮކްޓަރ އަޙްމަދު ޒާހިރާއި މިނިސްޓަރ އޮފް އެޑިއުކޭޝަން ޑޮކްޓަރ ޢާއިޝަތު ޢަލީ ބައިވެރިވެވަޑައިގެންނެވިއެވެ.
މިމުބާރާތުގައި ބައިވެރިވެ ފައިނަލްގައި ކިޔެވި އަލްޙާފިޡް އަޙްމަދު ނަބީޙްއަކީ ޚާއްޞަ އެހީއަށް ބޭނުންވާ ފަރާތެކެވެ. އުމުރުން 20 އަހަރުގެ ނަބީޙްގެ އެކުވެރިޔަކީ ކީރިތި ޤުރްއާނެވެ. ހުރިހާ ވަގުތެއް ހެން ހޭދަކުރަނީ ޤުރްއާނާއެކުގައެވެ. ދުނިޔޭގެ މަޝްހޫރު ޤާރީން ކިޔަވާގޮތަށް ޤުރްއާން ކިޔެވުމާއި ރީތި ރާގުރާގަށް ބަންގި ގޮވުމަކީ ނަބީޙް އެންމެ ކުރާހިތްވާ ކަމެވެ.
ކީރިތި ޤުރުއާން ހިތުދަސްކުރުމުގެ އިތުރުން، ޤުރުއާން ކިޔެވުމުގެ އެކިއެކި މުބާރާތްތަކުގައި ޤައުމީ ފެންވަރުގެ ގިނަ ކާމިޔާބީތަކެއް ނަބީޙު ވަނީ ޙާޞިލުކޮށްފައެވެ.
ނަބީޙް ވަނީ ޔޫއޭއީގައި ކުރިޔަށް ދިޔަ 2022 ވަނަ އަހަރުގެ ދުބާއީ އިންޓަރނޭޝަނަލް ޤުރުއާން މުބާރާތުގައިވެސް ބައިވެރިވެ، އެ މުބާރާތުގެ ފައިނަލް ބުރަށް ދަތުރުކޮށް ރާއްޖެ ތަމްސީލުކޮށްފައެވެ.
މީގެ ކުރީގެ އަހަރުތަކުގައިވެސް "ކިންގް ޢަބްދުލް ޢަޒީޒް އިންޓަރނޭޝަނަލް ކޮމްޕެޓިޝަން އޮފް ދަ ހޮލީ ޤްރުއާން" ގައި ބައިވެރިވެ، އެކި ފަރާތްތަކުން ރާއްޖެ ތަމްޞީލުކޮށްފައިވެއެވެ. އެހެންނަމަވެސް މިއީ މިހާ ހަގު އުމުރުގެ ކުއްޖަކަށް މި މުބާރާތުގެ ފައިނަލްގައި ކިޔެވުމުގެ ފުރުޞަތު ލިބުނު ފުރަތަމަ ފަހަރެވެ.
ސަޢުދީ ޢަރަބިއްޔާގައި ކުރިއަށްދާ "ކިންގް ޢަބްދުލް ޢަޒީޒް އިންޓަރނޭޝަނަލް ކޮމްޕެޓިޝަން އޮފް ދަ ހޮލީ ޤްރުއާން" މުބާރާތަކީ ސަޢުދީގައި ބާއްވާ އެންމެ ބޮޑު ބައިނަލްއަޤްވާމީ ޤުރުއާން ކިޔެވުމުގެ އެއް މުބާރާތެވެ.